Wb/nia/Luka/19/Fe'amöi ba Yerusalema
29 III. Ba me no ahatõ ia ba Mbetifage ba ba Mbetania ba gahe hili andrõ, sotõi hili wanikha, ba ifatenge nifahaõnia, darua, 30 imane: Miʼae ba mbanua sideʼide andrõ, fõnami, ba na mirugi yomo ba daʼõ, ba miʼila nono galide niʼamõhõgõ, si lõ irai laʼokudo niha; ba mitotoʼõ wesu, ba miʼohe ia. 31 Ba na so zanofu khõmi: Hana wa mitotoʼõ? ba mimane: Moguna khõ Dua.[1] 32 Ba mõi zinenge andrõ, ba itõrõ niw̃aʼõnia khõra. 33 Ba me latotoʼõ wesu nono galide andrõ, ba lamane khõra sokhõ yaʼia: Hadia wa mitotoʼõ wesu nono galide andrõ? 34 Ba lamane: Moguna khõ Dua. 35 Ba laʼohe khõ Yesu, labeʼe ba hulu nono galide andrõ nukhara, ba lafakudo Yesu yaw̃a. 36 Ba me mofanõ ia, ba labologõ nukhara ba lala. 37 Ba me arakha irugi zanue hili wanikha andrõ, ba labõrõtaigõ nifahaõ fefu lasuno Lowalangi, omuso dõdõra, laʼebuaʼõ lira, bõrõ waʼabõlõ andrõ fefu, niʼilara lamane: 38 Yaʼahowoe razo andrõ, ba dõi Zoʼaya, faʼohahau dõdõ ba zorugo ba sumange ba mbanua si yaw̃a![2] 39 Ba so warizaio õsa, awõ niha sato, ba lamane khõnia: He samahaõ, tenaw̃a nifahaõmõ andrõ. 40 Ba itema lira, imane: Uw̃aʼõ khõmi, na lõʼõ saʼae hedehede daʼõ, ba muʼao gara. 41 Ba me ahatõ ia, me iʼila mbanua, ba meʼe ia ba khõnia, imane:[3] 42 Enaʼõ na aboto ba dõdõu gõi, ba mbaw̃amõ andre, hadia wangohahau dõdõu, ba iyaʼe, ba no tobini ia khõu! 43 Irugi sa dania baw̃a khõu, ba lakõlini ndraʼugõ emaliu ba lafasui ndraʼugõ, ba laforege, fasui manõ.[4] [5] 44 Ba larasa ndraʼugõ, fabaya onou, awõu, ba lõ tosai khõu zi dombua kara, si falaete, labeʼe, bõrõ wa lõ saboto ba dõdõu mbaw̃a wamaigi yaʼugõ andrõ.[6] [7]
(Luka 19 : 29 – 44)