Wn/lmo/El temp meteorologich fina al 15 de sgener
|
Quell'articol chì l'è scrivud in lombard, con la Noeuva Ortografia Lombarda |
De ‘sti dì hem vist i temperadure a alzàss soratut in montagna. L’è stad merit de l’anticiclon african che l’ha menad ona condizzion de iregolarità termica forta sora tut el territori de la lombardofonia de la qual quei che stànn de cà in pianura se sarann minga tant incorgiud de via de la scighera. El rivà d’ona massa d’aria sossenn calda sora on territori fregg e senza vent l’ha de fat comportad la formazzion de scighera che l’ha minga permetud, de dì, el riscaldament del soeul. De tucce i manere el tracoll di temperadure el rivarà in tra on quai dì; l’anticiclon african el cedarà de maneman fina al dì de Pasqueta con la discesa d’ona massa d’aria freggia de orisgin artica. Parlem nò de aveniment ecezzionai, almanch per intanta, ma domà del ritorna de l’inverna regolar, con di temperadure on zich sota la media despoeu del ses de sgener, quand che l’anticiclon el cedarà del tut e ‘l lassarà rivà anca ona quai perturbazzion. Facilment el fregg el sarà minga assee de portà la nev in panura, o per el manch de permeter a la nev de tacà, per i zone de collina e montagna la situazzion inveci l’è diversa. Siben che i nevicade sien nananmò sicure e ‘l sia an’mò prest per parlà de l'altezza-nev, se pò sgiamò dì che ‘l period che i podarann vegnì el sarà quell in fra el 8 e ‘l 12 de sgener.