Wb/skr/ݙکھڑے وسیب دے

From Wikimedia Incubator
< Wb‎ | skr
Wb > skr > ݙکھڑے وسیب دے

بارش دی منظوم دعا[edit | edit source]

کلام:    :واجد تھلوی

تھل واسی منگدن۔۔۔۔۔۔۔۔۔۔۔۔۔۔۔روز دعا

میڋا رب سائیں۔۔۔۔۔۔۔۔۔۔۔۔۔۔سنجوک بݨا

ہݨ بارش ڋے،۔۔۔۔۔۔۔۔۔۔۔اڄ بارش ڋے؟

ہر روز لوآر جو۔۔۔۔۔۔۔۔۔۔۔۔۔۔۔۔۔چلدی ہے

پئی سیک اچ جان۔۔۔۔۔۔۔۔۔۔پڄلدی ہے

رب سوہݨاں ٹھڈھڑی۔۔۔۔۔۔۔۔۔گھول ہوا

ہݨ بارش ڋے،۔۔۔۔۔۔۔۔۔۔اڄ بارش ڋے؟

نت سکڑے گھا کوں۔۔۔۔۔۔۔۔چردے ہن

بکھ مال چراکل۔۔۔۔۔۔۔۔۔۔۔۔۔ مردے ہن

پی مینہ دا پاݨی۔۔۔۔۔۔ پھپھڑے گھا

ہݨ بارش ڋے،۔۔۔۔۔۔۔۔۔اڄ بارش ڋے؟

تھل بر دے۔۔۔۔۔۔۔۔۔ بھاݨ آباد ہوون

لئی لاݨے ڄالھیں۔۔۔۔۔۔۔۔۔۔ شاد ہوون

ہر چیز کرے۔۔۔۔۔۔۔۔۔۔ تیڋا شکر ادا

ہݨ بارش ڋے۔۔۔۔۔۔۔۔۔اڄ بارش ڋے؟

پئی دھرتی۔۔۔۔۔۔۔۔۔۔ گل گلزار ڋسے

چو طرفوں۔۔۔۔۔۔۔۔ مست بہار ڋسے

کر ٹوبھیں کوں۔۔۔۔۔۔۔۔ منہ تار ولا

ہݨ بارش ڋے۔۔۔۔۔۔۔۔،اڄ بارش ڋے؟

ساڋی سݨ گھن توں ارداس خدا

اڄ پوری کر۔۔۔۔۔۔۔۔۔۔۔۔۔چا آس خدا

کر واجد رحمت پاک۔۔۔۔۔۔۔۔۔۔۔۔عطا!

ہݨ بارش ڋے،۔۔۔۔۔۔۔اڄ بارش ڋے؟

ہک عرض میاں شبیر علی قریشی کوں[edit | edit source]

میاں شبیر علی قریشی صاحب!

