Wn/cdo/福州江濱放煙花 做燈光秀 慶祝中華人民共和國成立70週年

From Wikimedia Incubator
< Wn‎ | cdoWn > cdo > 福州江濱放煙花 做燈光秀 慶祝中華人民共和國成立70週年
Jump to navigation Jump to search

【2019年10月1號福州訊】

昨暝,福州江濱放煙花,慶祝中華人民共和國成立70週年。煙花各種各色,放了半點鐘,分5隻篇章。頭蜀隻是《70年讚歌》。音樂是《歌唱祖國》。「1949-2019」其字做其共火蜀樣,出現着天懸頂。接下紅色其「70」隨著各色其煙花飛上去,只蜀回焰火晚會就開始了。第2篇是《有福之州,幸福之城》。隨著《天下福地,最美福州》其音樂,白鴿飛過天空,綻放出福州其市花——茉莉花。接下拍出「中國福建」「有福之州,幸福之城」其字,福州元素蜀隻接蜀隻其出現。第3篇號𡅏《生態福建,絲路揚帆》,天懸頂出現綠色、紅色、藍色等等顏色其煙花陣,各色其煙花組成蜀隻蜀隻其彩虹橋。接落來出現蜀隻復蜀隻其篤讚其手勢,故有文字「一國兩制,兩岸一家親」。第4篇章號𡅏《不忘初心,牢記使命》,音樂是《不忘初心》。天懸頂拍出「不忘初心,牢記使命」其字。第5篇《我共我其祖國》。隨着同名其歌曲,做出立柱共江面五角星其造型。故有紅色其禮花彈,放遘滿天都是。故出現「祖國萬歲」4字。

敆海峽金融商務區,閩江兩邊22隻大廈其外首其牆懸頂,也播出獻禮專題片。分《序曲》《有福之州》《幸福之城》《奮進福州》《尾聲》5萆部分。每蜀萆部分都配了儥蜀樣其音樂,有其是福州特色其音樂。故有使遘光景藝術手法共裸眼3D技術。燈光秀片長10分鐘。中國國慶節期間,每蜀暝晡演5回。

消息來源[edit]