Wn/shn/ၶႅတ်ႉတရိၼ်း ၸဝ်ႈၼၢင်းဝေးသ် ပရိတ်ႈတဵၼ်ႇ လႆႈၶၢမ်ႇဢဝ်လွင်ႈယူတ်းယႃ တၢင်းပဵၼ်ၶႅၼ်ႇသႃႇ

ဝၼ်းသဝ်၊ မၢတ်ႉၶျ် 23၊ 2024 

ၶႅတ်ႉတရိၼ်း ၸဝ်ႈၼၢင်းဝေးသ် ပရိတ်ႈတဵၼ်ႇ

ၶႅတ်ႉတရိၼ်း (ၸိူဝ်ႈဢွၼ်တၢင်း ၶႅတ်ႉတရိၼ်း မိတ်ႉတႄႇလ်တၼ်ႇ) ၸဝ်ႈၼၢင်းဝေးသ် ၵေႃႉဢၼ်ပဵၼ် မေးၼၢင်း ၸဝ်ႈၸၢႆးဝီႇလျႅမ်ႇ ၸဝ်ႈၵႅမ်မိူင်း ၸၢဝ်းၶုၼ်ပရိတ်ႈတဵၼ်ႇ ၼၼ်ႉ လႆႈၸပ်းတၢင်းပဵၼ်ၶႅၼ်ႇသႃႇဝႆႉသေ မၼ်းၼၢင်းလႆႈတႄႇၶၢမ်ႇဢဝ် လွင်ႈယူတ်းယႃယူႇၼႆ မၼ်းၼၢင်းလၢတ်ႈဝႆႉ တီႈၼႂ်းငဝ်းတူင်ႉ ဢၼ်ႁၢင်ႈႁေႃၵၼ်သိၼ်ႇတၼ်ႇ တီႈၶဝ်ယူႇၼၼ်ႉ ပိုၼ်ဢွၵ်ႇမႃး မိူဝ်ႈဝၼ်းသုၵ်းၼၼ်ႉယဝ်ႉ။ ၶၢဝ်ႇဢၼ်ၼႆႉၼႆႉ လႆႈဢွၵ်ႇမႃး ၽွင်းမိူဝ်ႈ ဢူႈဢွၵ်ႇၼၢႆးမၼ်း ၶုၼ်ႁေႃၶမ်းၶျႃးလ်သ် ထူၼ်ႈသၢမ် တိုၵ်ႉၶၢမ်ႇဢဝ် လွင်ႈယူတ်းယႃ တၢင်းပဵၼ် ၶႅၼ်ႇသႃႇၼၼ်ႉယဝ်ႉ။

ဝၢႆးသေ ၶေႃႈပိုၼ်ၽၢဝ်ႇဢၼ်ၼႆႉ ဢွၵ်ႇမႃးယဝ်ႉၵေႃႈ ဢၼ်ပဵၼ် ၸွမ်ၽွင်းလူင်ပရိတ်ႈတဵၼ်ႇ ရီႇသျီႇ သုၼ်းၼၵ်ႉ ၵေႃႈ လႆႈယွၼ်းသူးပၼ်ဝႃႈ ၶဝ်ၸုၵ်းမၼ်ႈဝႆႉၸွမ်းၵၼ်တင်း မုင်ႉၸၢဝ်းၶုၼ်သေ မွၵ်ႇလၢတ်ႈဝႃႈ “ငဝ်းတူင်ႉဢၼ်ၼႆႉၼႆႉ မၼ်းၼႄ လွင်ႈႁတ်းႁၢၼ် ၸဝ်ႈၼၢင်းၶဵၵ်ႉၼၼ်ႉယဝ်ႉ“ ဝႃႈၼႆ။

ၸဝ်ႈယိင်းၶႅတ်ႉတရိၼ်းၼႆႉ မၼ်းၼၢင်း လႆႈပဵၼ်တၢင်းပဵၼ်ၶႅၼ်ႇသႃႇ မဵဝ်းလႂ်ဢၼ်ဝႃႈၼၼ်ႉတႄႉ ဢမ်ႇလႆႈပိုၼ်ၽၢဝ်ႇ ၸႅင်ႈၸႅင်ႈလႅင်းလႅင်းၼင်ႇၵဝ်ႇ။ ၵူၺ်းၵႃႈဝႃႈ ႁၢင်ႈႁေႃၵၼ်သိၼ်ႇတၼ်ႇ မွၵ်ႇလၢတ်ႈဝႃႈတႄႉ ၶဝ်ယုမ်ႇယမ်ဝႆႉဝႃႈ ၸဝ်ႈယိင်းၶႅတ်ႉတရိၼ်း တေ ၶိုၼ်းယူႇလီမႃး တဵမ်တဵမ်ထူၼ်ႈထူၼ်ႈယူႇ ဝႃႈၼႆ။ မၼ်းၼၢင်းၼႆႉ မိူဝ်ႈၼႂ်းလိူၼ်ၸၼ်ႇဝႃႇၼၼ်ႉ လႆႈႁဵတ်းလွင်ႈၽႃႇတတ်း တီႈတွင်ႉမၼ်းမႃးသေ ၼၼ်ႉၼႆႉ ၸွင်ႇမၼ်းၵပ်းၵၢႆႇၵၼ်တင်း တၢင်းပဵၼ်ၶႅၼ်ႇသႃႇယၢမ်းလဵဝ် ႁိုဝ် ဢမ်ႇၵပ်းၵၢႆႇ ဢၼ်ဝႃႈၼၼ်ႉတႄႉ ဢမ်ႇပႆႇလႆႈႁူႉ ၸႅင်ႈ“လႅင်း” ၼင်ႇၵဝ်ႇ။