اے ہک حقیقت ہے جو میکوں(میاں شبیر علی قریشی)تہاݙے نال پیار وی ہے تے تہاݙی سیاست نال اختلاف رائے وی رکھداں ۔پیار اتھوں ہے جو تہاݙے ݙڈھ سالہ دور دے وچ حلقہ NA176وچ ترقیاتی کم با نسبت پہلے زیادہ تھئین۔گو کہ کجھ لوکاں دا آکھݨ ہے ,,اے منصوبے پہلی حکومت دے پاس شدہ ہن تے اے رکیے ہوئے ہن تے سابقہ MNAنے اڳلے الیکشن دی کھیݙ واسطے سانبھ رکھیے ہن اوندی بد قسمتی جو اوہ الیکشن ہر ڳیا تے میاں شبیر علی نے اے فنڈ جاری کرائے،، اے سیاسی چھک تاݨیاں ہوندین پیاں کہیں ویلے کوئی تلے تے کہیں ویلے کوئی اتے۔بہرحال(میاں شبیر علی ) تساں حلقے وچ ٻہوں منصوبے دان کیتن شاباش دے حقدار ہیوے مگر انہاں دا احسان نہ جتاوݨ ضروری نئیں جو اے کم تساں کرݨے ہن عوام تہاکوں ووٹ مفت ݙتے ہن ناکہ پسے نال۔ اے ٻئی ڳالھ اے جو ووٹ تاں عوام پہلے وی ݙیندی ہئی مگر اجتماعی رفاہی کم ہکڑ ݙکڑ تھیندا ہا تے تھاݨہ کلچر زیادہ استعمال تھیندا ہا اوہ وی اپݨی نوعیت دا وکھرا کم ہا جو اساں لوک تھاݨے آلے کم کوں وݙا ڄاݨدے ہیں باقی کم ساݙے واسطے کجھ کائےنی اے انفرادی کم (میاں صاحب ) تساں وی کیتن مگر ٻہوں تھوڑے۔اے تاں تھی ڳیا پیار تے ہݨ اختلاف۔ جیویں جو ٻہوں سارے قارئین کوں پتہ ہے نور شاہ تلائی کنوں پوادھ آلی سائیڈ تے علاقہ تھل ہے اتھوں دے واسی لوکاں دے ٻہوں سارے مسائل ہن ایں علاقے کوں سابقہ برسراقتدار لوکاں نے دانستہ محروم رکھیے اتھوں دے وسݨیک ہک مسیحا دی ہمیشہ تلاش اچ رہ ڳئین تے حالی وی کھرا لبھدے ودن میاں شبیر علی قریشی صاحب تساں اتھوں دے واسیاں نال الیکشن مہم دے دوران ٻہوں سارے وعدے وعید کیتےہن جنہاں کوں ڳݨݨ دی ضرورت کوئنی جو کیہڑا کیہڑا ڳݨ سݨواؤں۔مگر نور شاہ مائینر دا وعدہ تساں ترجیح بنیاد تے کیتا ہا تے واہ جو لڄپالی وے۔ الیکشن جتݨ دے بعد ایجھیں اوڈھر تھئے وے جو ولا ایں علاقے وچ لت نوھے رکھی نور شاہ مائینر ݙیوݨ تاں کجا ،نویاں سڑکاں بݨواوݨ تاں اپݨی جا کوئی پراݨاں سڑک دا ٹکڑا وی نوھے چا بݨوایا چلو دنیا داری دے کم تاں تھیون یا نہ تھیون قسمت دی ڳالھ اے مگر جیندیاں دے منہ ݙیکھݨے ضروری ہن تساں تاں ساݙے علاقے وچ ہک فوت شدہ شخص دی قل خانی تے پھیرا پاتے پتہ نئیں اوہ وی کہیں حٻدار دے اصرار تے یا اڳلے الیکشن دا چوتا مارݨ واسطےجو لوک سمجھ ونڄن ایں واری وی اساں ہوسوں پئے۔ اساں گنگے ٻاتے لوک کݙے ونڄݨ جوڳے ہیں ساݙا نانگ تے ݙݙ آلا حساب اے۔ جے تساں نہ تاں اوہ۔۔۔۔۔! اوہ۔۔۔۔۔ نہ تاں تساں۔اساں تاں منڄ کٹواوݨی ہے پر تساں وٹوہڑھ کہیں طریقے دا مارو! سیاݨے آہدن چور کوں وی پاݨی ݙے ݙے کے کٹیا ویندے اساں تاں وت وی تہاݙے ووٹر ہیں پاݨی ساݙا حق بݨدے ساݙے حوصلے نہ آزماوو ساکوں پاݨی(نور شاہ مائینر) ݙیوݨ دے نال نال ساݙے علاقہ تھل دا فنڈ حصے سنواں ہووے اساں وی پاکستان دے ضلع مظفرگڑھ تحصیل کوٹ ادو دی یونین نورشاہ دے مواضعات اچ رہݨ آلے ہیں۔ساݙے نال بے خوندیاں کݙاں تک تھیندیاں رہسن۔افسوس جو تساں وی ساݙی بھل نہ بھنوائی تے ساݙے خواب شرمندہ تعںیر کر ݙتوہے۔جتھاں جلدی اے اتھاں سیک آندے۔میں تاں سڑیے زخماں دے چچلا تھیوݨ تے چنگھاٹ ماری ہے۔پر میاں صاحب تہاݙا یا تہاݙے کہیں پرستار دا دل ݙکھیا ہووے تاں پہلے ای معذرت۔

میݙے علاقے دا ایم این اے[edit | edit source]

جیکر موڈ مزاج اچ ہوویں

بھل ڳئے وعدے یاد کریندیں؟

ڋس وے گودا وت نہ آسیں

کیڑھا رستہ گھن کے آسیں

ساڋی سڑک ترٹی پئی ہے

تیڋی گڋی پنکچر تھیسی

کولوں کئی وی ہٹی کائنی

گاڋی دا جتھ پنکچر لڳے

کیویں تھیسی کیا وت بݨسی

جیکر موسم گرم ہویا

کھڑیں کھڑیں تس لڳ ویسی

کوڑا پاݨی کیویں پیسیں

تئیں تاں ساکوں نہر نی ڋتی

اتھ تاں مٹھا پاݨی کائنی

اساں تاں گزریندے پئے ہیں

پر اے روز سوچیندے پئے ہیں

اساں تاں مہمان نواز ہیں

تیڋی سیوا کیویں تھیسی

اونویں چہسیں جیویں تھیسی؟

اہلیان نور شاہ توجہ تھیوے![edit | edit source]

