Wn/cdo/福州倉山頭蜀屆廟會季開幕

【2018年2月25號訊】

今旦（25號）是正月初十。下晝，福州倉山頭蜀屆廟會季開幕。雖然著𡅏逿雨，固是有野価市民先遘小食區躒蜀躒、看蜀看。

廟會季時間是每蜀日下晝3點遘暝晡9點。暝晡8點半，儂就無辦法行裏了。廟會季做遘3月2號（也就是正月十五）結束。

廟會季主會場敆閩江公園南園段。租塊分了野価區域：小喫區、工藝區、展演區、採購區、燈謎區、專場區。小喫區賣碎食，也賣其他野好食倛乇，比如講魚丸、鼎邊糊、蠣餅、禮餅、光餅、𥻵等等福州美食，蚵仔煎、凍酸奶等閩南、臺灣風味，固有長沙脆皮臭豆腐、蒙古肉串、西安肉夾饃、雲南竹筒飯、韓國醬汁鐵板豆腐、新西蘭鐵板牛排，等等。昨暝（24號）開始，會場就著𡅏逿雨。但是昨暝下晝固是有野価市民先遘小喫區躒蜀躒、看蜀看，卜想先了解明旦賣什乇好食倛乇。工藝區倛攤位種類野豐富，有捏儂囝倛、畫糖畫倛，有做索麵、燕皮倛，固有陶藝共茉莉花茶。展演區就是舞龍、拍獅馬倛活動。採購區賣本地倛農副產品、海產品、手工藝品。燈謎區𡅏準謎，會準唻著就送禮。專題區有各種專題活動，比如講書畫專題、或者無錢頌𡅏漢服䀹全家福倛專題活動。