Wb/nia/Wikibooks:Nahia wamakori/Esitera
ESITERA 1: Esitera Faza 1
Owuloa sebua khö razo Ahasiwero
I. 1 Ba me luo razo Ahasiwero andrö — Ahasiwero si no razo i'otarai danö Ndrawa Hindru, irugi danö Gaitiofia, razo zi 127 nga'örö danö —, 2 me luo da'ö, me dumadao razo Ahasiwero andrö ba dadaoma razo ba gödo ba Zusa, 3 me no alua mendrua fakhe razo ia, ba ilau fatome, ikaoni nawönia salaŵa fefu ba enoninia, tobali owulo khönia gumandra ba danö Weresia ba ba danö Media ba salaŵa ba kumandru ba danö misa, 4 ba ifa'ele'ö wa'ebua wa'arazonia, awö lakhömi wa'ebuania, ha uga bongi — 180 ngaluo wa'ara —. 5 Ba me no ahori mbongi da'ö, ba ibe'e gö zato fefu razo, ö niha si so ba da'ö ba gödo, ba Zusa, he satua ba he iraono, owuloa si fitu bongi fa'ara, barö göli kabu ba ngai gödo razo. 6 Na lataŵi gulambu safusi ba baru luo sowu waru-waru, nifosinga sinali tarafali ungu, ba firö ni'olaeduru andrö, famakhai ba zi hulö daru nahe maremara. Ba kaso dadaoma niha, ba no böna ame ba firö ba mbale fuwala ba maremara ba baluri ba lazuridi. 7 Ba ana'a mako wamadu, ba oi si faehu-faehu mako andrö; ba agu khö razo, ba no fahöna, ba ginötö khö razo soböwö. 8 Ba ba wamadu, ba no mube'e li, wa lö famarou; da'ö sa goroisa razo ba zatua fefu ba gödonia: balazi manö zamösana.
Lö edöna möi wo'omonia Wasi, andrö itibo'ö ia razo
II. 9 Ba fo'omo razo, Wasi, göi, ba ibe'e göi gö ba ndra alawe ba gödo razo Ahasiwero. 10 Ba me no önö ngaluo zilalö, me no owua-wua dödö razo, ba nagu, ba ibe'e li khö ndra Mehuma, Bisita, Harabona, Bigita, Abagata, Setara, Kharaka, si dafitu, enoni yomo, sangai halöŵö khö razo Ahasiwero, 11 ena'ö la'ohe khö razo wo'omonia Wasi, sobala högö wo'omo razo, ba wama'ele'ö fa'asökhinia, ba niha sato ba ba zalaŵa, me no si sökhi sibai bawa ia. 12 Ba lö edöna möi Wasi, fo'omo razo, lö i'o'ö niŵa'ö razo, nifa'ema genoni andrö. Ba mofönu sibai razo, humola bakha dödönia. 13 Ba humede razo ba zatua-tua andrö, sonekhe ba wamaigi inötö — fefu hadia ia sa niŵa'ö razo, ba lafatimba'ö ba zonekhe ba huku ba ba wolohe ba lala huhuo;[1] 14 ba si no amaedola zahatö khönia, ba Kharesena ba Setara ba Adamata ba Tarisi ba Meresi ba Maresena ba Memukha, salaŵa Ndrawa Weresia ösa ba salaŵa Ndrawa Media ösa, si dafitu andrö, si fa'ila-ila bawa khö razo ba si no högö ba gamatöröŵania andrö, ba imane razo:[2] 15 Hadia huku nifatörö khö Wasi fo'omo razo, me no lö ni'o'önia oroisa razo Ahasiwero, nifa'ema genoni andrö? 16 Ba imane Memukha khö razo ba ba zalaŵa andrö: Tenga ha sambalö horö khö razo horö Wasi fo'omo razo, no horö ba zalaŵa fefu ba ba niha sato fefu ba danö razo Ahasiwero fefu. 17 Dozi ira alawe, ba larongo dania wolau wo'omo razo, ba tobali la'ositengagö ndra matuara, na lamane: No iŵa'ö razo Ahasiwero, la'ohe khönia wo'omonia Wasi, ba tekhönia möi. 18 Ma'ökhö andre ladunö-dunö ba nawö razo salaŵa fo'omo zalaŵa Ndrawa Weresia ba fo'omo zalaŵa Ndrawa Media, si no mamondrongo wolau wo'omo razo andrö ba lö ambö dania wa lö ba dödö ba fangabu dödö. 19 Na möi dödö razo, ba yamube'e goroisa, nitanö ba zura goroisa ba Ndrawa Weresia ba ba Ndrawa Media, fa tebai awu'a: wa lö tola sa'ae i'oroma'ö ia khö razo Ahasiwero Wasi, ba fa'asalaŵania, ba ibe'e ba ndra alawe bö'ö razo, ba ndra alawe si sökhi moroi khönia.[3] 20 Ba na larongo goroisa razo andrö, nifarongogö ba gamatöroŵania — si no ebua sibai — ma'asagörö, ba la'ata'ufi ndra matuara ira alawe fefu, he salaŵa, ba he ono mbanua. 21 Ba omasi razo ba awönia salaŵa niŵa'önia andrö; ba i'o'ö razo niŵa'ö Memukha. 22 Ba ifa'ohe'ö zura, idozigö öri barö mbawa razo, sara öri, ba sagörö zura, ha soi ira, ba hadia lira: ira matua zamatörö si so baomonia; ba lira ilau.[4]
ESITERA 2: Esitera Faza 2
La'ohe khö razo Gesitera andrö, Iraono Gizeraëli
