Wn/shn/ၵၢင်ဝၼ်းမၢတ်ႇ တီႈလိုမ်ဢမႄႇရိၵ ပွတ်းႁွင်ႇ

ဝၼ်းဢင်းၵၢၼ်း၊ ဢေႇပရႄႇ 9၊ 2024 

ၵၢင်ဝၼ်းမၢတ်ႇ

ၵူၼ်းႁူဝ်လၢၼ်ႉမၼ်း ဢွၼ်ၵၼ်လႆႈႁၼ် ၵၢင်ဝၼ်းမၢတ်ႇ တီႈလိုမ်ဢမႄႇရိၵႁွင်ႇ မိူဝ်ႈဢေႇပရႄႇ ဝၼ်းထိ 8 ဝၼ်းၸၼ်ၼၼ်ႉယဝ်ႉ။ ၸိူဝ်းပဵၼ်ၸႄႈမိူင်း ဢၼ်တူၵ်းသိုဝ်ႈသိုဝ်ႈၼိူဝ်သၢႆတၢင်းလႅတ်ႇ ဢၼ်ပဵၼ် မႅၵ်ႇသီႇၵူဝ်ႇ၊ ၶႅၼ်ႇၼေႇတႃႇ၊ မိူင်းႁူမ်ႈတုမ်ဢမႄႇရိၵ ၸိူဝ်းၼႆႉတႄႉ လႆႈႁၼ် ၵၢင်ဝၼ်းမၢတ်ႇတဵမ်တဵမ်ယဝ်ႉ။ ၵူၼ်းၸိူဝ်းယူႇတီႈ လိုမ်ဢမႄႇရိၵႁွင်ႇ ၶႂ်ႈဝႃႈတင်းမူတ်းၼႆႉ လႆႈႁၼ် ၵၢင်ဝၼ်းမၢတ်ႇတဵမ်တဵမ်၊ ဢမ်ႇၼၼ် ၵမ်ႈၽွင်ႈယူႇ။

ၵူၼ်းၵမ်ႈၽွင်ႈတႄႉ ဢွၼ်ၵၼ် ဢွၵ်ႇၶၢဝ်းတၢင်းၸူး ၸႄႈမိူင်း ၸိူဝ်းဢၼ်ႁၼ်လႆႈ ၵၢင်ဝၼ်းမၢတ်ႇ တဵမ်တဵမ်ၼၼ်ႉယဝ်ႉ။ မႅၵ်ႇသီႇၵူဝ်ႇ ဢၼ်မီးတီႈ ၽင်ႇပၢင်ႇလၢႆႇသမုတ်ႉတရႃႇပၸိၽိၵ်ႉ လႄႈ တီႈၸႄႈမိူင်းထႅၵ်ႉသႅတ်ႉ ဢိၵ်ႇတင်း ၸႄႈမိူင်း ဢမႄႇရိၵၢၼ်ႇ 14 ဢၼ်ၼႆႉ လႆႈႁၼ် ၵၢင်ဝၼ်းမၢတ်ႇမႃးယဝ်ႉ။ ၽွင်း လိူၼ် လတ်းၵႂႃႇၼႃႈလႅတ်ႇ ၼႂ်းၶၢဝ်းတၢင်း 4 မိၼိတ်ႉၼၼ်ႉ လႆႈလပ်းသိင်ႇၵႂႃႇယဝ်ႉ။ ၶၢဝ်းယၢမ်းၵၢင်ဝၼ်းမၢတ်ႇ ၵမ်းၼႆႉ မၼ်းႁိုင်လိူဝ် သွင်ပုၼ်ႈ ဢၼ်ၵၢင်ဝၼ်းမၢတ်ႇ မိူဝ်ႈပူၼ်ႉမႃး 7 ပီၼၼ်ႉယဝ်ႉ။ မိူဝ်ႈယၢမ်းၼၼ်ႉတႄႉ မၼ်းမႅၼ်ႈၽွင်း လိူၼ် ၸမ်ၵၼ်တင်း ၵမ်ႇၽႃႇလႄႈ ၶၢဝ်းယၢမ်းၵၢင်ဝၼ်းမၢတ်ႇ ၸင်ႇလႆႈၽႂ်းၵႂႃႇၼႆယဝ်ႉ။

တွၼ်ႈတႃႇတေလႆႈထူပ်းၺႃး ၵၢင်ဝၼ်းမၢတ်ႇတဵမ်တဵမ် ၸိူင်ႉၼႆထႅင်ႈၼႆႉ တေလႆႈပႂ်ႉထႅင်ႈ 21 ပီၼႆယဝ်ႉ။ တၢင်းၵႂၢင်ႈ သၢႆတၢင်းလဵပ်ႈၵၢင်ဝၼ်း မိူဝ်ႈဝၼ်းၸၼ်ၼၼ်ႉ လႆႈလၢမ်းဝႃႈ မီးမွၵ်ႈ 115 လၵ်းၼႆႉလႄႈ ၸိူဝ်းပဵၼ် ဝဵင်းလူင် Dallas၊ Indianapolis၊ Cleveland၊ Buffalo၊ New York လႄႈ Montreal ၸိူဝ်းၼႆႉ ၸင်ႇလႆႈႁၼ် ၵၢင်ဝၼ်းမၢတ်ႇ တဵမ်တဵမ်ၼၼ်ႉယဝ်ႉ။ ၵူၼ်းဢၼ်ယူႇၸွမ်း သၢႆတၢင်းလႅတ်ႇၼၼ်ႉ လႆႈလၢမ်းတူၺ်း မီးယူႇ မွၵ်ႈ 44 လၢၼ်ႉၼႆႉသေ ၵူၼ်းဢၼ်ယူႇၵႆတၢင်း သၢႆတၢင်းလႅတ်ႇ ယၢၼ်း 2 ပၢၵ်ႇလၵ်းၼႆႉ မီးယူႇ ပၢၵ်ႇလၢၼ်ႉၼႆႉ ၼႆယဝ်ႉ။

ငိူၼ်ႈငဝ်ႈတိုၼ်း

• Kane Farabaugh. "Massive crowds watch total solar eclipse over US" — VOA News, April 8, 2024
• Brendan Mcdermid လႄႈ Joseph Ax. "Total solar eclipse: North Americans celebrate with cheers, music and matrimony" — Reuters, April 8, 2024
• VOA News. "မြောက်အမေရိကတိုက်တဝန်း နေကြတ်မှုဖြစ်စဉ်" — VOA News, April 9, 2024