Wb/nia/Da'e Mene-menegu Khömi Onogu

Buku andre utandrösaigi khö nonogu Nico ba Nikita

Saohagölö me no so ami ba wa'aurigu. I'oroi me igide-ide ami ofeta ma'ökhö ba alukhö mibusi dödöma. Iraono si sökhi amuata ami.

Fehede famasao

Ya'ami iraonogu, sidarua, ni'omasi'ögu, lö okhöta sitola uröi khömi na no dania uröi gulidanö andre. Ha ya'ami sidarua andre gondröitagu, nogu. Börö da'ö, ufa'anö mbuku andre ena'ö tola mibaso dania ero-ero na itörö tödomi ndra'odo. Ba tola göi tobali mibali'ö balö huhuomi khö ndraonomi ma khö ma'uwumi dania, na omasi mifatunö khöra haniha zatuami.

Ba wofa'anögu mbuku andre ba li Niha sitobali tandra wa tohare ami moroi ba Danö Niha nogu. Domi ba no do nono niha. Heŵa'ae ambö ami ba wahuhuosa ba li Niha, börö me tumbu ami ba Jakarta, ba faduhu-dödögu wa tola dania mifo'eluaha ia ba li somasi ami. Me ba ginötönia dania, li Niha andre ba no tola fagölö ia ba li tanöbö'ö sitola tefo'eluaha samösa molo'ö fa'atua-tua ni'otomosi (artificial intelligence/AI).

Gofu haniha zombaso buku andre ba tola mibe'e zöndra awö hadia zo'amböta ba ngawalö goi-goi wanura ba Li Niha, mazui tesöndra zifasaule hurufo ba wanura ya'ia.

Me tesura mbuku andre ba Wikimedia, ba no tobali ölö zato. Lö dali mu'andrö wa'ahele dödögu na so zomasi mu'oguna'ö ia ba mbolokha bö'ö. Ha ya'i da'a na lö fatimba khömi mifatunö wa si'oföna zama'anö buku andre ba ya'ia Apolonius Lase ba ndröfi 2024.

Ösi mbuku andre ba tefa'anö ia ba ziha'uga faosatö. Ba ero faosatö mo'ösi ia ngawalö menemene ba ndraono. Hasambalö wa fagöna sibai labaso ira satua irege tola lafalua göi ba ndraonora. Si manö göi khö ndraono, baga sibai na laboso mbuku andre. Andrö, khö ndra ama ba ina samahaö ba zekola (guru) tola mu'oguna'ö nösi mbuku andre ba ndraono zekolami. Sambalö, ba ndraono zekola, tola la'ila ba tefasugi khöra Li Niha, ba baero da'ö tola göi lasöndra danömö mbua-bua sisökhi si so bakha ba mbuku andre.

Böi aohasi nawömö

Fangaohasi awö ba itaria alua ia na so ita ba gotalua zato. Na ta'ila niha si lö fagölö li khöda, ba itaria ta'ositengagö. Na so nawöda sambö baga nukha, duma-dumania, ba böi so khöda wangaohasi nogu. Böi mi'anema'ö mihole'ö mbawami, mendrua manö na mangendrilo ami. Böi nogu. Fefu niha, gofu haniha manö, ya'odo, ya'ami, awömi, ba no sifagölötö ita. Na so zi tohude ma'ifu ba no da'ö nifotöi buala khö zisamö-samösa niha. Ba na so zitohude khömi ba tebai möi fangala ba niha bö'ö.

Mi be'e ba mbörö dödömi da'a, na muhede khömi niha, ya mendrua na satua moroi khömi, ba mitema lira, mifaigi hörö zogaoni ya'ami, böi mi'erogö. "Hana Ama", "Hana Ina", "Hadia zitola utolo, Ga'a". Mimanö wanema-li zogaoni ya'ami. Böi mi alaŵagö note li ma mi'ebua'ö limi, ba böi göi ide-ide sibai. Me tola manö te'öndru wönu niha samondrongo limi. Andrö, ya li sisökhi nifarongogömi ba niha, nogu.

