Wb/pag/Say Eleng tan Say Ereng

Apasikmaran kod

Biek na doroñgewan

So kinmayomngin

Masanting mon eleng

Manwarin say lupam

Sigpot ag ko anengneng

Nanlapu lad saman

Say pusok naandiay deen

Pinengneng ko lawas

nanlapu lad saman

So ami kaelengan

day "limgas" ed langsañgan

agak ni akarumog na

makapiolibay ed santing na

eleng mon

pikugip kon naynay

Diad saray anengneng

Ay katawan kon Dios

Walay masayapad

Walay balinsiangod

Wala may apiwis

Walay binalaok

Wala ni ingen imay

Pansesengegagy kigtot

Bangbalet so eleng mo

Kaababigad simpit

Ag onung maregkel

Ag onung mayapis

Ag met alabas ed

Delpak o tondiris

Makayat a siñga

Alotun kamatis

Et nen asigpot koy

Laman mon amingming

Tampol senmelep ed

Nunot ko so aliling

Na "abig na bolaklak

Limgas to tang santing

Karimia balet so

Tinobuan ton dalin"

Inisip ko warin

Say karakpay "eleng"

Diad laman onbagay

Ed karakpay "ereng"

Manaya et andi met

Noag ingen dakdakel

So agda paninangay

Agda pankasakey

Nanlapu lad saman

Angomay isip ko,

Gawaen ko ni iksamin

Ed sali anggad oli

No say akan eleng

Et agko ni abulto

Ag ko ni ililigen

So tindek na puso.

Say Eleng tan Say Ereng (Jovellanos, 2007)