Jump to content

Wb/nia/Möi Milo

From Wikimedia Incubator
< Wb‎ | nia
Wb > nia > Möi Milo

Fehede Sadogo-dogo[edit | edit source]

U'owai ami ba Li Niha, umane Ya'ahowu. Ba zi lö ara sibai, fefu niha si so ba da'ö, oi lafaigido, so zamahökö ya'ia, ba so zanema faoma Ya'ahowu. Lö uradö, utohugö wofanö möi milo. Fakhamö, ufahasudo ma'ifu, me lala ba nahagowi manösö, ba izumaigö manoru-noru deu. Itörö tödögu, me ide-idedo hewisa me ilu'i ndra'o inagu möiga wanga'i eu. Si lö olifudo, ero i'ohedo wemilo, amaingö dödönia ba wanema sinofu si lö aetu-aetu. Meluo da'ö usofu khönia, hadia nifotöi Milo. Hiza fao fehasu-hasunia ba wanösö hili andre, ba ifatunö khögu, Milo ya'ia da'ö: Fe'amöi niha ba kabu, ba wangalui soguna simane ö gurifö, eu galitö, bua zinanö, btn. Da'ö waö-waö wemilo ba Danö Niha, yamendrua nasa na luo wangöhöna. Fangöhöna andre, femilo ba kabu, ba ngaluo hari sabtu. Aefa manga ba zilaluo, arakhagö fefu niha ba nomo baero ndraono mofanö ba kabu. Fangawuli ba nomo itaria no aekhu luo, fandrundru ogömi, ma mohede riŵi, na lafaedogö ia dandraluo, ba zi bözi fitu bongi. Simanö, fangombakha side-ide sifakhai ba wemilo. Hikaya Möi Milo andre, halöŵö wedao-dao namada sanura ba Wikibuku Nias, ba wangoya'ö ngawalö hikaya sifakhai ba Li Niha. Hiza, omasi sibai namada Ama Sandro andre ma töi sangoguna'önia ba Wiki ya'ia da'ö Yasanto Lase ba wonönö ngawalö zinura ba Li Niha, fanötönania ma sa so ba gotalua zombaso hikaya andre, terou dödöra ba wonönö fangi'ila nisura ba Li Niha. Sambua fa'atedou, me Li Niha andre fao ba gangolifa felelima li moroi ba zi fitu ngaotu a feleŵalu wehede daerah zi no faböbö ba halöŵö nifalului zato ba Wikimedia Indonesia. Me ubaso zinurania siföföna nibe'e högö zura Si Miki ba Si Kimi, ahöli-höli dödögu hewisa wa sagu ia wanura zinura andre, irege omasi sibai zombaso naso zui zinura sibohou, ba hiza iada'a tola tabaso zui zura sibohou nibe'enia högö Möi Milo. Si so ba hikaya da'a sambua ngambatö sowölö'ölö ba wangahaogö kabu, sotöi Ama Basitö, donania Ina Basitö, so khönia nono sambua ba gadolu sotöi Basitö, fa'aurira aröu ba wa'afaŵai-ŵai niha, lö khöra ngaluo sinaya, migu, zumaha ba tanöbö'önia, ero inötö ba lalau ira ba kabu sebolo sibai ondröita zatuania. Ba hikaya da'a, ba zi lö mudödöna, Ama Basitö, tobali niha so'okhöta si tehöngö ba danö si so ya'ira. Hiza na so atö dania ba hikaya andre, zifagölö töi nono, töi mbanua, töi mado, böi mibe'e sibai ba dödö, me fefu da'ö ha hikaya tenga sindruhu-ndruhu. Ena'ö böi manofu-nofu dödömi sombaso zinura andre, mibaloi gamatohulania tou ba da'a.

