Wn/shn/သတႃးလိင်ႉၶ် လႆႈဝႂ်ဢၼုၺၢတ်ႈ သုၼ်ႇႁဵတ်းၵၢၼ် တီႈ ဢိၼ်ႇတူဝ်ႇၼီးသျႃး

ဝၼ်းၽတ်း၊ မေႇ 9၊ 2024 

ၽၢင်သတႃးလိင်ႉၶ်

ၵၢၼ်ငၢၼ်း သတႃးလိင်ႉၶ် ဢၼ်ပဵၼ်ၵၢၼ် ၵပ်းသိုပ်ႇ ဢိၼ်ႇထႃႇၼႅတ်ႉၶၢဝ်ထိမ်း ဢၼ်ၸၢင်ႈၸႂ်ႉလႆႈတီႈ ဢွင်ႈတီႈၵႆ ဢၼ်ဢမ်ႇမီးလွင်ႈၵွင်ႉဝႆႉတင်း သၢႆၵပ်းသိုပ်ႇၼၼ်ႉ ယၢမ်းလဵဝ် လႆႈဝႂ်ဢၼုၺၢတ်ႈတီႈ မိူင်းဢိၼ်ႇတူဝ်ႇၼီးသျႃးၵႂႃႇယဝ်ႉ။

ၽူႈမီးပုၼ်ႈၽွၼ်းထၢၼ်ႈယႂ်ႇ ၽၢႆႇ ၵၢၼ်ၶၢဝ်ႇ လႄႈ ၵၢၼ်ၵပ်းသိုပ်ႇ ဢိၼ်ႇတူဝ်ႇၼီးသျႃး လႆႈမွၵ်ႇလၢတ်ႈ မိူဝ်ႈၼႆႉဝႃႈ ႁူင်းၵၢၼ်လွင်ႈၵပ်းသိုပ်ႇလၢဝ်ထိမ်း သတႃးလိင်ႉၶ် ဢၼ်ပဵၼ်ၶွင် ဢီႇလွၼ်ႇ မသ်ႉၵ် ၼၼ်ႉ လႆႈထုၵ်ႇၶႂၢင်းပၼ် တႃႇႁဵတ်းၵၢၼ်ယဝ်ႉ ဝႃႈၼႆ။ တီႈမိူင်းဢိၼ်ႇတူဝ်ႇၼီးသျႃးၼႆႉ မီးဝႆႉ ၵုၼ် မိုၼ်ႇၸဵတ်းႁဵင်ပၢႆသေ ၵူၼ်းမိူင်း ၸိူဝ်းဢမ်ႇပႆႇၸၢင်ႈၸႂ်ႉဢိၼ်ႇတႃႇၼႅတ်ႉလႆႈလီလီၼၼ်ႉ မီးဝႆႉႁူဝ်လၢၼ်ႉမၼ်းသေ လူင်ပွင်ၸိုင်ႈ ဢိၼ်ႇတူဝ်ႇၼီးသျႃးၵေႃႈ တိုၵ်ႉၶတ်းၸႂ် တႃႇၵပ်းပၼ်လႆႈ ဢိၼ်ႇထႃႇၼႅတ်ႉယူႇၼၼ်ႉယဝ်ႉ။

Usman Kansong ၽူႈမီးပုၼ်ႈၽွၼ်းထၢၼ်ႈယႂ်ႇ ၽၢႆႇ ၵၢၼ်ၶၢဝ်ႇ လႄႈ ၵၢၼ်ၵပ်းသိုပ်ႇ ဢိၼ်ႇတူဝ်ႇၼီးသျႃး လႆႈမွၵ်ႇလၢတ်ႈ ႁွင်ႈၵၢၼ်ၶၢဝ်ႇ ​ဢေႇဢႅၾ်ႉပီႇဝႃႈ တႃႇႁႂ်ႈၵၢၼ်ငၢၼ်း သတႃးလိင်ႉၶ် ပၼ်ႇလႆႈတီႈ မိူင်းဢိၼ်ႇတူဝ်ႇၼီးသျႃးၼၼ်ႉ ၽၢႆႇႁူင်းၵၢၼ်ၶဝ် ယိုၼ်ယၼ်ပၼ်ယဝ်ႉ ဝႃႈၼႆ။

