Wn/shn/တီႈ ပၢင်ၽိုၵ်းၵၢၼ်သိုၵ်း ငူးႁဝ်ႇၶမ်း ၼၼ်ႉ မိူင်းမျၢၼ်ႇမႃႇ ဢမ်ႇလႆႈၶဝ်ႈပႃးၸွမ်း

ဝၼ်းၸၼ်၊ ၾႅပ်ႇဝႃႇရီႇ 26၊ 2024 

ပၢင်ႈၵႅဝ်ႈ ပိုတ်ႇၽုၺ်ႇ ပၢင်ၽိုၵ်းၵၢၼ်သိုၵ်း Cobra Gold ပီ 2010 (ၶႅပ်းႁၢင်ႈၵဝ်ႇ)

Jirayu Houngsub ဢၼ်ပဵၼ် ၽူႈမီးသုၼ်ႇလၢတ်ႈ ၽၢႆႇ ထၢၼ်ၽွင်းလူင်ၵၢၼ်ၵႅတ်ႇၵင်ႈ မိူင်းထႆး လႆႈမွၵ်ႇလၢတ်ႈဝႃႈ တႄႇဢဝ် ဝၼ်းထိ 26 လိူၼ်ၼႆႉ တေႃႇထိုင် လိူၼ်မၢတ်ႉၶ်ျ 8 ဝၼ်းၼၼ်ႉ တေၸတ်းႁဵတ်းၵႂႃႇ “လွင်ႈၽိုၵ်းၵၢၼ်သိုၵ်း ငူးႁဝ်ႇၶမ်း“ Cobra Gold 2024 ဢၼ်ပဵၼ် လွင်ႈၽိုၵ်းၵၢၼ်သိုၵ်း ဢၼ် ထႆးလႄႈ ဢမႄႇရိၵၢၼ်ႇ ႁူမ်ႈၵၼ်ႁဵတ်း ဢၼ်ႁိုင်သေပိူၼ်ႈ လႄႈ ဢၼ်ယႂ်ႇသေပိူၼ်ႈ တီႈၼႂ်း ဢေးသျႃးၸဵင်ႇၸၢၼ်းဝၼ်းဢွၵ်ႇ ၼႆႉ ဝႃႈၼႆယဝ်ႉ။ တီႈ လွင်ႈၽိုၵ်းၵၢၼ်သိုၵ်း ဢၼ်တေႁဵတ်း ႁိုင် တႃႇ 12 ဝၼ်းၼၼ်ႉ လုၵ်ႉတီႈ မိူင်း 30 မိူင်းသေ ၽူႈမီးၸၼ်ႉ ၸမ် မွၵ်ႈ 10,000 ၵေႃႉ တေၶဝ်ႈႁူမ်ႈပႃးသေတႃႉ ဢမ်ႇလႆႈမွၵ်ႇပႃး တပ်ႉသိုၵ်းမၢၼ်ႈ ဝႃႈၼႆ။ တႄႇဢဝ် ပီ 2013 မႃးသေ မျၢၼ်ႇမႃႇၼႆႉ ၶဝ်ႈပႃးပဵၼ်ၼင်ႇ ၵူၼ်းလဵပ်ႈႁဵၼ်းမႃးသေတႃႉ တႄႇဢဝ် ပီ 2021 ယၢမ်းယိုတ်းဢႃႇၼႃႇယဝ်ႉသေ တပ်ႉသိုၵ်းမၢၼ်ႈ ဢမ်ႇမီးသုၼ်ႇတႃႇၶဝ်ႈပႃးမႃးယဝ်ႉ။

