Wn/nia/Gambara fondrege atua ba gulidanö tesöndra ba Sulawesi

No tesöndra sambua gambara fondrege atua ba gulidanö , ya'ia da'ö gambara zökha, nisöndra ba dögi Leang Tedongnge, Sulawesi. Gambara andrö tefazökhi 45.000 fakhe si lalö. Molo'ö Maxime Aubert, sanura ba jurnal ilmiah Science Advances, "Niha sogambaraini gambara andrö no modern sibai, hulö zimane ya'ita, no so khöra wa'atua-tua ba fakake ni'oguna'öra ba wogambaraini gofu hadia zomasi ira."

Ena'ö tola lasöndra hawa'atua gambara andrö, ihalö nga'örö gara si no tefazökhi yaŵa gambara, ba aefa da'ö i'oguna'ö nifotöi isotop seri Uranium ba wangi'ila hawa'atua ia.

Tenga ha da'a gambara satua nisöndra ba nahia andre. Me Desember 2019 no lasöndra göi gambara tanö bö'ö ba dögi Leang Bulu' Sipong 4, ya'ia da'ö gambara anoa nigohi ndra saulu si matonga niha matonga aurifö. Ndröfi gambara andrö 44.000 fakhe tola ambö töra. Nahia andre so ba gölöa Karst Maros-Pangkep, Sulawesi Selatan.

Umbu: Lukisan hewan tertua di dunia ditemukan di Sulawesi, diyakini berusia 45.500 tahun, BBC Indonesia, mufaigi 14/01/2021.