ၸဝ်ႈယိင်းၶႅတ်ႉတရိၼ်း ဢၼ်ဢႃႇယု မီး 42 ၶူပ်ႇၼၼ်ႉ မွၵ်ႇလၢတ်ႈဝႆႉ တီႈၼႂ်း ငဝ်းတူင်ႉ ဢၼ်ထႆႇဝႆႉ တီႈ ႁၢင်ႈႁေႃဝိၼ်ႇသႃႇ မိူဝ်ႈဝၼ်းပုတ်ႉၼၼ်ႉဝႃႈ “ယွၼ်ႉပိူဝ်ႈလႆႈပႂ်ႉတေႃႇပေႃးယူႇလီမႃး ၵွပ်ႈဢၼ်လႆႈၽႃႇတတ်းၼၼ်ႉလႄႈ တႃႇယူတ်းယႃၶႅၼ်ႇသႃႇၼႆႉ လႆႈပႂ်ႉၶၢဝ်းယၢမ်းမႃး“ ဝႃႈၼႆယဝ်ႉ။

ႁူမ်ႈဝႃႈ လွင်ႈၽႃႇတတ်း လႆႈၶႅမ်ႉလႅပ်ႈမႃးသေတႃႉ ၸွမ်းၼင်ႇ လွင်ႈၵူတ်ႇထတ်းတူၺ်း လႆႈႁူႉဝႃႈ မီးတၢင်းပဵၼ် ၶႅၼ်ႇသႃႇဝႆႉၼႆႉလႄႈ ၸုမ်းမေႃယႃၶဝ် ပၼ်တၢင်းၶႆႈၸႂ် တႃႇႁႂ်ႈဢဝ် လွၵ်းလၢႆးယူတ်းယႃထၢတ်ႈ Chemotherapy သေ ယူတ်းယႃၼႆလႄႈ လႆႈတႄႇ လွင်ႈယူတ်းယႃမႃး ဝၢႆးလင် လိူၼ်ၾႅပ်ႇဝႃႇရီႇလႄႈ ယၢမ်းလဵဝ်တႄႉ လႆႈဝႃႈ ႁွတ်ႈထိုင် ပွတ်းၸဝ်ႉ လွင်ႈယူတ်းယႃယူႇယဝ်ႉၼႆ ၸဝ်ႈယိင်းၶႅတ်ႉတရိၼ်း မွၵ်ႇလၢတ်ႈဝႆႉ ဝႃႈၼင်ႇၼၼ်။

ၶႅတ်ႉတရိၼ်းလၢတ်ႈဝႃႈ လႆႈၶတ်းၶၢမ်ႇမႃး ၶၢဝ်းယၢမ်းယၢပ်ႇယဵၼ်း ဢၼ်ပေႃးဢမ်ႇၶႂ်ႈယုမ်ႇလႆႈ တႃႇ ၶၢဝ်းတၢင်းသွင်လိူၼ်သေ “ပဵၼ်ဢၼ်လႆႈ တူၵ်းၸႂ်ၵူဝ်ႁေ“ မႃးဝႃႈၼႆယဝ်ႉ။ ၵူၺ်းၵႃႈဝႃႈ ထႅင်ႈၽၢႆၼိုင်ႈတႄႉ မၼ်းၼၢင်း ၽၢၵ်ႇၶေႃႈၵႂၢမ်းဝႃႈ “ပၢႆးယူႇလီမၼ်းၼၢင်း လီၶိုၼ်ႈမႃးယူႇ ၵူႈမိုဝ်ႉၵူႈဝၼ်း“ ဝႃႈၼႆ။

