Wn/cdo/「活𡅏就是纏儂骹」女界自殺 總經理被告職場欺凌
【2018年10月18號訊】
日本有蜀隻女界自殺，時年30歲，在生時候共蜀隻遊戲業招聘廣告公司有外包關係。昨暝（10月17號），死者其厝裏儂共兩隻在生時候其男同事向東京地方法院提起訴訟，認爲死者是因爲受遘總經理其職場欺凌自殺，要求總經理賠償大概8800萬日元，包括損失費共固未發其工資。
茲隻招聘廣告公司敆東京，號𡅏「Be-higher」。根據訴狀，死者共伊兩隻同事是敆2006年遘2014年左右裏公司，共該公司固有有關公司簽訂外包合同其。但是伊各儂平常都聽總經理其吩發，是作爲事實上存在僱傭關係其職員工作其。
許隻總經理乞三隻儂買去名牌包包共鞋，花其錢記做公司借乞總經理其，其中兩隻儂就做茲蜀筆數其擔保人。2016年左右開始，總經理要求兩隻儂填數。總經理復講，原告臺中另蜀隻儂將茲件事計講儂聽，「違反了保密義務」，著賠幾千萬日元其損失費。無偌𣆯，總經理開始掏去三隻儂工錢劑填債尾，三隻儂也漸漸扛𣍐起去。
三隻儂生活費花澈去，也交𣍐起厝租，就住裏公司辦公室，求總經理替伊儂交厝租。總經理大聲嚗喙，罵伊儂「㑚是活𡅏就敆𡅏纏儂骹」，復講「刣死汝各儂會驚野絆尾，故此望汝各儂出門乞車碰」等等，總款重複職場欺凌其行爲。訴狀講，總經理卜想確認伊各儂半暝有敆辦公室裏勢工作，就要求伊儂每過幾分鐘就使Line匯報蜀回。固敆牆懸頂裝䀹相頭，復監視伊儂手機其GPS定位。敆辦公室，伊各儂𣍐使洗湯，睏眠也㑚使地兜舒蜀張毛巾睏。自殺其女界仈曾敆今年暝2月講：「我是伓是死去比較好？」總經理肝火棕去，將伊敆𡅏使用其電腦𢯾呆去，大嚗無停𦾳，罵伊「（死去也是）糞掃固著儂扒」。
原告主張，總經理掏工錢填數是違法其；總經理做其事、罵其話也侵犯了原告其人格權等等，算職場欺凌。
提訴之後，死者在生時候其兩隻男同事共代理律師敆東京霞關會見了記者。其中蜀隻男界39歲，共許隻女界齊做欠數其擔保人。伊講，總經理野會看儂。共茲隻公司交易其，都見覺總經理「很好交家」，外斗都覷𣍐著伊欺儂其樣式。茲隻男界野価回試𡅏辭職，每蜀回都乞總經理勸講，兩隻儂欠其數，蜀邊蛻被，錢就都乞另蜀邊填。代理人深井剛志律師講：「使欠數夾勒，讓儂做牛做馬，總款其勞資關係，正是職場欺凌造成其。」
律師會見記者其時候，讀了蜀封批，講是死者郎爸寫其。批裏勢寫：「我諸娘囝行去半年上，都無趁總經理夫塊聽遘蜀句『對不住』，無掏轉蜀件諸娘囝自家其乇。」
被告公司講，讀完訴狀會研究怎其應對記者其採訪。
消息來源
[edit | edit source]- 「生きてるだけで迷惑」女性自殺、社長をパワハラで提訴. 朝日新聞デジタル. 2018-10-17 [2018-10-18].