I. 1 Ba me no aefa da'ö, me no alö wönu razo Ahasiwero, ba itörö tödönia Wasi, awö wolaunia andrö, awö nihonogöi mege, ba khönia andrö. 2 Ba lamane ono matua andrö khö razo, ngoni-ngoninia: Akha la'alui khö razo nono alawe sawuyu-wuyu ba si sökhi, 3 yamufataro zamaigi razo, yamudozigö öri ba gamatöröŵania, sangowuloi ono alawe sawuyu-wuyu ba si sökhi, fefu, ba wolohe ba gödo, ba Zusa, ba nomo ndra alawe andrö, barö Mbawa Hega'i samaigi-maigi ira alawe, ba ndra mufatörö wangehao andrö; 4 ba heza dania zomasi razo, ono alawe, ba ya da'ö wo'omo razo, fangali Wasi. Ba omasi razo niŵa'öra, ba i'o'ö da'ö. 5 Ba no so ba gödo, ba Zusa niha Yehuda, Morodokhai döi, ono Ya'iro ono Zime'i ono Gisi, mado Mbeniyami, ni'oloi'ö no, 6 moroi ba Yeruzalema, awö ni'oloi'ö andrö, si fao khö Yekhonia, razo mado Yuda, ni'oloi'ö Nebukanesa, razo Mbabeli.[5] 7 Ba Morodokhai andrö, ba sange'ebua Hadasa — Esitera —, ono dana namania, me no si lö ama ba si lö ina Hadasa andrö. Ba no si sökhi sibai boto nono alawe andrö, ba si sökhi sibai bawa; ba me mate ndra amania inania mege, ba isou ia ononia Morodokhai. 8 Ba me no terongo niŵa'ö razo, oroisania andrö, me la'oya'ö wolohe ba gödo, ba Zusa, barö mbawa Hega'i, ono alawe, ba la'ohe göi Gesitera ba gödo razo, barö mbawa Hega'i, samaigi-maigi ira alawe. 9 Ba omasi ia nono alawe andrö, ebua dödönia khönia; ba i'aliogö wamaigi fangehao andrö khönia, ibe'e dana khönia andrö, ba ifa'aso khönia ngoni-ngoninia andrö, nitehe khönia, si dafitu, ono alawe, moroi ba gödo razo, ba ibe'e nahiania ba he nahia ngoni-ngoninia andrö wondrege zi sökhi mbate'e ba nomo ndra alawe. 10 Ba lö ni'ombakha'ö Gesitera ha mado ia ba ha niha niwara; noa sa iŵa'ö khönia Morodokhai, böi yamu'ombakha'ö.
I halö ia razo
II. 11 Ba ero ma'ökhö manörö-nörö Morodokhai föna-föna golayama nomo ndra alawe, ba wamaigi-maigi na lö hadia ia khö Gesitera, ba heza la'ohe ia. 12 Ba ero na irugi inötö, ba möi yomo khö razo Ahasiwero nono alawe, samösa, na no irugi zi 12 waŵa andrö, ba nifatörö khönia nihonogöi ba ndra alawe andrö, — si manö sa wa'ara wangehao andrö khöra: önö waŵa lagule'ö wanikha emuri, ba önö waŵa göi zamohua bö'ö, ba hadia ia na wangehao ndra alawe —: 13 ba na möi yomo khö razo nono alawe, samösa, ba lö tola lö labe'e khönia fefu hadia ia zomasi ia, ena'ö i'ohe ba gödo razo, na i'otarai nomo ndra alawe andrö. 14 Na bongi möi ia yomo [khö razo], ba na moluo, ba ifuli ia, ba ba nomo ndra alawe si sambua möi ia ba da'ö, barö mbawa Za'asagasa, enoni yomo khö razo, samaigi-maigi dongania ba döi; ba lö tola sa'ae möi ia khö razo, ha na no omasi razo ia, ba na ifakaoni'ö. 15 Ba me no irugi inötö khö Gesitera, ono Gabihailo, tana nama Morodokhai andrö, si no manou ya'ia ononia, me no irugi inötö khönia, ba möi ia yomo khö razo, ba lö hadia ia i'andrö, ha niŵa'ö Hega'i andrö, enoni yomo khö razo, samaigi-maigi ira alawe. Ba la'omasi'ö Gesitera dozi sangila ya'ia. 16 Ba lahalö yomo khö razo Ahasiwero, ba gödo razo khönia, Gesitera, ba mbaŵa si fulu — baŵa Tebeti —, me no alua me önö fakhe razo ia. 17 Ba omasi razo Gesitera, moroi ba wa'omasinia ndra alawe bö'ö fefu, ba ebua dödönia khönia, moroi ba wa'ebua dödönia ba nono alawe bö'ö fefu. Ba ibe'e ba högönia mbala högö wo'omo razo ba ibali'ö fo'omo razo, fangali Wasi. 18 Ba ilau walöŵa sebua razo, ikaoni nawönia salaŵa ba enoninia, fefu; falöŵa ba wangai Esitera, ba ba danö göi itehe wolombase, ba mame'e buala ia, fa'oböwö razo. 19 Ba me lafuli la'owuloi nono alawe, ba no dumadao ba zinga mbawandruhö khö razo Morodokhai —. 20 Ba lö ni'ombakha'ö Gesitera ha niha niwara ba ha mado ia, no i'o'ö niŵa'ö Morodokhai khönia, no ifondrondrongo niŵa'ö Morodokhai, si mane mege, me iraono ia na baomonia.
I'ombakha'ö Morodokhai zamunu razo ena'ö
III. 21 Me luo da'ö, me no dumadao ba zinga mbawandruhö khö razo Morodokhai, ba tesao wa'afökhö dödö genoni yomo khö razo, darua ira, Bigitana ba Teresi, sanaro ba mbawandruhö, ba la'alui wamunu razo Ahasiwero. 22 Ba irongo da'ö Morodokhai ba i'ombakha'ö khö Gesitera, fo'omo razo, ba Esitera zama'ema khö razo niŵa'ö Morodokhai. 23 Ba lasekhegö ba larongo, wa tenga faya, ba lataŵi zi darua andrö ba gatunga. Ba tetanö ba zura da'ö, ba zura hikaya khö razo.
ESITERA 3: Esitera Faza 3
Lö ifosumange Hamano andrö, nibali'ö razo salaŵa, Morodokhai
I. 1 Ba me aefa da'ö, ba ibali'ö salaŵa Hamano razo Ahasiwero, Hamano ono Hamedata, ma'uwu Agagi, i'ebua'ö, ba yaŵa dadaoma zalaŵa bö'ö fefu ba ngainia ibe'e dadaomania. 2 Ba dozi enoni razo, si so ba gödo khö razo, ba latuhi danö ba lafalögu tou ira föna Hamano, me no oroisa razo da'ö ba khönia. Ba Morodokhai, ba lö ituhi danö ba lö ifalögu tou ia. 3 Ba lamane enoni razo, si so ba gödo khönia, khö Morodokhai: Hana wa ösawö goroisa razo? 4 Ba ero maökhö lamanö khönia, ba lö ifondrondrongo, ba la'ombakha'ö khö Hamano, ba wamaigi, na lö te'ala Morodokhai; noa sa i'ombakha'ö khöra, wa niha Yehuda ia.
I'alui lala ba wangohori niha Yehuda Hamano
II. 5 Ba me i'ila Hamano, lö ituhi danö fönania Morodokhai ba lö ifalögu tou ia, ba mofönu sibai ia. 6 Ba faya-faya iŵa'ö tödönia, na ha samösa Morodokhai ibunu; me no la'ombakha'ö khönia ha soi Morodokhai, ba i'alui lala Hamano, ba wangohori niha Yehuda, iwa Morodokhai, fefu; ba danö Ahasiwero, ma'asagörö. 7 Ba ba mbaŵa si föföna — baŵa Nisana —, me no alua mewelezara fakhe razo Ahasiwero, ba lalau "wuri" — dahö-dahö — föna Hamano, la'erogö ma'ökhö ba la'erogö baŵa, ba göna ba zi meweledölu ba mbaŵa si felendrua — baŵa Adara. 8 Ba imane Hamano khö razo Ahasiwero: So soi sambua, si no muzaewe ba niha bö'ö, ba danö fefu, barö mbawau ba si no tonia; huku khöra, ba no faehu ba huku niha bö'ö fefu, ba oroisa razo, ba lö la'o'ö, ba no tenga si nangea, itehe manö khöra da'ö razo. 9 Ba na atulö khö razo, ba nibe'e sura, ba wangohori ya'ira, ba ube'e ba danga ndra tua kumandru wirö, 44.120.000 ba rufia, ena'ö labe'e ba nahia girö-girö khö razo. 10 Ba isöbi ba durunia laeduru razo, laeduru si so tandro, ba ibe'e khö Hamano andrö, ono Hamedata, ma'uwu Agagi, udu niha Yehuda.[6] 11 Ba imane razo khö Hamano: Firö andrö, ba khöu labe'e, ba ba niha andrö, ba lau zomasi'ö. 12 Ba humede ira ba durutuli razo ba zi meweledölu ba mbaŵa si föföna; ba latörö sibai nihonogöi Hamano, wama'ohe'ö sura ba nifataro razo ba ba gumandru ba zi sagö-sagörö tanö, ba ba zalaŵa soi niha misa, dali wanura khöra ba danöra ba he li soi andrö misa. Töi razo Ahasiwero nibe'e ba zura goroisa andrö, ba lafotandro tandro ba laeduru andrö, khö razo. 13 Ba ladozigö tanö barö mbawa razo, wama'ohe'ö sura andrö ba zinenge si fagohi, ba wangohori niha Yehuda, ba wamakiko, ba wamunu, he iraono ba he satua, ba iraono sawuyu ba ira alawe, ha ma'ö-ma'ökhö, ba zi meweledölu ba mbaŵa si felendrua — baŵa Adara —, ba ba worabu zi so khöra, amaedola zi lö sokhö. 14 Ba da'ö niŵa'ö ba zura andrö: ladozigö tanö wame'e oroisa, ena'ö dozi niha zamondrongo, ba ena'ö no te'anö ira, na irugi baŵa da'ö. 15 Ba la'aliogö sinenge andrö, si fagohi, la'o'ö niŵa'ö razo, me ha si'aikö tebe'e goroisa andrö, ba gödo, ba Zusa. Ba mudadao manga razo, awö Hamano; ba banua Zusa, ba si tobali tödö.
ESITERA 4: Esitera Faza 4
Irongo Esitera wa'abu dödö Morodokhai ba fa'abu dödö niha Yehuda
I. 1 Ba me irongo Morodokhai niŵa'ö andrö fefu, ba isika nukhania, i'onukha goni-goni ba ilau nawu ba högönia, ba möi ia baero ba newali, mangarö-ngarö sibai ba mege-ege.[7] 2 Ba irugi föna-föna mbawa göli khö razo. Ba bawa göli khö razo, ba lö tola itörö sobaru goni-goni. 3 Ba dozi tanö, heza terongo niŵa'ö razo, oroisania andrö, ba abu sibai dödö niha Yehuda, ba mamoni ba gö ira ba mege-ege ba mangarö-ngarö, ba ato zamöröni goni-goni ba awu.[8] 4 Ba so ngoni-ngoni Gesitera, ono alawe ba enoninia ira matua, la'ombakha'ö khönia da'ö, ba abu sibai dödö wo'omo razo andrö. Ba ifa'ohe'ö nukha, nukha Morodokhai, ena'ö ifuli iheta goni-goni andrö; ba lö ihalö. 5 Ba humede Gesitera khö Hatakha, enoni yomo khö razo, nibe'enia enoni Gesitera, ba ifatenge khö Morodokhai, ba wanofu hadia geluaha da'ö fefu, hana wa lamanö. 6 Ba möi tou Hatakha khö Morodokhai ba newali, föna-föna mbawa göli khö razo. 7 Ba ahori i'ombakha'ö khönia Morodokhai, he lawisa khönia mege ba fa'ebua wirö andrö, nifabu'u Hamano, nitulo, nibe'e ba nahia girö-girö khö razo, ba niha Yehuda, ena'ö labunu ira[9] 8 Ba ibe'e göi khönia zura goroisa andrö, sagörö, oroisa moroi ba Zusa, ba wangohori niha Yehuda, ena'ö i'oroma'ö khö Gesitera, ba ena'ö i'ombakha'ö khönia, wangandrö khönia yamöi yomo khö razo, ba wangandrö khönia fa'ahakhö dödö ba fangorifi iwara.
Edöna möi ia khö razo
II. 9 Ba so Hatakha, i'ombakha'ö khö Gisitera niŵa'ö Morodokhai. 10 Ba ifafuli'ö li khö Morodokhai khö Hatakha andrö, imane: 11 Dozi enoni razo, ba he niha sato ba danö razo, ba no larongo, wa ha sara huku, huku mate, na so zi möi bakha khö razo, ba golayama tanö bakha, na si lö mukaoni, fefu gofu ha niha, he ira matua, ba he ira ala'we, atö na so ni'oro'ö razo si'o razo andrö khönia, ena'ö auri ia. Ba ya'odo, ba no sara waŵa sa'ae, ba lö sihede khögu, ba we'amöi khö razo. 12 Ba me no lafuli khö Morodokhai niŵa'ö Gesitera, 13 ba ifafuli'ö göi li khö Gesitera Morodokhai, imane: Böi ŵa'ö tödöu, ha ya'ugö dania zauri niha Yehuda, me no ba gödo razo so'ö. 14 Na si ndruhu sa lö hede-hedeu ba götö da'e, ba so dania wangefa niha Yehuda ba fangorifira, ta'ila heza moroi, ba ya'ugö ba si samba omo ya'ami, ba si mate. Ha zangila, na tenga börö götö da'e, wa no tobali fo'omo razo ndra'ugö! 15 Ba ifafuli'ö zui li khö Morodokhai Esitera, imane: 16 Ae falukha'ö niha Yehuda, banua Zusa, ba mi'amoni ba gö, khögu: tölu ngaluo ba tölu mbongi, ba böi manga ami, ba böi mibadu hadia ia; ba ya'o göi, ba umanö göi wamoni, awö ngoni-ngonigu andrö, ono alawe. Ba aefa da'ö, ba möido yomo khö razo, he ŵa'ae no fanawö oroisa da'ö. Na matedo, ba hana na matedo![10] 17 Ba mofanö Morodokhai, i'o'ö sibai nifaŵa'ögö Gesitera khönia.
ESITERA 5: Esitera Faza 5
Lö mofönu razo, ebua dödönia khö Gesitera. Ikaoni razo, awö Hamano, Esitera, ba wemanga khönia
I. 1 Ba me no aefa dua wongi, ba i'obaru mbaru wo'omo razo Esitera, ba i'agö golayama tanö bakha, ba gödo razo, ba gamaudu gödo, me no dumadao ba dadaoma razo khönia razo, yomo ba gödo, ba gamaudu mbawandruhö ba gödo. 2 Ba me i'ila wo'omonia Esitera, tou ba golayama, razo, ba ebua dödönia khönia, ba i'oro'ö khö Gesitera zi'onia ana'a, si so ba dangania, razo. Ba i'ondrasi Esitera, ibabaya mbalö zi'o. 3 Ba imane khönia razo: Hadia khöu, fo'omo razo, Esitera, hadia ni'andröu? He irege zi matonga gamatöröŵagu, ba latehe khöu! 4 Ba imane Esitera: Na atulö khö razo, ba yamöi manga khögu ma'ökhö, awö Hamano, ba gö andrö, si no u'asiwai khönia. 5 Ba imane razo: Mita'i-ta'i mihede khö Hamano, ena'ö ma'o'ö zomasi Gesitera! Ba me no so razo, awö Hamano, ba wemanga gö andrö, ni'asiwai Gesitera, 6 ba imane razo khö Gesitera, me ibadu-badu nagu razo: Hadia ni'andröu, ena'ö labe'e khöu? Hadia zomasi'ö? He irege zi matonga gamatöröŵagu, ba latehe khöu![11] 7 Ba itema linia Esitera, imane: Da'ö ni'andrögu ba da'ö zomasido: 8 na no falukhado wa'ebua dödö, wamaigi razo, ba na omasi razo ibe'e ni'andrögu ba itörö khögu zomasido, ba yamufuli möi manga khögu razo, awö Hamano, ba gö andrö, ni'asiwaigu khöra dania, ba mahemolu u'o'ö niŵa'ö razo.
Fayaŵasa Hamano ba fatiusania khö Morodokhai
II. 9 Ba mofanö Hamano, omuso dödönia ba lö sabu dödönia hadia ia, me luo da'ö. Ba me i'ila Morodokhai ba zinga mbawa göli khö razo, me i'ila lö maoso, ba lö i'ata'ufi ia, ba mofönu sibai Hamano ba khö Morodokhai andrö. 10 Ba itaha zui dödönia Hamano. Ba me irugi khöra, ba ifakaoni'ö zi fahuwu khönia ba fo'omonia Seresi. 11 Ba itunö khöra wa'ebua gana'ania ba fa'oya nononia matua, awö wamosumange razo ya'ia, awö wa no yaŵa zalaŵa andrö ba yaŵa genoninia ibe'e ira razo.[12] 12 Ba imane na Hamano: Ba fo'omo razo, Esitera, ba lö nikaoninia, awö razo, ba gö andrö, nihalönia, ha ya'odo andre; ba he mahemolu, ba no ya'o nikaoni, awö razo. 13 Ba ambö na khögu da'ö fefu, fatua u'ila na dumaodao ba zinga mbawa göli razo niha Yehuda andrö, Morodokhai. 14 Ba imane khönia fo'omonia Seresi, awö zi fahuwu khönia andrö fefu: Ndramufazökhi gatunga, 50 hela wa'alaŵa, ba mahemolu mbanua, ba öŵa'ö khö razo, ena'ö lataŵi ba da'ö Morodokhai; ba na aefa da'ö, ba ae manga, awö razo, ba ya omuso dödöu! Ba omasi Hamano niŵa'öra, ba ifafazökhi'ö gatunga andrö.
ESITERA 6: Esitera Faza 6
Itörö tödö razo wanolo Morodokhai ya'ia. Niŵa'ö Hamano
I. 1 Ba ba zi bongi andrö, ba lö alau hörö razo. Ba i'oroi'ö zura hikaya, ba labaso khönia. 2 Ba lasöndra, wa no mutanö ba zura andrö, wa no i'ombakha'ö Morodokhai, me labunu ena'ö razo Ahasiwero enoni yomo andrö khö razo, si darua, Bigitana ba Teresi, sanaro ba mbawandruhö. 3 Ba imane razo: Hadia mege nibe'e ba da'ö khö Morodokhai sumange ba si sökhi? Ba lamane ngoni-ngoni razo: 4 Lö mube'e hadia ia. Ba imane razo: Ha niha ba golayama? No irugi sibai golayama tanö baero ba gödo razo Hamano, ba wangandrö khö razo, ena'ö lataŵi Morodokhai, ba gatunga andrö, nifalau'önia khönia. 5 Ba lamane khö razo ngoni-ngoninia: Hamano zi so ba golayama. Ba imane razo: Yamöi yomo! 6 Ba möi yomo Hamano, ba imane khönia razo: He lawisa ba niha somasi razo ifosumange? Ba imane dödönia Hamano: Ha niha zomasi razo ifosumange, na tenga ya'odo? 7 Ba imane khö razo: Na so zomasi razo ifosumange, 8 ba ndramuhalö mbaru razo, ni'obaru razo mege. Awö kudo, ni'okudo razo, nifanaembu saembu khö razo, 9 ba ndramube'e ba danga nawö razo salaŵa mbaru andrö, awö kudo, ena'ö labe'e baru niha andrö, somasi razo ifosumange, ba ena'ö lafakudo ia ba kudo andrö, ba lafanörö-nörö ba newali, ba ndra mu'ao fönania: Da'e nilau ba niha, somasi razo ifosumange![13]
Ifosumange Morodokhai Hamano. Fa'abu dödönia ba da'ö
II. 10 Ba imane razo khö Hamano: Ta'i-ta'i halö mbaru andrö, awö kudo si mane niŵa'öu, ba lau da'ö khö Morodokhai, niha Yehuda andrö, sidao-dao ba zinga mbawa göli khö razo; böi ambösi niŵa'öu andrö, fefu! 11 Ba ihalö mbaru andrö Hamano, awö kudo, ifobaru Morodokhai ba ifakudo ba ifanörö-nörö ba newali ba mu'ao ia fönania, imane: Si mane wolau ba niha, somasi razo ifosumange! 12 Ba ifuli ia ba zinga mbawa göli khö razo Morodokhai. Ba fulöi Hamano, isaŵa khöra, no abu dödönia ba no ibalugö högönia.[14] 13 Ba itunö khö wo'omonia Seresi ba ba zi fahuwu khönia da'ö no mege fefu. Ba lamane khönia satua-tua andrö khönia: Na iwa niha Yehuda Morodokhai andrö — me no ibörötaigö ahöndrö ndra'ugö fönania — ba tebai ölaŵa ia, ba tobali alua manö ahöndrö ndra'ugö khönia. 14 Ba lö saetu huhuora na, ba so genoni razo, samangaösö Hamano ba gö andrö, nihalö Gesitera.
ESITERA 7: Esitera Faza 7
I'ombakha'ö khö razo dödö Hamano andrö Esitera, ba i'andrö wangorifinia ba fangorifi niwara
I. 1 Ba so razo, awö Hamano, ba wemanga khö Gesitera. 2 Ba isofu khö Gesitera, me luo da'ö göi, me labadu-badu nagu, imane: Hadia ni'andröu fo'omo razo, Esitera, ena'ö labe'e khöu? Hadia zomasi'ö? He irege zi matonga gamatöröŵagu, ba latehe khöu. 3 Ba itema linia fo'omonia Esitera, imane: Na no falukhado wa'ebua dödö wamaigiu, ya'ugö, razo, ba na atulö khö razo, ba alakha la'orifi ndra'o, börö wangandrögu andre, ba he iwama, börö zomasido andrö. 4 Noa sa mu'amawa ndra'aga, ya'odo andre ba iwama, ba wangohori ya'aga, ba wamunu, ba wamakiko. Na ni'amawa sawuyu ira matua ba sawuyu ira alawe na atö ndra'aga, ba lö hede-hedegu ena'ö; tenga sa si nangea nuduma andrö, wa te'ala razo ibe'e. 5 Ba humede razo Ahasiwero, imane khö wo'omonia Gesitera: Ha niha da'ö ba heza so ia, sama'amöi ba dödönia folau da'ö? 6 Ba imane Esitera: Uduma andrö si fatiu tödö khöma, ba ya'ia Hamano andre, si lö sökhi! Ba tokea sibai Hamano khö razo ba khö wo'omonia.
Fönu razo. Ifataŵi'ö Hamano ba gatunga andrö nitaru'önia
II. 7 Ba maoso razo, ba wönunia, iböhöli wamadu agu, möi ia ba kabu, ba ngai gödo; ba toröi Hamano, ba wakaosa khö Gesitera, ena'ö lö labunu ia; aboto sa'ae ba dödönia, wa no i'etu'ö hukunia razo, huku famunu. 8 Ba me mangawuli yomo ba naha wemanga no mege razo, moroi ba kabu, ba no ibalöduhini gaso andrö, dadaoma Gesitera, Hamano. Ba imane razo: Hadia, ibunu wo'omo razo ba da'e yomo khögu? Ba ha si'aikö iŵa'ö da'ö razo, ba labalugö sa'ae mbawa Hamano. 9 Ba imane Herebona, enoni yomo khö razo, sangai-ngai hadia ia khönia: Hiza gatunga andrö, ba ngai nomo Hamano, 50 hela wa'alaŵa, nifalau'ö Hamano khö Morodokhai, si no mama'ema fangorifi khö razo. Ba imane razo: Mitaŵi ia ba da'ö! 10 Ba lataŵi Hamano ba gatunga andrö, nifalau'önia khö Morodokhai. Ba awena alö wönu razo.
ESITERA 8: Esitera Faza 8
Tebali'ö salaŵa Morodokhai, fangali Hamano
I. 1 Ba me luo da'ö, ba ibe'e bualania khö Gesitera razo nomo Hamano, udu Niha Yehuda. Ba molala khö razo Morodokhai, me no i'ombakha'ö khö razo Esitera, wa sahatö khönia Morodokhai. 2 Ba iheta laedurunia razo, laeduru si so tandro, nihalönia mangawuli khö Hamano mege, ba ibe'e khö Morodokhai. Ba Esitera, ba ibe'e satua baomo ba nomo Hamano Morodokhai.[15]
Tetehe ba Niha Yehuda lalau mbalö ba zamunu ya'ira ena'ö, ni'andrö Gesitera khö razo
II. 3 Ba ifuli humede Gesitera khö razo, ituhi zalo fönania, mege-ege ia, ba i'andrö wa'ahakhö dödö razo, ena'ö itolo, fa böi alua nifakhai Hamano andrö, ma'uwu Agagi, ba Niha Yehuda, famunu andrö. 4 Ba i'oro'ö zi'onia ana'a andrö khö Gesitera. Ba maoso Gesitera, i'agö föna razo, 5 ba imane: Na atulö khö razo, ba na no falukhado wa'ahakhö dödönia, ba na si nangea iŵa'ö razo ba na omasi ia ndra'odo, ba yamufa'ohe'ö zura, yamu'oroi'ö wangai mangawuli zura no, tödö Hamano andrö, ono Hamedata, ma'uwu Agagi, nifasura'önia, ba wamunu Niha Yehuda ba danö barö mbawa razo, fefu. 6 Tebai sa utaha ufaigi wamunu andrö, si göna niwama ena'ö, ba tebai utaha ufaigi wangohori iwama andrö! 7 Ba imane razo Ahasiwero khö wo'omonia Esitera, ba khö Morodokhai Niha Yehuda: Noa sa ube'e bualagu khö Gesitera nomo Hamano, ba ya'ia, ba no mutaŵi ba gatunga, me no ibabaya Niha Yehuda. 8 Ba ya'ami, ba hana na mifa'ohe'ö zura, hana na töi razo mibe'e ba Niha Yehuda andrö, he wisa zomasi ami, ba mifotandro tandro ba laeduru khö razo. Me no tebai niwu'ai li ba zura, nibe'e töi razo ba si no mufotandro tandro andrö ba laeduru khö razo. 9 Ba humede ira ba durutuli razo, me luo da'ö, ba zi 23, ba mbaŵa si tölu — baŵa Siwana — ba lafazökhi, zura la'o'ö niŵa'ö Morodokhai, ba Niha Yehuda, ba ba nifataro razo ba ba gumandru ba ba zalaŵa, ba nöri andrö fefu, si 127, i'otarai danö Ndrawa Hindru, numalö ba danö Gaitiofia, dali wanura ba zi sara-sara öri ba he li zi sambu-sambua soi, ba ba Niha Yehuda, ba ba wanurara ba ba lira. 10 Ba ifabe'e'ö döi razo Ahasiwero ba ifotandro tandro andrö ba laeduru khö razo; ba ifa'ohe'ö ba zinenge si fakudo, saösö, kudo ba kandra khö razo kudora. 11 Sura andrö, ba no fanehe razo ba Niha Yehuda ba mbanua misa fefu, hana na la'owuloi ira, ba wanimba samunu ya'ira, ba wangohori sato andrö, ba danö misa samunu ya'ira ena'ö, ba he iraono, ba he ira alawe, ba wamunu, ba wamakiko, ba hana na larabu zi so khöra, amaedola zi lö sokhö, 12 ha ma'öma'ökhö, ba nöri barö mbawa razo Ahasiwero, fefu, ba zi me 13, ba mbaŵa si 12, — baŵa Adara. 13 Ba taroma li ba zura andrö, ba nibe'e oroisa, nidozigö öri, ena'ö dozi soi zamondrongo, ba ena'ö na si no te'anö Niha Yehuda, na luo da'ö, ba wolau balöra ba nemalira. 14 Ba ha si'aikö tebe'e goroisa andrö, ba gödo ba Zusa, ba mofanö zinenge andrö, saösö, si fakudo ba hulu kudo khö razo, salio ahe, la'o'ö niŵa'ö razo, la'aliogö ira, lafandruo kudo.
Fa'omuso dödö Niha Yehuda ba da'ö
III. 15 Ba möi tou Morodokhai, iröi razo, baru zalaŵa mbarunia, biru-laŵi ba safusi, ba mosaembu ana'a ia ba mobaru sebua, tarafali ba ungu, ba owua-wua dödö mbanua Zusa, ba omuso dödöra. 16 Noa sa falukha wa'ohahau dödö ba fa'omuso dödö ba fa'owua-wua dödö ba sumange Niha Yehuda. 17 Ba dozi öri ba dozi banua, heza irugi niŵa'ö razo ba oroisania andrö, ba so wa'omuso dödö ba Niha Yehuda ba fa'owua-wua dödö ba femanga-manga, ba owuloa. Ba ato zi tobali Niha Yehuda niha baero, me no ihawui ira fa'ata'ura Niha Yehuda.
ESITERA 9: Esitera Faza 9
Lalau mbalöra Niha Yehuda
I. 1 Ba ba zi me 13 ba mbaŵa si 12, — baŵa Adara — ba nifalua ena'ö niŵa'ö razo, oroisania andrö, luo nidöna-döna zi fatiu tödö ba Niha Yehuda, ba wolaŵa ya'ira, ba zi no tobali, ba nilaŵa Niha Yehuda si fatiu dödö khöra: ba la'owuloi ira, 2 ba mbanuara, ba danö barö mbawa razo Ahasiwero, ba wamunu samunu ya'ira ena'ö. Ba lö solaŵa ya'ira, me no dozi soi ihawui fa'ata'ura Niha Yehuda. 3 Ba latolo Niha Yehuda dozi salaŵa ba danö, ba he nifataro razo ba kumandru ba kumandra, me no ihawui ira fa'ata'ura Morodokhai. 4 No sebua ae Morodokhai, ba genoni razo, ba itöröi danö fefu turiania, me itugu tedou manö wa'ebua Morodokhai andrö. 5 Ba te'ala sibai zi fatiu tödö khöra fefu labe'e Niha Yehuda, lafafahö ba la'ö'ötö, labubunu; somasi ira lafatörö ba zi fatiu tödö khöra. 6 Ba ba hati ba Zusa, ba 500 niha labunu Niha Yehuda, lafakiko. 7 Fabaya Farasandrata ba Dalafono ba Asafata, 8 ba Forata ba Adalia ba Aridata, 9 ba Faramasa ba Arisai ba Arida'i ba Wayesata, ono Hamano andrö, 10 si dafulu, ba ba labubunu, ono Hamano ono Hamedata, udu Niha Yehuda, ba si so khöra, ba lö lababaya. 11 Ba me luo da'ö, ba irongo razo wa'ato nibunu ba hati ba Zusa. 12 Ba imane razo khö wo'omonia Esitera: Ba hati, ba Susa, ba no 500 nibunu Niha Yehuda niha, fabaya ono Hamano, si dafulu, ba ta'ila he wisa wolaura ba nöri bö'ö barö mbawa razo! Ba hadia ni'andröu, ena'ö latehe khöu? Ba hadia zomasi'ö, ena'ö latörö khöu? 13 Ba imane Esitera: Na atulö khö razo, ba ena'ö mahemolu göi latehe ba Niha Yehuda ba Zusa nilaura ma'ökhö; ba ono Hamano andrö, si dafulu, ba ena'ö na lataŵi ba gatunga. 14 Ba ibe'e li razo, la'o'ö da'ö; ba tebe'e goroisa ba Zusa, ba ono Hamano andrö, si dafulu, ba lataŵi. 15 Ba owulo zui Niha Yehuda ba Zusa, ba zi me 14, ba mbaŵa Adara, ba 300 labunu niha ba Zusa. Ba si so khöra, ba lö lababaya. 16 Ba Niha Yehuda ba nöri bö'ö barö mbawa razo, ba owulo, ba latimba zamunu ya'ira ena'ö, wolau balöra ba nudura andrö, ba 75,000 labunu si fatiu tödö khöra, ba si so khöra, ba lö lababaya.
Lahonogöi owasa "Furimi" mbaŵa da'ö
II. 17 Ba zi me 13 ba mbaŵa Adara lalau da'ö, ba ba zi me 14, ba molombase ira, ba labali'ö baŵa gowuloa ba baŵa wa'omuso dödö. 18 Ba Niha Yehuda ba Zusa, ba no faoma owulo [ba wamunu udura], he ba zi me 13, ba he ba zi me 14, ba tobali ba zi me 15 molombase ira, ba luo da'ö labali'ö baŵa gowuloa ba baŵa wa'omuso dödö. 19 Andrö wa si me 14, ba mbaŵa Adara, labali'ö baŵa wa'omuso dödö ba baŵa gowuloa, si no amaedola gowasa Niha Yehuda ba danö, ba mbanua si zaewe ba danö misa, ba faoma lafa'ohe'ö khö nawöra gurakha.[16] 20 Ba itanö ba zura da'ö fefu Morodokhai, ba ifa'ohe'ö zura ba Niha Yehuda, idozigö öri barö mbawa razo Ahasiwero, he sahatö, ba he saröu; 21 ifakhoi huku da'ö khöra: ero röfi, ba labe'e baŵa si sökhi zi me 14 ba si me 15, ba mbaŵa Adara, — 22 la'ohia'ö mbaŵa andrö mege, ba nitimba Niha Yehuda si fatiu tödö khöra, ba baŵa si tobali fa'omuso dödö fa'atosasa, ba sitobali luo gowuloa fa'abu dödö — wamali'ö baŵa gowuloa ba baŵa wa'omuso dödö, ba zi faoma lafa'ohe'ö khö nawöra urakha, ba ba nibe'e-be'e buala ba zi numana. 23 Ba labe'e huku [ba khöra Niha Yehuda] zi no lafobörö andrö, awö nisura Morodokhai khöra. 24 Me no tödö Hamano andrö, ono Hamedata, ma'uwu Agagi, udu Niha Yehuda fefu, wamunu Niha Yehuda, ba me no ifalau'ö "wuri" — dahö-dahö —, ba wamakiko ya'ira ba ba wangohori,[17] 25 ba me no iŵa'ö razo — me no fahuhuo khönia Gesitera — me no ibe'e zura, alakha khönia tofana mangawuli dödönia famakiko andrö ba lataŵi ia ba gatunga, fabaya iraononia. 26 Andrö wa labe'e töi mbaŵa andrö "wurimi", börö "wuri" andrö, ba ösi zura no mege fefu, awö zi no falukha ira, ba he nirongora. 27 Ba lahonogöi huku da'ö Niha Yehuda, ba khöra ba ba nga'ötöra dania, ba he ba zi möi banuara, huku si tebai awu'a: la'amoni'ö mbaŵa andrö, si dua ngaluo, dali zi no mube'e ba zura ba fangohonogöi ya'ia. 28 Ba fa böi olifu ira mbaŵa da'ö ba ena'ö latörö, götö-götö wa'ara dania, dozi omo ba dozi öri ba dozi banua, fa böi taya ba Niha Yehuda mbaŵa "wurimi" andrö, böi manö olifu nga'ötöra mitou. 29 Ba labe'e ba zura fo'omo razo, Esitera, ono Gabihailo, ba Morodokhai, Niha Yehuda andrö, labe'e fangaronia wa'asalaŵara andrö, ba wame'e sura "wurimi" andrö si sambua. 30 Ba ifa'ohe'ö zura ba Niha Yehuda fefu ba nöri andrö si 127, amatöröŵa Gahasiwero ma'asagörö ihaogö linia khöra, soroi ba dödö, 31 ba wame'e huku mbaŵa "wurimi" andrö, ba ginötö nihonogöi, dali wa no labe'e huku Morodokhai Niha Yehuda ba fo'omo razo Esitera, awö wa no labe'e huku khöra ba ba nga'ötöra mitou gamakhoita andrö ba wamoni ba gö ba ba wangarö-ngarö. 32 Ba tobali huku nifakhoi ba "wurimi" andrö ba goroisa Gesitera; ba tetanö ba zura.
ESITERA 10: Esitera Faza 10
Fa'ebua Morodokhai
1 Ba ifobeo niha ba danö ba ba hulo razo Ahasiwero. 2 Ba fangoroma'önia fa'ebuania ba fa'abölönia, ba fangombakha lakhömi Morodokhai, me no ifolakhömi ia razo, ba no mutanö ba zura hikaya razo ba Media ba ba Weresia. 3 Niha Yehuda andrö Morodokhai, ba no tambalina razo Ahasiwero, ba no ebua döinia ba niha Yehuda, ba omasiö niwara fefu ia, me no sangalui fangorifi madora, ba me sohare niwara i'alui ba huhuonia fefu.