Wb/pag/PARASAL

Salve Regina so inggapo ton kansion
Nen masiken Dino a manangipoon
Insan onebat kamin saya’y isuldong
Mater miserecordiae onia’y katuloy.

Say asaoa met ed sata’y inononot
Mansibsibek ya eleng to’y mansingsinglot
Insan biglan onakis tan mankulyaot
Manpatpatalker, kasanlikna, naba’tog.

Alioagoagan da la’y totoo’d satan
Amin da’y mirarasal ya amayamay
Nagsiala’y danum, oala kan manpaypay
Naames da lainge’y asaoan nalmay.

“Sumpalen tayo ni pandasal agagi”
Kua’y masiken Dinon ngipin to’y angiti
Inggapo to’y avemaria tan amami
Onebat met la’d sata’y atsin alungi.

Agay lay dukey na kanta ra’y kanturis
Saramay narasan sikaray manakis
Kanyan nima’y Isao inaksao to’y pansit
Insan to impunas ed sungot to’y nisnis.

Nen ekalen da la’y pandung ya balioan
Magalarogor la’y eges da’y mirasal
Ag la akaanos si Tomas ya sinan
Impekpek to’y aklo’d diking na takayan.

Akidtot met ed satan si panginaen
Dinorot to’d obet si Dinon masiken
mankindokindon mangakansion la ingen
Kelat kami’d elek, andi la’y makasel.

Nen naimangmangan la’y asaoan nalmay
Sangkatepet to no asumpala’y dasal
Say loton bagisen labay ton taoayan
“Apura yo sirin” say kuan ton inggangan.

Bendito alabado’y kansion min maksil
Mansabuyag so ilol, manbuti’y bibil
Mankobibit la ra’y toon ami-amin
Oala kan mantami, oala kan manlabir.

Salamat na baleg asumpal la’y dasal
Manlulumbaan la ra’y toon mipangan
Ilop da’y lauya, dongdong so nakatan
Timmekak so eras, andi ta’y tongtongan.

Dimmongo kami ed dulang ya abeba
Insaklang da’d sata’y manggiogio ya taba
Si masiken Dino takeb to so nagba
Anta ag ni angan, sikato’y atama.

Saray tamukal mi’t singa ra puniti
Andi la’y eselan, manbuabo’y sangi
Anggapo ta’y ag mi kinan ya putahi
Inyamot ni balkot, anggapo’y apirdi.

Nampatanir kami la’d say manotoo
Akasibangot met ya’y masiken Dino
Napsel kami kono, narasa’y eges to
Upa min angansion ay ta imbatik to!