Wn/scn/Assintiismu ô Cumuni di Riggiu Calabria: 17 dipinnenti arristati e àutri 78 ndagati

From Wikimedia Incubator
< Wn‎ | scnWn > scn > Assintiismu ô Cumuni di Riggiu Calabria: 17 dipinnenti arristati e àutri 78 ndagati
Jump to: navigation, search

martidìa 9 d'aprili 2013

Palazzu San Giorgiu, sedi dô Cumuni di Riggiu Calabria

Riggiu Calabria: la ndàggini dinuminata "Torno Subito" cunnuciuta dô Cumannu Pruvinciali dâ Guardia di Finanza di Riggiu Calabria e coordinata dô Prucuraturi dâ Ripùbblica facenti funzioni, Ottaviu Sferlazza, e dô sustitutu Antunedda Crisafulli, cunzintìu di scummigghiari 95 dipinnenti nfidili dô Cumuni di Riggiu Calabria accusati d'assintiismu e truffa ê dammaggi dô Cumuni. Nta 17 fineru a l'arresti dumiciliari n esicuzzioni di n'ordinanza di custodia cautilari emisa dô Jùdici pê ndàggini priliminari supra dumanna dâ Prucura. Àutri 42 hannu a èssiri ntirrugati dô Gip avennu la Prucura dâ Ripùbblica addumannatu la suspinzioni di l'uffici pùbblici, mentri li ristanti risùrtanu ndagati.

La ndàggini pigghia avvìu n sèguitu â signalazzioni, c'acchiana ô nuvèmmiru dô 2010, mannata â Guardia di Finanza dô Sìnnacu facenti funzioni di tannu Giuseppi Raffa ca nfurmava p'iscrittu lu Cumannanti dô Gruppu ca "presso il Comune di Reggio Calabria ed in particolare all'interno della sede storica ubicata in Palazzo San Giorgio, si erano verificati alcuni episodi di assenteismo del personale dipendente".

Li finanzieri sigueru li dipinnenti passu passu pi un misi esattu, ossìa dô 21 d'aprili ô 21 di maiu 2011. E p'ognidunu d'iddi, a sicunna dô nùmmiru d'episodi e ntâ basi di na nfurmativa dipusitata a marzu passatu, fu cunfizziunatu un capu di mputazzioni spicìficu. Ntâ nfurmativa dê militari sunnu cuntinuti rilazzioni di sirvizziu supra li pidinamenti, fotugrafìi, mmàggini vìdiu cu tantu di telecàmiri piazzati â trasuta di l'uffici e ntê machinetti "marca tissirinu". Ottinennu accussì la prova dô fattu ca n rialtà li badge vinìanu "passati" di culleghi di l'assintiisti. N'opirazzioni c'avvinìa a turnu. Accussì c'era sempri quarcunu ca "timbrava" p'àutri culleghi. A chistu s'agghiuncìa lu fattu ca tanti doppu aviri "marcatu" lu tissirinu turnàvanu a nèsciri senza prubblemi. Li telecàmiri fora dô Cumuni, nfatti, arripigghiaru dicini d'autuvitturi ca si firmàvanu â trasuta pi sosti brevi, giustu lu tempu di timbrari e ripàrtiri.

Fonti[edit]