Wn/cdo/五區花燈點亮元宵之夜八一七路復有燈光狂歡

【2018年3月2號福州訊】

今旦（2號）是元宵節。今年倛福州元宵燈會，也遘了最後蜀日。6點以後，天慢慢暗去，燈紛紛開起。野価市民摒家出門，遘燈會逛蜀逛，感受春節餘溫。茲蜀回燈會敆鼓樓、臺江、倉山、晉安、馬尾都有展區。

鼓樓倛主展區敆五一廣場共溫泉公園。溫泉公園裏勢，第一長倛燈組有40米，嚽是「海底世界」燈組。燈組臺中有五顏六色倛鯨魚、海豚、八爪魚，造型𣍐蜀樣。敆八一七路、鼓屏路墿邊，比如講鼓樓區第一中心小學校門前兜，也有小型花燈組。

五一廣場倛「美好生活、有福之州」花燈
溫泉公園噴泉池懸頂倛花燈
鼓一小校門前兜倛花燈

晉安區倛花燈區域是鶴林路共潭橋路，主題是「新時代·新晉安」。牛崗山公園新起𣍐𣆯，附近很多地方都是居民區。天色固未暗，就有市民出來散步看燈。共鼓樓區𣍐蜀樣倛是，晉安區倛燈組大部分是紅色。但是也有晉安倛代表景點——鼓嶺，使蜀點綠色讓儂耳目一新。墿邊𣗬懸頂也有彩燈。時間罔遲，出來看燈倛市民也罔価。

蓮花花燈
「走進新時代」（行裏新時代）花燈
鼓嶺花燈

臺江區倛花燈設敆閩江大橋遘鰲峰大橋倛北江濱中大道。花燈排了1.5公里，有「上下杭」「閩江」「十番伬」等等主題，體現了臺江區倛歷史文化。趁上下杭遘閩江，十番倛聲仿佛就敆耳邊。臺江儂傍水而居，今旦倛花燈也無辦法離開水。蜀片藍色照𡅏粼粼江水，附近倛高樓鱗次櫛比，骹下江濱大道五彩繽紛。有市民講，最近做燈會，會看彩燈，也會看風景，敆平常開車倛馬墿懸頂行墿，盡去野高興。

臺江展區花燈拱門
「海絲神韻」花燈
「臺江領航」花燈

倉山區倛展區比較分散，敆南江濱公園休閒道左右兩邊、飛鳳山公園入口、九龍壁公園倛大榕𣗬下底、榕城廣場、金環社區都有。除𡅏有倉山當地特色倛傳統文化燈組——比如茉莉花茶，固有小黃人、灰姑娘等等動畫角色倛燈組。墿邊𣗬懸頂都是彩燈，齊開燈倛時候，江面映出彩光，共對面臺江展區倛燈光交相輝映。伴隨閩江南岸高樓燈光，幾座大橋倛燈光也開始變化。閩江真像光帶，流過茲蜀座城市倛中間，照光茲蜀座城市倛暝晡。

水晶鞋花燈
動畫電影《神偷奶爸》倛小黃人花燈

馬尾區舉辦倛，是第16屆「兩馬同春鬧元宵」燈會。敆馬尾東江濱公園，50幾座大嫩燈組沿江排開。遘6點左右，安保人員開始封墿，遊客敆馬墿𡅏罔行罔看。主題燈組造型多樣，有馬尾地標羅星塔、閩安樓，固有馬祖倛坑道、古厝、神像等等。卡通燈組比如十二生肖、犬形燈，吸引了野価伲囝哥徛邊兜共花燈齊䀹相。活動同時也送了蜀批花燈乞馬祖。

「第十六屆兩馬同春鬧元宵」
花燈長廊
羅星塔花燈
表現馬祖芹壁石厝倛花燈
黃犬也來慶祝新年
「節節高」花燈

今旦暝晡6點開始，八一七路也有燈光秀。墿邊開起彩燈，蜀條街野光祥，野価儂掏出手機䀹相，有倛專門脢䀹相機來䀹。8點，燈光秀也遘了高潮，大型音響設備開始播放電音，躁動倛音樂將春寒逐出去，人群不約而同開始舞動。幾萬隻儂趁七處築裏，歡呼聲響徹夜空。鬧熱倛空氣趁東街口沿中軸線躃遘南邊去，滿塊散開。活動遘半度暝0點結束。