Jump to content

Wn/lmo/Lombardia zòna gialda

From Wikimedia Incubator
< Wn‎ | lmo
Wn > lmo > Lombardia zòna gialda

L’è oramai de pressappòch des dì che ‘l se drée a dì, soratùtt le diss el nòster presidént regionàl Attilio Fontana. I parametri de la Lombardia quant a la pandemìa de COVID-19 a hinn de zòna gialda, ancabén gh’hèmm de spettà on quàj dì anmò per vèss offiziál. I dati di contagiàa paren bon, degià che i hànn segutàa a‘ndà giò tant coi provvedimént del 3 november, quant adrée a smolladura di misùr el 4 de dicember quand che l’è stada deciduda la zòna naránz.[1] A gh’è de spettàss donca, che giamò per el fin de quèlla setimana chì la sarà possìbil de moeuvess in tutta la región senza ‘vègh besògn de portàss adrée l’autocertificazión necessaria fin del prenzippi del mes de november. El president Attilio Fontana, el qual giamò in di temp indrée l’è stàa minga tròpp content di saradùr, e in pratega l’è stàa obligà a faj domà quant che ‘l podevà nò scusà senza, el voeur anmò che la Lombardia la venga dervida e ch’a se faga a la svèlta degià che ‘l Natal l’è ‘drée a vegnì e l’impàtt sora el commèrcio ligàa a i saradùr el s’è giamò fa assée sentì. Defàtt con la zòna gialda, tucc i cittadìn i podarànn spostàss e andà in di negòzzi foeura che in di dì de fèsta e ‘l dì innánz, e financa i bar e i ristorànt i podarànn dervì de noeuv ancabén segónd on orari ridòtt e de sicùr el restarà el coprifuòco in del cors di or de la nòtt.[2] Se gh’è de vèss contént per el passàgg a la zòna gialda, diversamént a ghe sarìss de pensà a quèll che ‘l podarà vèss l’impàtt sora la curva di contagiàa. Degià che l’è vèra che i contàgg hinn andà giò[3] ma se pòden nò tegnì in cunt i dati di noeuv contagiàa, quèj che de spèss s’hèmm sòlit a savè de la televisión, senza considerà anca el nùmer di tamponi e domà i dati giornadér di contagiàa quand che el numer de tamponi l’è compàgn i pòden vèss confrontà in primma analisi. A vardà i dati de sti ultìmm dì, se accòrgiom, che, de tucc i manér i contagiàa hinn adrée a’ndà giò, ma minga inscì a la svèlta de vèss sicùr che la vaga ben anca con la zòna gialda. In fin di cunt, tanti di región ch’i éren sòta el regìmm de la zòna gialda hinn passàa poeu sòta di regìmm almànch de zòna narànz, el caso ciar come ‘l sol l’è sta quèll de la Campania. A la fin de la fera, gh’hèmm donca de vèss contént per el passàgg a la zòna gialda ma de fàgh attenzión ‘chè ‘l rappòrt tamponi/contagiàa l’è anmò tròpp alt e desmenteghémess minga che’l COVID l’è stàa nananmò vinciùu e l’evoluzion futura l’è minga cèrta.

  1. https://web.archive.org/web/20201208205732/https://www.ilgiorno.it/lombardia-zona-gialla-1.5793990
  2. https://web.archive.org/web/20201208163246/https://www.ilgiorno.it/lombardia-zona-gialla-1.5786555
  3. https://achab94.shinyapps.io/covid-19/