မၼ်းလၢတ်ႈဝႃး PT Starlink Service Indonesia လႆႈဝႂ်ဢၼုၺၢတ်ႈ တွၼ်ႈတႃႇ ႁဵတ်းၵၢၼ်ၸွႆႈသၢင်ႈ VAST လႄႈ ISP ဝႃႈၼႆယဝ်ႉ။ ယွၼ်ႉၼၼ်လႄႈ တေၸၢင်ႈႁဵတ်းပၼ် ၵၢၼ်ၵပ်းသိုပ်ႇ Telecom တီႈၵုၼ် မိူင်းဢိၼ်ႇတူဝ်ႇၼီးသျႃးယဝ်ႉဝႃႈၼႆ။ တီႈဝဵင်းလူင်မႂ်ႇ Nusantara ဢၼ်သၢင်ႈဝႆႉတီႈ ၵုၼ် Borneo ၼၼ်ႉၵေႃႈ တႄႇဢဝ် လိူၼ်ၼႆႉၵႂႃႇသေ တေတႄႇၸၢမ်းတူၺ်း ၵၢၼ်ၸွႆႈသၢင်ႈၵၢၼ်ၵပ်းသိုပ်ႇလၢဝ်ထိမ်း သတႃးလိင်ႉၶ်ၵႂႃႇယူႇ ဝႃႈၼႆ။

ဝဵင်းလူင်မႂ်ႇ Nusantara ၼႆႉ လႆႈႁၢင်ႈႁႅၼ်းဝႆႉ တႃႇပိုတ်ႇၼႂ်ႈ လိူၼ်ဢေႃးၵၢတ်ႉ ၼၼ်ႉယဝ်ႉ။ ယေးငိုၼ်းၵမ်ႇၽႃႇ လၢတ်ႈဝႆႉဝႃႈ ၼႂ်းၵႃႈ ႁူဝ်ၵူၼ်း 270 လၢၼ်ႉ တီႈ မိူင်းဢိၼ်ႇတူဝ်ႇၼီးသျႃးၼၼ်ႉ တေႃႇထိုင် ပီသုတ်း 2022 ၼၼ်ႉ ၵူၼ်းဢၼ်ၸႂ်ႉလႆႈ ဢိၼ်ႇထႃႇၼႅတ်ႉၼႆႉ မီးယူႇ သၢမ်ပုၼ်ႈသွင်ပုၼ်ႈ ဝႃႈၼႆယဝ်ႉ။

တီႈဢေးသျႃးၼႆႉ မိူင်းဢၼ်ဢဝ်လႆႈ ၵၢၼ်ၸွႆႈသၢင်ႈၵၢၼ်ၵပ်းသိုပ်ႇလၢဝ်ထိမ်း သတႃးလိင်ႉၶ် ယူႇယၢမ်းလဵဝ်ၼႆႉ ပဵၼ်တီႈ မိူင်းမလေးသျႃး ဢၼ်တႄႇၸႂ်ႉလႆႈ မိူဝ်ႈပီ 2023 လႄႈ မိူင်းၾီလိပ်ႈပိၼ်း ဢၼ်တႄႇၸႂ်ႉလႆႈ မိူဝ်ႈပီ 2022 ၼၼ်ႉယဝ်ႉ။

ငိူၼ်ႈငဝ်ႈတိုၼ်း

• Ananda Teresia. "SpaceX's unit Starlink secures Indonesia operating permit" — Reuters, May 9, 2024
• AFP News. "Indonesia grants license to Musk’s SpaceX unit Starlink, to provide internet to remote areas" — South China Morning Post, May 9, 2024
• AFP News. "Elon Musk's Starlink granted licences to operate in Indonesia" — The Jakarta Post, May 9, 2024