Wn/cdo/豬年新春 福州花團錦簇

【2018年2月10號訊】

林陽寺前斗，椏椏懸頂梅花幾菩

今年春節，福州儂新春看花選擇真価。

于山第十五屆蘭花展由正月初一（2月5號）做遘正月十五（2月19號），都領有5芘部分，也就是國蘭精品、熱帶蘭精品、蘭花景觀小品、蘭花攝影、蘭花書畫。敆山墿墿口，有蘭花景觀小品。白雲寺展出蘭花其書法共畫。太平街展廳有蘭花書畫、相片。蘭花圃有國蘭精品、熱帶蘭精品、蘭花景觀小品、蘭花組合盆栽。只蜀回做蘭花展，固有舊底無擺過其花，比如講國王兜蘭、喇叭唇石斛、黑天鵝蘭，固有「春劍」其美麗之冠、素荷，墨蘭其瑤琳胭脂、江山美人等等。

• 
  森林公園其櫻花
• 
  日頭由箬箬臺中穿過，照𡅏櫻花椏椏，盡像敆𡅏發光
• 
  白色其櫻花
• 
  櫻花𣗬林邊兜，有嫩嫩其湖

除𡅏蘭花，福州國家森林公園固覷會着櫻花。每蜀年1月初遘3月中旬，就是看櫻花其好時間了。公園裏勢櫻花千幾蔸，都是福建山櫻花，吸引野価市民去覷去䀹相。 閩江公園北園其望龍園等等園區，也有福建山櫻花，七百幾蔸。南園主入口附近有百幾蔸。金牛山公園主入口復有百把兩蔸，品種共總有三四十種。

• 
  白牆頭，烏厝瓦，梅園前斗蜀𣗬花
• 
  梅花發遘厝檐前
• 
  梅花𣗬下香噗煙

若是講卜想看梅花，可以去林陽寺，也可以去鼓山梅里景區。梅裏景區其梅花由1月中旬開始開，春節就是盛開其辰候了。

西湖、左海景區有做迎春花展，覷會着水仙花、虞美人、郁金香。

花海公園栽了四千上平方米其虞美人，新春時節也行裏盛花期了。

消息來源

• 张旭; 曹佳明. 春节长假　福州“花花世界”等你来. 福州新聞網. 2019-01-28 [2019-02-10].