တႄႇဢဝ် မိူဝ်ႈပဵၼ်တၢင်းပဵၼ်ၼၼ်ႉသေ လႆႈဝူၼ်ႉလွင်ႈ ၵူၼ်းၸိူဝ်းပဵၼ်တၢင်းပဵၼ် ၶႅၼ်ႇသႃႇသေ မၼ်းၼၢင်းလႆႈၽၢၵ်ႇၵႂၢမ်းပၼ်ႁႅင်းဝႃႈ “တွၼ်ႈတႃႇ ၵူၼ်းၸိူဝ်းလႆႈပဵၼ် တၢင်းပဵၼ်ဢၼ်ၼႆႉ ပဵၼ်ႁိုဝ်ၵေႃႈယႃႇ ယႃႇပေ ပွႆႇၽႃႈဝၢင်းပႅတ်ႈ လွင်ႈယုမ်ႇယမ် လႄႈ ဢၼ်ပဵၼ်တၢင်းပဵၼ်ၼႆႉၵေႃႈ ဢမ်ႇၸႂ်ႈဝႃႈ ပဵၼ်ယူႇၵေႃႉလဵဝ်“ ဝႃႈၼႆယဝ်ႉ။

မၼ်းလႆႈႁဵတ်းသၢင်ႈမႃး ၵႃႈၵၼ်မၼ်းပဵၼ်လႆႈ တွၼ်ႈတႃႇ ႁႂ်ႈ ၸဝ်ႈၸၢႆးဝီႇလျႅမ်ႇ လႄႈ လုၵ်ႈဢွၼ်ႇ ၸိူဝ်းတိုၵ်ႉၵေႃႉလဵၵ်၊ ဢိၵ်ႇတင်း မုင်ႉႁိူၼ်းမၼ်း ႁႂ်ႈပေႃးၸၢင်ႈ ပွင်သၢင်ႈၵႂႃႇႁင်းၵူၺ်းဝႃႈၼႆ။ ၵပ်းၵၢႆႇလူၺ်ႈ တၢင်းပဵၼ်သေ တွၼ်ႈတႃႇ သပ်းလႅပ်းၼႄ လုၵ်ႈဢွၼ်ႇမၼ်းၵေႃႈ မၼ်းၼၢင်းလႆႈ ဢဝ် ၶၢဝ်းယၢမ်းမႃး ဝႃႈၼႆယဝ်ႉ။

တီႈပၢင်ပွႆးဢီႇသတႃႇဝၼ်းဢႃးတိတ်ႉ တေမႃးၼၼ်ႉတႄႉ ၶႅတ်ႉတရိၼ်း လႄႈ ၸဝ်ႈၸၢႆးဝီႇလျႅမ်ႇၶဝ် တေဢမ်ႇပႆႇၸၢင်ႈၶိုၼ်ႈႁွတ်ႈသေ ပေႃးဝႃႈ တၢင်းပဵၼ် ၸဝ်ႈယိင်းၶႅတ်ႉတရိၼ်း ၶႅၼ်းလီငၢမ်းယဝ်ႉ ၸင်ႇၵွႆႈၶိုၼ်းႁၢပ်ႇၵၢၼ်မုင်ႉၸၢဝ်းၶုၼ် ဝႃႈၼႆ။

လွင်ႈဢၼ် ၸဝ်ႈၸၢႆးဝီႇလျႅမ်ႇ လႆႈၵိုင်ႉၵုင်ႈလုတ်ႈႁၢမ်း တႃႇၶိုၼ်ႈ တီႈပၢင်ပွႆးၶုၵ်းၶူၼ်ႉ ဢၼ်ႁဵတ်းမိူဝ်ႈဝၢႆးလင် ၾႅပ်ႇဝႃႇရီႇၼၼ်ႉၵေႃႈ မၼ်းပဵၼ် ယွၼ်ႉပိူဝ်ႈဝႃႈ တီႈ ၸဝ်ႈယိင်းၶႅတ်ႉတရိၼ်းၼၼ်ႉ လႆႈႁၼ်မီးတၢင်းပဵၼ် ၶႅၼ်ႇသႃႇၼႆ ၽၢႆႇႁေႃၶမ်း လႆႈပိုၼ်ၶၢဝ်ႇဝႆႉဝႃႈၼၼ်ယူႇ။

ငိူၼ်ႈငဝ်ႈတိုၼ်း

• Associated Press. "Princess of Wales Says She Has Cancer; Is Undergoing Chemotherapy" — VOA News, March 22, 2024
• Mark Landler. "Catherine’s Cancer Diagnosis Puts U.K. Royals on Even More Uncertain Terrain" — The New York Times, March 22, 2024
• Sean Coughlan, Royal correspondent. "Kate, Princess of Wales: I am having cancer treatment" — BBC News, March 23, 2024
• VOA News. "ဗြိတိန် ဝေလမင်းသမီး ကက်သရင်း ကင်ဆာရောဂါကုသမှု ခံယူနေရ" — VOA News, March 23, 2024