عوام الناس اچ فکر دی چنگاری وی نئیں نظردی اپݨاں حق منگݨ تاں کجا ہتھوں غاصب دی جی حضُوری کرݨ تے فخر محسوس کیتا ویندا پئے

سنیہا[edit | edit source]

اڄکل(کیوں جو الیکشن سرتے ہے)علاقے وچ سیاسی امیدواراں دا آوݨ ونڄݨ ٻہوں زیادہ ہے کجھ مقامی لوکیں کوں گزارش ہے اوہ انہاں نال گاڋی تے ٻہہ ایڋے اوڋے نہ بھنون تے انہاں کوں اپݨیاں محرومیاں چتاون

سرائیکیاں دے ہک تھیوݨ اچ در پیش مسئلہ[edit | edit source]

سرائیکیاں دے ہک تھیوݨ دا مسئلہ کائنی باقی کہیں ہک کھرے سرائیکی اڳوان ڳولݨ دا مسئلہ ہے کیوں جو اساں کجھ نام نہاد سرائیکی اڳوانیں تے مقامی نمائندگان کوں ڋٹھی کھڑے ہیں اوہ ووٹ تاں وسیب اچوں گھندن پر وسیب دی بہتری نی چہندے

ساݙی حالت تݙی تیل:۔[edit | edit source]

ساݙے پپو ایم پی اے تے ایم این اے ساݙی طاقت دے ݙنے نال جݙاں ایوان اچ پڄدن تاں پچھوں اپݨی ماء دھرتی دا چیتا ننھے رہندا۔ اتھاں ابھیچݨ انہیں کوں وزارت (جیڑھی اثر رسوخ توں خالی ہوندی اے)ݙے کےپھنترو بݨا ٻلہیندن۔اسمبلی دی غیر معینہ مدت اچ اے گونگیاں وانگوں کجھ الا ٻول نی سڳدے۔کیوں جو انہاں دا کوٹا شاہی کھاوݨ پیوݨ تے مخصوص ہوندے۔کجھ لوک آہدن ٻانھی نوازی وی وادھو الاؤنس دے طور تے لازمی ہوندی اے۔سرکار درٻار اچ وادھا گھاٹا تھیوݨ پووے تاں آنے ݙکھا کے انہاں کوں واپسی تڑھا ݙتا ویندے۔اے الو سٻی دا منہ بݨا کے جݙاں گھر ولدن تاں قوم دا حق بݨدے سنی چھمک چیل اچ ݙے کے پچھے جو ٻیلی کتھاں رہ ڳئے وے۔اڳوں اساں ایجھیں نندر لوک ہیں جو اکھیں ملیندیں ولا انہاں دی صندوقڑی تے ہتھ ونڄ رکھدے ہیں۔ایں طرح ساݙی تݙی تیل حالت گھاݨی وات رہ ویندی ہے۔تے اے سلسلہ اݨ کھٹ ہے ٻس خدا دی ہیل نال چلدا پئے۔

جے ستے پئے ہیں تاں متے پئے ہیں وسیب زادو سڄاک تھیسوں تاں کجھ نہ کجھ کاں شعور پیسوں

مقامی اڳوان تے نمائندگان[edit | edit source]

کہیں وی پارٹی چیئرمین تے کئ رنجکی کائنی جے رنجکی ہے تاں مقامی اڳواناں تے اپݨے حلقیاں دے متعلقہ نمائندگان نال ہے کیوں جو انہاں وسیب دا حق منگیا ای کائنی

کھلی بغاوت[edit | edit source]

اساں ازل توں ویلاں وانگ ایویں تیڋے نام ہکیندے آئے ہیں

پا ڳل وچ طوق غلامی دے ہر دور دپھیندے آئے ہیں

تیڋےظلم امیرا گھٹ نی تھئےاساں دردکوں پیندے آئے ہیں

جھل موت برابر مار تیڋی اساں مردے جیندے آئے ہیں

ساڋےصبر دےٻن اڄ تروڑیےنی تیڋی نپ واجد گربان گھنوں

شرعام کھڑا کے چوک اتے تیڋے کول اپݨاں نقصان گھنوں