Wn/scn/Li cani turnati sarvaggi custrìncinu ê siciliani ô coprifocu
mercuridìa 18 di marzu 2009
Li cani turnati sarvaggi custrìncinu a li siciliani ô coprifocu. Sinu d'aieri, ntô tirritoriu di Scicli, rondi di vuluntari pattùglianu lu circunnariu, dâ plaia di Punta Pisciottu, di Sampieri, finu a Mòdica; lu sò obbiettivu, li cani "vastati", guastati, turnati sarvaggi. Li cani sunnu cacciati câ scupetta, oppuru chê buccuna avvilinati spartuti a lu virdi; l'attruvàrili è difficultusu: l'armali smalizziati s'ammùccianu ntra li sipali nummirusi, o ntê duni di rina friquenti. Ma nun sunnu sultantu li vuluntari a braccari li cani turnati sarvaggi, ma puru Carabbinera e la Guardia Furistali. Ntantu ntâ cuntrata Pisciottu c'è un coprifocu vuluntariu: nun si nesce si nun pi nicissità, e mai di suli.
Lu brancu cchiù piriculusu avissi a èssiri cumpostu di na dicina d'esemplari; affamati e sulidali ntra d'iddi, nun hannu riservi a manciari puru carni umana. Dui di sti belvi foru già ammazzati dê carabbinera, c'àppiru a addifinnìrisi a ràffichi di mitra, avennu addivintatu macari iddi, ê sò occhi, na preda.
La situazzioni scattau nta sti jorna, ma n rialtà lu primu ncidenti è assai antiriuri: lu 16 d'austu na fìmmina sporgi dinunzia pi mùzzichi ê jammi. Di tali data a oi lu bilanciu, ntâ zona, è di tri firiti e un mortu: lu picciriddu di novi anni Giuseppi Misicoro Brafa, aggridutu e sbranatu lu 16; mentri sta luttannu ntra la vita e la morti Marya M., turista tudisca vintiquattrina, aggriduta lu 17.
Fonti
[edit | edit source]- «Modica, nuova aggressione di cani ferita turista tedesca sulla spiaggia» – la Repubblica, 17 di marzu 2009
- Fulvio Milone «I cani killer abbattuti a colpi di mitra» – La Stampa, 18 di marzu 2009
- Natalia Poggi «Randagi, le leggi ci sono ma non vengono applicate» – Il Tempo, 18 di marzu 2009