Wb/se/Gáiddusoahpahusa vejolašvuohta čájehit/Gáiddusbagadallama tipsat fuolaheaddjái ja ruovttuvehkii

Fuolaheaddjin dovddat buoremusat makkár oahppi du áittardanvuloš lea, ja dieđát, makkár doarjaga ja bagadallama son dárbbaša. Skuvllas lea ovddasvástádus oahpahusas, muhto fuolaheaddjin du bargu lea doarjut ja arvvosmahttit sihke veahkehit beaivvi rutiinnaid ráhkadeamis. Oahpásmuva oktan ohppiin skuvllas boahtán rávvagiidda ja veahket su čuovvut daid ja doarjjo bargamis dárbbu mielde. Juos ruovttus eai leat geavahusas heivvolaš rusttegat, gánnáha jearrat veahki skuvllas. Deháleamos lea veahkehit oahppi gávdnat árgga rutiinnaid ja heivehit iežas studerema, oađđima, boradeami, olgun lihkadeami ja astoáiggi nu, ahte árga manná bures ja buot oassebealit dovdet diliset oadjebassan. Buvtte ovdan maiddái, ahte skuvlabargu lea dehálaš ja anát dan árvvus. Gáiddusoahpahus lea skuvlavázzin, vaikko studerejuvvo ruovttus. Juos buot bearašlahtut leat ruovttus, beaivvi ritmma galgá ordnet nu, ahte juohkehaččas lea vejolašvuohta čiekŋut iežas bargamii, ja ahte áigi reahkká maiddái suohtas ovttastallamii.

Gáiddusstuderen lea hástaleaddji ja gáibida rávesolbmosge iešráđálašvuođa. Ama leat nappo árpmolaš ja gierdavaš oahppi guovdu. Luohte oahppái álege ásat sutnje ilá stuora hástalusaid. Láđđásit arvvosmahttimiin sáhtát oažžut su beroštuvvat ođđasa oahppamis dánge dilis. Oahppama ilu ja positiivvalašvuođa lea earenoamáš dehálaš doalahit hástaleaddji dilis. Sáhtášeiddetgo juohke beaivvi loahpas ságastallat das, mii gáiddusskuvlabeaivve lei earenoamáš somás bargobihttá dahje ášši?

Juos skuvlla addin gáiddusoahpahusa ollašuhttin suovvá, ordnejehket skuvlabeaivvi ritmma dili mielde. Oahppoávdnasa, mii gáibida earenoamáš čiekŋuma, gánnáha bargat iđitbeaivve go miella lea buot virkomus. Skuvlabeivviid gánnáha geahpedit dáidda- ja dáidoávdnasiid oahpahusbottuin. Iešguđet oahppoávdnasiid oahpahusbottuid sajige sáhttá dárbbu mielde molssodit, juos studeremis leat čuolmmat.

Juos studeremis bohtet hástalusat, muhtin bargobihttá ii ipmirduvvo dahje studeren muđui orru hástaleaddji, váldet oktavuođa oahpaheaddjái jođáneamos lági mielde. Sáhttibehtet ovttas smiehttat čovdosiid. Skuvllas leat maiddái sierraoahpaheaddjit, geat sáhttet veahkehit hástaleaddji diliin. Állet báze okto hástalusaiguin.