Wb/qwh/Sasa naani

Sasa naaniqa saqwanawllami karupita rikakun. Chaypami runakuna puriyan, ashmakuna, wayrapis siwyar aywakun, shukukuypis raslla muyupaarin. Hukpinnashi chay naanichaw huk suqu piqalla runa uqrakashqa purikaañaq. Payqa kañaq sallqa sallqa runa. Payshi kañaq shishu piqa, shallu kiru, shillunpis raqachaakushqa, llanu kunka, wiswi matanka, quru waqta, makisapa, hatun ñawi, hukninqa wiskuyashqa, ichik sipu ñawi; niykur tita tullu kañaq. Mullu pikshanchawshi mirkapata, kukatawan purichiq. Sisira chukurishqa puriq, siqru ashnunpis manashi haqiykuqtsu.