Wn/scn/Scioti pi mafia setti cumuni d'Italia

venniridìa 24 di marzu 2012

Scioti pi mafia setti cumuni d'Italia. Lu Cunzigghiu dê Ministri talianu dilibbirau aieri sicunnu quantu dispostu di l'art. 14 dô D.Lgs. 267/2000 lu sciugghimentu pi nfiltrazzioni mafiusi di setti cumuni taliani. Si tratta di dui cumuni siciliani Salemi (amministratu di Vittoriu Sgarbi) e Racalmutu, di dui cumuni campani Pagani e Gragnano, di dui cumuni calabbrisi Bova Marina e Platì e di un cumuni piamuntisi Leinì (ca si va a agghiùnciri a l'àutri tri cumuni scioti ntô nord Italia).

La dicisioni fu prisa supra la basi dê rilazzioni dê vari prifetti cumpitenti ca riscuntraru la prisenza di l'organizzazzioni criminali ô nternu di l'amministrazzioni pùbblichi, cu nfluenzi ca jìvanu dô sitturi appalti pùbblici ê cuncissioni e auturizzazzioni amministrativi). Ora vèninu numinati, cu dicretu dô Prisidenti dâ Ripùbblica taliana, li vari cummissioni straordinari ca guìdanu l'enti pê pròssimi 18 misi prorugàbbili finu a un màssimu di 24 misi.

Sempri d'aieri la nutizzia ca lu guvernu ntenni estènniri lu criteriu di sciugghimentu macari a li cumuni e a li pruvinci ca nun s'adòpiranu adiguatamenti contra la curruzzioni. Lu Ministru dâ Giustizzia, Pàula Severino, annunzia ca lu pruvvidimentu è prisintatu â Càmmara ntra la fini di marzu.

Fonti

• «Consiglio dei Ministri n. 20 del 23/03/2012» – www.governo.it, 23 di marzu 2012
• Rinu Giacalone, Luciu Musolino e Neddu Trocchia «In un solo giorno il Consiglio dei ministri scioglie sette comuni per mafia» – il Fatto Quotidiano, 23 di marzu 2012
• «Sciolti sette comuni per mafia – C'è anche Salemi e Leinì» – Libero, 23 di marzu 2012
• «Sette Comuni sciolti per mafia – C'è anche quello di Sgarbi» – l'Unità, 23 di marzu 2012
• Rinu Giacalone «Salemi, il comune di Vittorio Sgarbi sciolto per mafia» – il Fatto Quotidiano, 23 di marzu 2012
• Firrucciu Sansa e Carlu Tecce «La corruzione come l’infiltrazione mafiosa – Così la prefettura potrà sciogliere il Comune» – il Fatto Quotidiano, 23 di marzu 2012