Wn/cdo/袋熊快勢拉四角屎?搞笑諾獎講汝聽

From Wikimedia Incubator
< Wn‎ | cdoWn > cdo > 袋熊快勢拉四角屎?搞笑諾獎講汝聽
Jump to navigation Jump to search

【2019年9月17號訊】

袋熊(資料圖)

福州儂做蠻笑都講:「方腸拉四角屎。」想儥遘只句話故有能涯回答蜀萆生物學其問題,佪就是:「袋熊快勢拉四角屎?」華裔博士後派翠西婭·楊,帶𡅏美國佐治亞理工大學胡立德實驗室研究了只萆問題。今年9月12號暝晡,第29屆搞笑諾貝爾獎敆美國哈佛大學桑德斯劇場做晚會,公佈得獎其名單。仱胡立德實驗室掏下今年其搞笑諾貝爾獎其物理學獎。佪伊各儂其研究,得遘世乇結果哩?

袋熊拉四角屎(資料圖)

這袋熊啊,是蜀種生活着澳大利亞其動物。袋熊會拉四角屎,看過盡像做巧克力。全世界也無世乇動物會做總款了。正好有兩頭塔斯馬尼亞袋熊,乞車碰死去。爲𡅏仈轉袋熊快勢會拉四角屎,實驗室共只兩頭袋熊搬去研究,發現原因在於腸道。袋熊大腸其橫截面是生四角其,裡勢四隻角角彈性比較嫩。罔算塞滿滿喏,方腸其形狀㑚有能涯變五分一;仱方腸臺中其部份,形狀會變四分三。屎通過嚽所,介脫水,就變做四角屎。

墿邊牌牌畫了蜀頭袋熊,提醒開車其師父着細膩(資料圖)
熊囝會過街,師父着細膩(資料圖)

只蜀項研究其實野有乇使。下兩日工業界卜想做四角其乇,會參考囇袋熊其四角屎。搞笑諾貝爾獎,就是專門頒乞總款「看過好好笑,其實也讓儂深深思考」其研究。研究這問題其胡立德實驗室,正好稠稠掏下搞笑諾貝爾獎,前蜀回故是2015年。

消息來源[edit | edit source]