Wb/pag/Para Met Ed Saray Mamasiken: Merry Christmas!

No siak si Santa, anta yo so gawaen ko?
Ibantak koy anggapoy kakanaan ya regalo
I-deliver ko balet ed arap na puerta yo
Saray amasikenan tan abalang yon inkaguwapo.

Kinmupas ya taraki ipawil kod sikayo,
Maskuladon taklay, biskeg ya maando
Mauban ya buek, ipawil koy deket to
Kaibay kulet, sileng, tan kapal to.

Ipawil koy korte laman na inkalaki
Ompian saray laoy-laoy ya parti ompawil irad dati
Bawasan koy inkabotyog, unaten ko ray beneg
Agkayo lad satan singa sundalon paweg-paweg.

Baog ya akeskes, sikara so unaten
Layag ya natetelek sikaray paabigen
Ipawil kon amin so nababalang ya ngipen
Sikayoy kugkugipen na bibiin makanengneng!

Larag tan talker na pueg sikara so ekalen
Akaweng iran game-gamet, sikaray paimusen
Bukling tan lanok na dapan, sikaray paabigen
Maptek so akar yod satan, agkayo nayeyengyeng.

Tambal na hypertension agyo la nakaukulan
Say namemeneng ya ulat nabilay lad satan,
Manliket kayo la natan ta say tawen sankagawat
Sikayoy mapaot la anggan labi-labin onbanat!

Balet maermen ak lawas ta aliwaak ya si Santa
Anggapoy magic ko pian nagawaan ko raya
Sakey ak labat met ya masiken a singa sikayo ra
Amin ya nalilikna yo, sikato met so problema.

Marakep labat so mankugip ya manliplimata
Ta agla ompawil so linmabas ya inkagangana
Naplag so baston ko, abangon ak ya bigla
Inmarap ak ed salming, dukong-dukong ya masiken ak nin siansia!