Jump to content

Wn/shn/ၵေႃပွင်ၵၢၼ်သူးရၢင်းဝၼ်း ၼူဝ်ႇပႄႇလ် သႄႉသွမ်း လွင်ႈတိူဝ်းတၢမ်ႇၶွၵ်ႈ ၸဝ်ႈသူးရၢင်းဝၼ်း

Add links
From Wikimedia Incubator
< Wn‎ | shn
Wn > shn > ၵေႃပွင်ၵၢၼ်သူးရၢင်းဝၼ်း ၼူဝ်ႇပႄႇလ် သႄႉသွမ်း လွင်ႈတိူဝ်းတၢမ်ႇၶွၵ်ႈ ၸဝ်ႈသူးရၢင်းဝၼ်း

ဝၼ်းသုၵ်း၊ ၸုၼ်ႇ 21၊ 2024

ဢႄလ်ၾရႅတ်ႉ ၼူဝ်ႇပႄႇလ်
ဢၼ်ၵဵဝ်ႇၵပ်းလူၺ်ႈ ၶၢဝ်ႇ သူးရၢင်းဝၼ်း ၼူဝ်ႇပႄႇလ်
ႁူမ်ႈသၢင်ႈ!
ၸဝ်ႈသူးရၢင်းဝၼ်း ၼူဝ်ႇပႄႇလ် ဢီႇရၢၼ်း ၼႃႇၵႅသ်ႉမူဝ်ႇႁႃႇမႃႇၻီႇ

လုၵ်ႉတီႈ ၵေႃပွင်ၵၢၼ်ၼူဝ်ႇပႄႇလ် ၼေႃႇဝူၺ်း လႆႈသႄႉသွမ်းၼိူဝ် လွင်ႈလုမ်းတတ်းသိၼ်ဢီႇရၢၼ်း လႆႈတိူဝ်းတၢမ်ႇၶွၵ်ႈထႅင်ႈပီၼိုင်ႈ ၼိူဝ် ၼႃႇၵႅသ်ႉမူဝ်ႇႁႃႇမႃႇၻီႇ ဢၼ်ပဵၼ် ၸဝ်ႈၶွင်သူးရၢင်းဝၼ်း ၼူဝ်ႇပႄႇလ် လွင်ႈငမ်းယဵၼ် 2023 ၼၼ်ႉ ၼႆယဝ်ႉ။

ၵေႃပွင်ၵၢၼ်ၼူဝ်ႇပႄႇလ် လႆႈႁဵတ်းဢွၵ်ႇ ၶေႃႈပိုၼ်ၽၢဝ်ႇ မိူဝ်ႈဝၼ်းၽတ်းၼၼ်ႉဝႃႈ လႆႈသၢၼ်ၶတ်းႁၢဝ်ႈႁၢဝ်ႈႁႅင်းႁႅင်းၼိူဝ် ဢၼ် လူင်ပွင်ၸိုင်ႈ ဢီႇရၢၼ်း တမ်းဝၢင်းပၼ်တၢမ်ႇႁၢဝ်ႈႁႅင်း ၼိူဝ် မူဝ်ႇႁႃႇမႃႇၻီႇ ဢၼ်ဢမ်ႇမီးလွင်ႈၽဵင်ႇပဵင်း ၼၼ်ႉသေ ၼႆႉ မၼ်းပဵၼ် လွင်ႈပူၼ်ႉပႅၼ်ၼိူဝ် သုၼ်ႇလႆႈသုၼ်ႇပဵၼ်ၵူၼ်းသေၵေႃႈ ပဵၼ်လွင်ႈတတ်းသိၼ် ဢၼ်ႁဵတ်းႁၢင်ႈဢဝ်ၵူၺ်း ဝႃႈၼႆယဝ်ႉ။

