Wn/shn/ပၢင်လိူၵ်ႈတင်ႈ ရတ်ႈသျႃး 2024

ဝၼ်းသုၵ်း၊ ၾႅပ်ႇဝႃႇရီႇ 2၊ 2024 

ႁေႃၶရႅမ်လိၼ်ႇ

ဝၢႆးသေ လႆႈၶဝ်ႈတိုၵ်း ယူႇၶရဵၼ်း မိူဝ်ႈပူၼ်ႉမႃး ၸမ်သွင်ပီၼၼ်ႉသေ ယွၼ်ႉပိူဝ်ႈ ဢူၺ်းလီ ယူႇၶရဵၼ်းလႄး ရတ်ႈသျႃးၼႆႉ လႆႈပဵၼ်မိူင်း ဢၼ်ထုၵ်ႇၺႃးတၢမ်ႇဢိုတ်းႁႄႉသေပိူၼ်ႈ ၼၼ်ႉယဝ်ႉ။ ၽၢႆႇပၢႆးမၢၵ်ႈမီးၵေႃႈ လႆႈတိူဝ်ႉၶိူၵ်ႈသေ ယၢမ်းတေႃႈလဵဝ်ၼႆႉ မၼ်းပဵၼ် ဢၼ်လႆႈတိူဝ်းၸမ်ၵၼ်ၵႂႃႇတင်း မိူင်းႇၶႄ ဢၼ်ပဵၼ် မိူင်းၵႃႉၶၢႆၵုၼ်ႇတေႃႇၵၼ်ၼၼ်ႉယဝ်ႉ။

ၽူႈထတ်းသၢင်ႈၶဝ်ႁၼ်ထိုင်ဝႃႈတႄႉ ၼႂ်းၵႃႈလွင်ႈငိုၼ်းၾိူဝ်း သုင်ႁႅင်းယူႇၼႆႉ တီႈ ပၢင်လိူၵ်ႈတင်ႈ 2024 ၼႆႉၵေႃႈ ၸွမ်ၸိုင်ႈပူႇတိၼ်ႇ တေဢမ်ႇလႆႈၽႃႈဢၢမ်းၼၢတ်ႈ ၼႆယဝ်ႉ။ ၸိူဝ်းပဵၼ် ၽၢႆႇၶဵင်ႇတႃႉၵၢၼ်မိူင်းမၼ်းၸိူဝ်းၼႆႉ တေတူၵ်းၶွၵ်ႈႁိုဝ်၊ တေႁၢႆႁိုဝ် တေတၢႆႁိုဝ်ၼႆ ပဵၼ်ၵႂႃႇယူႇသေလွင်ႈလွင်ႈယဝ်ႉ။

“ပၢင်လိူၵ်ႈတင်ႈ တီႈ ရတ်ႈသျႃးၼႆႉ မၼ်းတိုၼ်းၵုမ်းၵမ်ဝႆႉႁႅင်းႁႅင်း ၸဵမ်မိူဝ်လႂ်ယဝ်ႉ“ ၼႆ ဢႃးၸၢၼ် သႃႇၵေးရတ်ႉၶျၼ်ႇၵူဝ်ႇ ဢၼ်ပဵၼ် ၶူးၽၢႆႇပိုၼ်းသူဝ်ႇဝီႇယႅတ်ႉ တီႈၸၼ်ႉၸွမ်ၵျွၼ်ႇႁေႃႉၵိၼ်း ၼၼ်ႉ မွၵ်ႇလၢတ်ႈဝႃႈၼၼ်ယဝ်ႉ။ သင်ၸိူဝ်ႉဝႃႈ ပူႇတိၼ်ႇ ၶိုၼ်းသိုပ်ႇဢွင်ႇပႄႉၵႂႃႇထႅင်ႈ တႃႇ ႁူၵ်းပီၼႆၸိုင် “လူင်ပွင်ၸိုင်ႈရတ်ႈသျႃးၼႆႉ တေသိုပ်ႇမိူၵ်ႈႁၢႆႉတီႈ ယူႇၶရဵၼ်ႈၵႂႃႇထႅင်ႈသေ တီႈၼႂ်းမိူင်းၵေႃႈ တေတိူဝ်းတိုဝ်းၵမ် လၢႆးငၢၼ်းၸဝ်ႈဢၢမ်းၼၢတ်ႈၼၼ်ႉယဝ်ႉ“ ဝႃးၼႆ။