တီႈ လွင်ႈၽိုၵ်းၵၢၼ်သိုၵ်း ငူးႁဝ်ႇၶမ်း ဢၼ်ဢဵၼ်ႁႅင်းတပ်ႉသိုၵ်း ၶဝ်ႈပႃး တဵမ်တဵမ်ထူၼ်ႈထူၼ်ႈၼၼ်ႉ တႃႇပီၼႆႉ ၸိူဝ်းပဵၼ် တပ်ႉသိုၵ်း ၶႄႇ လႄႈ ဢိၼ်းတီးယႃး ၶဝ်ၸိူဝ်းၼႆႉၵေႃႈ တေၶဝ်ႈပႃးသေ တေႁူမ်ႈၵၼ်ၽိုၵ်း တွၼ်ႈတႃႇ ၵၢၼ်ပၼ်တၢင်းၸွႆႈထႅမ် လွင်ႈၵူၼ်း ၼႆယဝ်ႉ။ တၢင်းယိူင်းဢၢၼ်း လွင်ႈၽိုၵ်းၵၢၼ်သိုၵ်းၼႆႉ ပဵၼ်တွၼ်ႈတႃႇ လွင်ႈၵပ်းသိုပ်ႇၵၢၼ်သိုၵ်း တီႈၼႂ်းၵႄႈ ၸုမ်းဢူၺ်းလီၵၼ် ဢၼ်ၶိုပ်ႈၼႃႈၶိုၼ်ႈယႂ်ႇမႃးႈလႄသင်၊ တီႈသၢႆငၢႆၶိုၵ်ႉၶၢၵ်ႉ ၵူႈမဵဝ်းမဵဝ်းၼၼ်ႉ ႁႂ်ႈမေႃႁူမ်ႈၵၼ်သေ ႁဵတ်းသၢင်ႈ တီႈ ၵၢၼ်ငၢၼ်းၵူႈၽၢႆႇ လႄႈသင်၊ ႁႂ်ႈမီးၼမ်ႉၵတ်ႉ ႁႅင်းယႂ်ႇ တီႈႁူမ်ႈၵၼ်ႁဵတ်းသၢင်ႈ လႄႈ ပဵၼ်တႃႇၽိုၵ်းၵၢၼ်တူဝ်ထူပ်း ဢၼ်မီးၸွမ်းၼင်ႇ ပၵ်းပိူင်မၢႆမီႈ တပ်ႉသိုၵ်းၵူႈမိူင်းမိူင်းၼၼ်ႉယဝ်ႉ။ တီႈလွင်ႈၽိုၵ်းၵၢၼ်သိုၵ်းပိူင်လူင် ဢၼ်တေၶဝ်ႈပႃး ဢဵၼ်ႁႅင်းတဵမ်ၼၼ်ႉ ၸိူဝ်းပဵၼ် ၵူၼ်းသိုၵ်း သိင်ႇၵႃႇပူဝ်ႇ၊ ဢိၼ်ႇတူဝ်ႇၼီးသျႃး၊ ၵျႃႇပၢၼ်ႇ၊ ၵၢဝ်းလီၸၢၼ်း လႄႈ မလေးသျႃး ၶဝ် တေၶဝ်ႈပႃး 4 ႁဵင်ပၢႆ ဝႃႈၼႆယဝ်ႉ။

လွင်ႈၽိုၵ်းၵၢၼ်သိုၵ်း ဢၼ်ၸတ်းႁဵတ်းပီၼႆႉၼႆႉ ထူၼ်ႈထိုင် ပွၵ်ႈၵမ်း 43 သေ၊ လွင်ႈၵပ်းသိုပ်ႇသိူၵ်ႈသမ်ႇ မိူင်းသွင်မိူင်း မိူင်းထႆး လႄႈ မိူင်းဢမႄႇရိၵၢၼ်ႇ ၶဝ် ထူၼ်ႈတဵမ် 190 ပီ ၵေႃႈၸႂ်ႈယဝ်ႉ။ လွင်ႈၽိုၵ်းၽွၼ်ႉၵၢၼ်သိုၵ်းၼၼ်ႉတေႁဵတ်း တီႈ လၢႆဢွင်ႈလၢႆတီႈ တီႈၼႂ်းမိူင်းထႆး တေၶဝ်ႈပႃး ၸႄႈမိူင်း လူပ်းပူးရီး၊ ၸၼ်ထပူးရီး၊ သရႃႇၵႅဝ်ႈ လႄႈ ရယွင်း ၸိူဝ်းၼႆႉယဝ်ႉ။

ငိူၼ်ႈငဝ်ႈတိုၼ်း

• VOA News. "နိုင်ငံပေါင်း ၃၀ ပါ၀င်မဲ့ Cobra စစ်ရေးလေ့ကျင့်မှု မြန်မာ ပါ၀င်ခွင့်မရ" — VOA News, February 26, 2024
• The Nation (Thailand). "Cobra Gold war exercises practice response to cyber and space threats" — The Nation (Thailand), February 27, 2024