ယွၼ်ႉပိူဝ်ႈဝႃႈ ဢမ်ႇမႆၶႅၼ်းႁူဝ်မူႇသလိမ်ႇ ၸွမ်းၼင်ႇပၵ်းပိူင် ဢၼ်မၵ်းမၼ်ႈဝႆႉၼၼ်ႉ ဝႃႈၼႆသေ လႆႈတိၺွပ်းမၼ်းၼၢင်း ၸဵမ်မိူဝ်ႈ ၼူဝ်ႇဝႅမ်ႇပႃႇ 2021 ၼၼ်ႉယဝ်ႉ။ ၵေႃႉပဵၼ် ၽူႈတၢင်ၼႃႈမၼ်းၼၢင်း Mostafa Nili လႆႈတႅမ်ႈတၢင်ႇဝႆႉတီႈ သိုဝ်ႇသၢၼ်တူင်ႇၵူၼ်း X မၼ်းဝႃႈ ယွၼ်ႉပိူဝ်ႈ မူဝ်ႇႁႃႇမႃႇၻီႇ ဢမ်ႇႁဵတ်းၸွမ်း လွင်ႈမၵ်းမၼ်ႈၼၼ်ႉလႄႈ လႆႈၺႃးတၢမ်ႇၶွၵ်ႈဝႆႉ ပီၼိုင်ႈ ၼႆယဝ်ႉ။ ဢၼ်မၼ်းထုၵ်ႇပၼ်တၢမ်ႇၶွၵ်ႈ လိုၼ်းသုတ်းၼႆႉ ပဵၼ် လွင်ႈဢၼ်ၵပ်းၵၢႆႇၵၼ်တင်း လွင်ႈတုၵ်းယွၼ်း တႃႇၼႄၵၢင်ၸႂ် ပၢင်လိူၵ်ႈတင်ႈသၽႃး၊ လွင်ႈသူင်ႇလိၵ်ႈၸူး တႅၼ်းၽွင်းသၽႃး သုၺ်ႇတိၼ်ႇ လႄႈ ၼေႃႇဝူၺ်း၊ လွင်ႈပၼ်ၵႂၢမ်းမၢႆၼိူဝ် လွင်ႈတၢင်း ဢၼ်ၵဵဝ်ႇၵပ်းလူၺ်ႈ ၵူၼ်းဢဝ်ၶၢဝ်ႇ လုၵ်ႈႁဵၼ်း Dina Ghalibaf ၸိူဝ်းၼႆႉ ၼႆယဝ်ႉ။

ၸုမ်းသုၼ်ႇလႆႈသုၼ်ႇပဵၼ်ၵူၼ်း မွၵ်ႇလၢတ်ႈဝႃႈ ၷႃႇလီႇပၾ်ႉၼႆႉ မိူင်းမၼ်းၺႃးၺွပ်းၵမ်းဢွၼ်တၢင်းၼၼ်ႉ ၽၢႆႇႁူမ်ႇလူမ်ႈၶဝ် မီးလွင်ႈပူၼ်ႉပႅၼ်ၼိူဝ်တူဝ်ၶိင်းမၼ်းသေ ၸင်ႇလႆႈၺႃးၺွပ်းမႃး ဝႃႈၼႆယဝ်ႉ။ ယၢမ်းလဵဝ်တႄႉ မၼ်းၶိုၼ်းလွတ်ႈဢွၵ်ႇမႃးယဝ်ႉ။ တီႈၼႃႈလိၵ်ႈသိုဝ်ႇသၢၼ်တူင်ႇၵူၼ်း ႁွင်ႈၵၢၼ်တတ်းသိၼ်ဢီႇရၢၼ်းလၢတ်ႈဝႃႈတႄႉ ဢၼ်မၼ်းထုၵ်ႇဢဝ်လိူင်ႈၼႆႉ ယွၼ်ႉပိူဝ်ႈမၼ်းၼၢင်း လၢတ်ႈဢွၵ်ႇ ဢမ်ႇမၢၼ်ႇဢမ်ႇမႅၼ်ႈ လႄႈ ၸင်ႇလႆႈၺႃးဢဝ်လိူင်ႈ ဝႃႈဝႆႉၼင်ႇၼႆ။

မူဝ်ႇႁႃႇမႃႇၻီႇၼႆႉ မၼ်းၼၢင်းလႆႈထဵင် တႃႇၵႂႃႇငိၼ်းထွမ်ႇတီႈ လုမ်းတတ်းသိၼ် ဢၼ်တေႁဵတ်းၼႂ်း တွၼ်ႈၸဝ်ႉလိူၼ်ၼႆႉၼၼ်ႉသေ မၼ်းၼၢင်း လႆႈယူႇၼႂ်းၶွၵ်ႈသေ တိသဵင် ၶေႃႈထတ်းသၢင် ဢၼ်ၵဵဝ်ႇၵပ်း လွင်ႈသိုၵ်ႈသမ်ႇၼိူဝ်ၼၢင်းယိင်း တီႈမိူင်းဢီႇရၢၼ်းၼၼ်ႉယဝ်ႉ။ ၵေႃပွင်ၵၢၼ် သူးရၢင်းဝၼ်း ၼူဝ်ႇပႄႇလ် လႆႈပၼ်သူးရၢင်းဝၼ်း ၼူဝ်ႇပႄႇလ် မၼ်းၼၢင်း မိူဝ်ႈလိူၼ်ဢွၵ်ႇထူဝ်ႇပႃႇ ပူၼ်ႉမႃးၼၼ်ႉယဝ်ႉ။


ငိူၼ်ႈငဝ်ႈတိုၼ်း[edit | edit source]

Retrieved from "https://incubator.wikimedia.org/w/index.php?title=Wn/shn/ၵေႃပွင်ၵၢၼ်သူးရၢင်းဝၼ်း_ၼူဝ်ႇပႄႇလ်_သႄႉသွမ်း_လွင်ႈတိူဝ်းတၢမ်ႇၶွၵ်ႈ_ၸဝ်ႈသူးရၢင်းဝၼ်း&oldid=6308535"