ၵပ်းၵၢႆႇလူၺ်ႈ ပၢင်သိုၵ်းတင်း ယူႇၶရဵၼ်းၼၼ်ႉ တေလႆႈ လွင်ႈဢွင်ႇမၢၼ်ထၢၼ်ႇႁိုဝ် ဢၼ်ဝႃႈၼၼ်ႉတႄႉ မၼ်းတေဢိင်ၼိူဝ်ဝႃႈ တီႈဢမေႇရိၵၢၼ်ႇ ၸွမ်ၸိုင်ႈလႂ် တေၶိုၼ်ႈမႃး ဢၼ်ဝႃႈၼၼ်ႉယဝ်ႉ။ မိတ်ႇသတႃႇရတ်ႉၶျၼ်ႇၵူဝ်ႇ လၢတ်ႈဝႃႈတႄႉ ပေႃးဝႃႈ ၸွမ်ၸိုင်ႈပၢႆႇတႅၼ်ႇ ထုၵ်ႇလိူၵ်ႈၶိုၼ်းထႅင်ႈၼႆ “မၼ်းၼႆႉ တေဢဝ်ၵၢၼ်သိုၵ်းသေ သိုပ်ႇႁဵတ်း တႃႇႁႂ်ႈလႆႈ လွင်ႈဢွင်ႇမၢၼ်သေၸိူဝ်ႉသေဢၼ်ယူႇ“ ဝႃႈၼႆ။ “ထႅင်ႈၽၢႆႇၼိုင်ႈၵေႃႈ သင်ဝႃႈ ထရၢမ်ႉဢွင်ပႄႉၵႂႃႇၼႆၸိုင် မၼ်းတေ ပွႆႇၽႃႈယူႇၶရဵၼ်းသေ တေၵႄႈလိတ်ႈလွင်ႈသုၵ်ႉယုင်ႈၼႆႉ ၸွမ်းၼင်ႇ လွၵ်းလၢႆးရတ်ႈသျႃး လၢတ်ႈႁိုဝ် ဢၼ်ဝႃးၼၼ်ႉတႄႉ တေပဵၼ် ၶေႃႈထၢမ်လူင်ဝႆႉယူႇ“ ဝႃႈၼႆယဝ်ႉ။

ၸိူဝ်းပဵၼ်ဢမၢတ်ႈသၽႃးတႂ်ႈ ထရၢမ်ႉၼၼ်ႉၵေႃႈ ၸိူဝ်းပဵၼ် ၸုမ်းဢူၺ်းလီၶဝ်ၵေႃႈ ဢမ်ႇပေႃးၶႂ်ႈၸႂ်ယၢဝ်းမႃးၼိူဝ် လွင်ႈယူႇၶရဵၼ်းၶဝ် ၼၢၼ်းၶိုၼ်ႈၼႃႈမႃးၼၼ်ႉသေ ထတ်းသၢင်ဝႃႈ “ၽၢႆႇပူႇတိၼ်ႇၵေႃႈ မၼ်းၶဝ်ႈၸႂ် တႃႇဢဝ် ၸုမ်းဢူၺ်းလီ မိူင်းဝၼ်းတူၵ်းသေ လဵၼ်ႈၶိုၼ်းတင်း မိူင်းႁူမ်ႈတုမ်ဢမႄႇရိၵ ၼၼ်ႉယူႇ“ ဝႃႈၼႆယဝ်ႉ။

ၸွမ်းလူၺ်ႈၵူတ်းမၢႆ ဢၼ်လုၵ်ႉတီႈ သၽႃးဢမႄႇရိၵၢၼ်ႇ လႆႈၽွမ်ႉၸႂ် မိူဝ်ႈ တီႇသႅမ်ႇပႃႇ 2023 ၼၼ်ႉ ဝႃႈဝႆႉဝႃႈ တွၼ်ႈတႃႇတေထွႆတပ်ႉဢမႄႇရိၵၢၼ်ႇ တီႈ ၼေႇတူဝ်းၼၼ်ႉ တေလူဝ်ႇ လွင်ႈၽွမ်ႉၸႂ်သၽႃးၼိူဝ် ၼႆယဝ်ႉ။ ပေႃးပဵၼ်ၼႆတႄႉ ႁူမ်ႈဝႃႈ ၸွမ်ၸိုင်ႈထရၢမ်ႉ ဢွင်ႇပႄႉထႅင်ႈၵမ်းၼိုင်ႈသေတႃႉၵေႃႈ ၼင်ႇမၼ်းယၢမ်ႈလွၵ်ႇငိူတ်ႈဝႆႉဝႃႈ တႃႇဢဝ်လွင်ႈတႅပ်းတတ်းမၼ်းၵေႃႉလဵဝ်သေ တေၶိုၼ်းထွႆတပ်ႉဢမႄႇရိၵၢၼ်ႇ ၵႃႈတီႈ ၸုမ်းၼေႇတူဝ်းဢၼ်ဝႃႈၼၼ်ႉ မၼ်းဢမ်ႇႁဵတ်းလႆႈ။ ၵူၺ်းၵႃႈဝႃႈ ပေႃးၵဵဝ်ႇၵပ်းလူၺ်ႈ ၸုမ်းၼေႇတူဝ်းၼႆ ၸွမ်ၸိုင်ႈထရၢမ်ႉၼႆႉ မၼ်းဢမ်ႇမီးလွင်ႈယုမ်ႇယမ်လႄႈ ၸွမ်းၼင်ႇ ပူႇတိၼ်ႇၶႂ်ႈပဵၼ် ဢၼ်ႁႂ်ႈမီးသၢႆငၢႆ၊ လွင်ႈပႅၵ်ႇပိူင်ႈ ၼႂ်းၵႄႈ ဢမႄႇရိၵၢၼ်ႇလႄႈ ၸုမ်းဢူၺ်းလီ မိူင်းဝၼ်းတူၵ်းၼၼ်ႉၵေႃႈ ၸၢင်ႈပဵၼ်မႃးလႆႈယူႇ။

ငိူၼ်ႈငဝ်ႈတိုၼ်း

• VOA. "၂၀၂၄ ရုရှား ရွေးကောက်ပွဲ" — VOA, February 2, 2024