Tumbu Basitö[edit | edit source]

Ama Basitö, so feledölu ira sifatalifusö sambua mo'ama. Ba ya'ia andre, siakhi nono khö namania. Töinia meföna, na ato ndraono, ba no harazaki da'ö, lamane ato zo mbambaya halöŵö ba kabu. Lö uzara-zara, Ama Basitö andre, niha sohau-hau sibai, me lö irai irasoi wa'omasi zatuania, me ba wa ide-idenia mege, ba iröi ira amania, ha ba zi döfi gotaluara Nina Basitö, oföna Nama Mbasitö mondröi ulidanö. Moroi ba zalua da'a, Ama Mbasitö andre, taraso sibai khönia hewisa lala wa'auri. Ira ga'ania, no oi so ni'urusaira ngambatöra, meluo da'ö ha tö darua ira ganete yaŵania ndraono side-ide. Ba nomo gondröita zatua, ha darua ira ga'ania, ba ira ga'ania tanöbö'ö moziwili misa, ba zahatö ba ngai nomo zatua, so öfa ngambatö. Ama Mbasitö andre, ma tönia sindruhu Tanömö (töi ba hikaya da'a, tenga sindruhu-ndruhu), fatua lö laröi gulidanö satua ba no mombagi harato, ba Tanömö ebua ma'ifu gondröita zatua khönia, sambua nomo zatua, ba so ba zi lima nga'örö kabu. Me luo da'ö, lö manö i'ila mbalö, inönö me no izumaigö taraso khönia hewisa wa'amate zatua, ba sambua zi tola labali'ö ia dohöfa ngambatö da'a, me no hasara-sara sibai dödöra ya'ira si feledölu wa'ato ono namania. I'otarai ba wa'ide-idenia, ba lö laröi ia heŵa'ae hatö darua ira ga'ania fanetenia zi so ba nomo sebua andrö, ba ero inötö tohare ndra ga'ania ba wamaigi ya'ira. Lö sa'ae uzara-zara, ofeta ebua Danömö, ba ha irugi kalasi önö SD (Sekolah Dasar), ba ibörötaigö owölö-ölö ia wohalöŵö ba simanö göi ba wo'urusi mbolo kabu dana khönia. Fefu zinöndra moroi ba hasila kabu dana khönia, ba ifagogohe'ö khö ga'ania, ba so ba zi ngafulu fakhe gefe andrö, no la'irö'ö so garate ba so göi loga-loga.

Samuza ma'ökhö, momöi milo darua ira ga'ania, me ya'ira andre lalau manguri bawi soya. Arakhagö ero samigu ba so manö niha sowöli ono mbawi khöra. Me no aefa lahalö geu galitö, ba lateteu öra lada si so ba nahagowi, ba lahalö ma'ifu mbulu gowirio, öra sayu dania tanö'owi, ba lalau molombase ba nose si so ba hinölu nahagowi andrö khöra, ba lalau fahuhuo darua ira ga'ania. "Hega'a, hadia lö tumbu ba dödömö wangowalu?" Tokea ga'ania ba itema imane: "He, Tanömö, "Na tola ua, ba ta haogö nomo zatua andrö khöda, faoma talau nomoda zamösana, irege dania na inötö mongambatö ita, no ahono dödö nahiada, ba omo zatua andre, tabali'ö ia naha wa'owulo-wuloda ya'ita sifatalifusö." Ba zi lö ara sibai, ba mangele nidanö hörö Danömö, me itörö sibai dödönia namania ba inania. Me i'ila da'ö ga'ania, ba ifasaulesi wehede, ena'ö taya sabata ba dödö Danömö ndra satuania. Ifuta ia ba gambölö, ba i'osanofu zaembu zi'öli ia khö Danömö. "He, nakhi, hezo zaembu zi'ölimö andrö, arörö no taya?", ba i'anema Tanömö ilau musindro, ba ifakhölö ia ba zitambai nose, irege taya megeno wa'asöndru dödönia. Ba lö ara, saembu zi'ölinia, tou ba ngai ga'ania so.

... Matohugö ba wa'alio...