Wb/nia/Niha si faoma falimo
So föna niha si fahuwu, hulö zi fatalifusö ira. Ba ha samuza ma'ökhö, ba mofanö zi samösa andrö, möi ia mukoli. Ba so khönia ni'ogasö, fulu lauru böra fa'abua.
Ba me mofanö ia wekoli, ba möi ia muröi ni'ogasö andrö, khö zi fahuwu khönia no mege, imane: "He si fahuwu! Da'uröi khögu ni'ogasö andre ua, gasa-gasa wekoligu andrö." Ba imane si fahuwu khönia: "Lau, hana na öröi ia ba da'ö."
Ba me mangawuli niha no mege andrö, moroi ba wekoli, ba möi ia ba nomo zi fahuwu khönia, imane: "He zo khögu ni'ogasö no andrö, si fahuwu?" Ba itema linia si fahuwu khönia andrö, imane: "No ahori i'a te'u, si fahuwu." Ba imane niha andrö: "Lau, si fahuwu, akha i'a ia te'u."
Ba noa sa so bakha ba dödönia, wa nilimo ia ba ni'ogasö andrö.
Ba ha samuza ma'ökhö, ba itema itagö nono zi fahuwu khönia andrö, samini si'öli no mege.
Ba maoso zi taya ono andrö, möi ia musofu khö zi fahuwu khönia, si taya ni'ogasö andrö, imane: "Noa sa taya nonogu, si fahuwu." Ba itema linia si taya ni'ogasö andrö, imane: "Noa sa u'ila, me ma'ökhö, nonomö andrö. No ikhai moyo."
Ba maoso ira, faoma momöi mangadu ba zalaŵa, ba faoma latutunö mbörö walimosara andrö. Ba imane salaŵa khöra: "Si faoma falimo ami andrö, mifaoma mifuli zi taya nawömi, ba böi sa'ae mitohugö zi manö."
Umbu[edit | edit source]
Heinrich Sundermann, "Amaedola ba Manömanö" bakha ba Niassische Texte mit Deutscher Übersetzung, 's-Gravenhage, Martinus Nijhoff, 1905, nga'örö 28.