Wn/cdo/閩江學院𣍐讓外賣裏 商家拖蜀車飯無錢罔食

From Wikimedia Incubator
< Wn‎ | cdoWn > cdo > 閩江學院𣍐讓外賣裏 商家拖蜀車飯無錢罔食
Jump to navigation Jump to search
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bāng-buōng.

【2018年11月12號福州訊】

File:2018 Minjiang University Protests.jpg
今旦日中,警察趕遘閩江學院食堂門口

今旦(11月12號)日中,有賣外賣其儂共蜀車其飯拖裏閩江學院,告學生隨便掏,無錢食,總款抗議學校𣍐讓外賣裏其規定。

只幾日網絡懸頂,野価隻閩江學院學生都敆𡅏講只蜀樁事計。按伊各儂其講法,學校要求學生各儂由今旦開始都去食堂食飯,固表示總款做對學生其健康好。

野価學生𣍐滿意,因爲每蜀日上堂或且做實驗,中午都盡去無閒。固加蜀遘日中,食堂儂都是価得很,着等野𣆯,乍食會着。有外賣就野便益了。有學生指出,國慶放假,食堂關門,都是靠外賣。𣍐讓外賣裏,以後𣍐仈蔣做。

規定由前日(10號)開始傳出。遘今旦,學校當真起馬實行。仱中午就有蜀車其飯下去,讓學生無錢罔食。拖車其固講:「今暝晡固有!」

下晝,蜀張微信截圖敆網絡懸頂大傳,講外賣商家乞搦起去,都關敆三區派出所。遘暝晡,學生將囫圇座樓其燈都開去,大聲抗議。有學生䀹了視頻發遘網絡。伊講,遐辰候大家大告:「絕不向惡勢力低頭!」固有儂共應援棒掏𡅏𢪱。

消息來源[edit]

原創報導
這報導有維基記者第一手新聞。可以看討論頁了解詳情。
Wikipedia-logo.png
汝可以敆維基百科𡅏看蜀看共這新聞有關係其條目: