Wn/cdo/福州鼓樓前 無錢送春聯

From Wikimedia Incubator
< Wn‎ | cdoWn > cdo > 福州鼓樓前 無錢送春聯
Jump to navigation Jump to search

【2019年1月26號福州訊】

志願者寫春聯其樣式

今旦(1月26號)早頭8點遘11點,福州鼓樓前公園做公益活動,無錢送春聯。

寫春聯其是福州第三中學書畫社、福州屏東中學其學生,固有福建省硬筆書法家協會其成員。

春聯無錢掏,現場野鬧熱。去寫春聯其學生,每蜀隻都有敆厝先寫春聯,差不多10副,帶去現場。但是活動蜀開始,春聯做蜀下就乞搶掏一空了。介好學生各儂固拍印了蜀張紙,懸頂有各色各樣其春聯,句句都盡去野吉祥,讓市民隨便揀。市民想好卜挃什乇,就排隊掏紙。紙掏遘,介討中意其學生寫。有其徛桌桌前首,盯𡅏覷志願者其筆,野安靜;有其誇學生「寫野好」,講自家比起拍印其春聯固中意寫其,固對邊兜其儂講:「我看伊字盡好乍揀伊。」春聯寫好,市民講謝,就會使掏𡅏春聯離開了。但是這辰候墨固未燋,有其儂就討無儂行其所在,舒開春聯繼續曝。卜11點,紙都無了,固有市民去隔壁厝其店頭買紙,介讓學生寫。

福州三中力行志願者隊其學生志願者維持現場其秩序。

消息來源[edit]

原創報導
這報導有維基記者第一手新聞。可以看討論頁了解詳情。