Wb/pag/DEREMEN

Iman la ra’y nagsiegna’y gamlang
Nagsisolong na mantan kaoes ed kaumaan
Pinogta da may kasintimosan*
Pagey ya ansakket iraydayeo da nen saman.

Matalabit ira’y umaani
Nilosbo ra’y piningey ya inelet ed sangi
Tanayen day pingey a pinili
Ta ibiig da lanti deremenen naani.

Binalbalsig amagan kaoayan
Ta sikato’y dangatan pian dita’y panigoban
Agay lay balingit ira’y daoan
Omboti, naloto tan napelag ed siloagan.

Insan da natan iya’d solsolan**
Say ansakket ya inigob oringan da ni man
Say deremen kulay to’y deketán
Manannanam ya ilobi anggan say gataan.

Agay lay balingit na deremen
Agay lay nanam to laot la no kayemkayem
Ondeket man so dila tan ngipen
Pantindekan dan kankane’y ugao ma’y masiken.

Panon et talagan pansagpotan
Anien, igoben, bayoen da tan tegapan
Nanengneng dia’y anos tan kalakal
Ta masamit so taoay na anton nanlingetan.

Palsa’y guyaet na domaralos
Tekep to’y liknaan ya maseseg tan maanos
Ritual ya pisasalamat ed Dios
Say deremen met tanda’y bilay ya matinonos.

Onsigbo’y ilio kod onian kimey
Panagdederemen ya tinaoir ed atateng
Kanen yan no oala’y sangkailien
Iparongon ipangaron sikato’y paknaen.

Ililioen ko la ra man natan
Saray liket min sanaagi, sangkakapinsan
Ya dia’y amaelet na ulupan
Ta say panderemen Ibangat to’y pitangbayan.

*Sintimos - sakey ya uri na kadaanan ya ansakket a pagey, anlemek tan kayemkayem
so deremen ya napapaoay ed sikato.
**Solsolan - taltagan met lan lamang; samay kabalga’y troso ya binolik dan singa atotong
o sakayan ya pangisianan na daoa ed osáng o panbayoan.