Wn/cdo/CP21魔都同人祭上海落幕

From Wikimedia Incubator
< Wn‎ | cdo
Wn > cdo > CP21魔都同人祭上海落幕
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

【2017年12月13號訊】

CP21其Cosplay

前蜀拜日(12月10號),CP21魔都同人祭著上海新國際博覽中心結束了。

茲蜀回CP21,共以前𡅏同蜀樣,主要有三萆活動:

第一,同人攤位。同人,就是按𡅏原來倛作品,自家再發揮想像力去創作。會展倛同人專區共總有21萆,包括秦風古劍、FATE—迦勒底、陰陽寮、蝴蝶蓝倛世界、東方幻想鄉、靈幻相談所、刀裝·出陣!、布袋戲街、刀劍亂舞online新選組刀劍中心專區、偶像夢幻祭、凹凸世界、我倛英雄學院、冰上倛尤里、守望先鋒、Vocaloid等等。

第二,coser表演。也就是模倣作品裏勢倛角色去頌衣裳、化妝等等。如果coser扮演野好,或者真像原來倛角色,伊自家復願意,固會有儂乞伊䀹像。會展coser野価,䀹像倛也𣍐少,但是䀹完去了,固著「返圖」,就是講圖發乞coser;返圖之前𡅏,著修圖去讓相片固好看,coser乍夠意:故此工作量𣍐嫩。會展落幕以後,微博𡅏有儂做蠻笑講:「拍照一時爽,修圖火葬場。」使福州話去翻譯,應該就是「䀹像野快,修圖野殆」。

第三,週邊抽獎。底儂中獎了,送伊動畫、漫畫、遊戲作品倛週邊商品。

除𡅏以上倛活動,也有很多遊戲廠商參加展會,公開了自家倛新作品。

對中意動畫、漫畫固有遊戲倛儂來講,茲萆會展意義野大。故此遘開會倛時候,野価愛好者愛去參蜀骹。無著上海倛,也搭火車搭飛機,儷為了看遘自家中意倛作品。

消息來源[edit | edit source]