So sambua gamaedola sisökhi soroi ba Danö Niha, "tufoi mbeweu bulu lato atö muhede'ö". Bulu lato andre ba no sambua sinumbua sitehöngö sibai ba Danö Niha me bulunia mobiso. Aburu mane sakhosi ba galitö ba ali-ali gulida sigöna bulu zinumbua andre. Andrö dania da'ö mbörö wa labe'e ia tobali amaedola, ya'ia da'ö ba wamasugi khöda ena'ö lö tetutu dödö niha ba wehededa ba da ta'angeraigö hadia ia wehede sisökhi sinangea taŵa'ö. Na ero taŵa'ö zambö fagöna, falele duma-dumania, ba hulö no so mbulu lato ni'osigö ba mbeweda.

Simanö göi ba niha sawuyu-wuyu moroi khömi, böi mi'aohasi ira nogu. Mihaogö khöra, na mangandrö dolo-tolo ira khömi ba mitolo soroi ba dödömi.

Mitöngöni da'a

Barö ginötö sambö sökhi iada'e ba ya atua-tua göi ami. Me oya göi niha si lö sökhi sama'ala ya'ami. Andrö na ba zato niha so ami, ba böi göi aösö sibai mifaduhusi tödö niha si lö fa'ila khömi. Ba bandara duma-dumania, so niha zangandrö tolo khömi ba wololohe ma wanarogö gama-gamania, me ilau mofanö sangatö. Böi migo'ö da'ö, öŵa'ö khö niha andrö wa tebai öfalua simane ni'andrönia. Afu aboto ba dödömi, no aya sibai zalua, sokhö gama-gama andrö edöna ibe'e ita ba wangala, me ösi gama-gamania andrö ba gama-gama sitebai mu'ohe ba pesawat. Tola manö labali'ö ita dela ba wama'ala ya'ita irege tehuku ita, ba lala khöra ba wangandrö kefe khöda.

Atalisi wo'ölömi

Me iraonodo mböröta, te mato 8 fakhe ndröfigu (1981), ba asese urongo gamaedola namagu, fatua adogo-dogo gambala, ba ököi'ö gaheu. Eluahania, böi alaŵa molö moroi ba ngöfi, fatua lö hadöi oya zinöndrami, ba mihide-hide, mi'irö'ö wo'ölömi.

Na misöndra 10 nogu, ba tana ni'irö'ö, molo'ö niŵa'ö-ŵa'ö ndra ere, ba mibe'e yaŵa 3. Mi'alui lala ena'ö girö-girömi da'a tebai muhalö ia ba wa'alio.

Baero da'ö ba miföfögö 3 moroi ba zi-7 tö, da'ö höna-höna dödömi ba ginötö wa'atosasa. Na hadi-hadia'ia zalua ba tola mu'oguna'ö ia.

Da'ö lö tola lö'ö mifalua ena'ö na baŵa wa'atosasa mifönami ba no so lohe-lohemi.

Si-4 tö da'ö zitola mi'oguna'ö si'ero ma'ökhö nogu. Misaigö-saigö, na lö moguna sibai ba böi ua mu'öli, ni'oföna'ö wowöli soguna sibai.

Oya zalua ni'ila-ilada, wa ero so gefe ba i'anema'ö la'öli hadia manö, heŵa'a'e lö guna dania khöra.

So manö niha, no so mato 3 ma 4 mbadagahenia ba ösö nasa i'öli mbadagahe sibohou. Lua-luania, tekiko mbadagahe andrö ne lö asese mufake.

Simanö göi si no so 5 tasi ni'ohe-ohe na mofanö, ba ösö zui la'öli tasi sibohou. Böi migo'ö da'ö nogu. Mibönökhi ami molo'ö ba wa'aso khömi. Böi mitalu'i dekhe. Me fa'anumana zifalukha ami dania.

Böi halö zi tenga khöu

Mi'angelama wa oya manö göi lala gafökha ba wo ekhugö ya'ami tou. Böi mitehe aekhu ami ba lala si lö atulö. Böi mihalö zitenga ölömi.

Oya manö nirongo-rongoda, börö me alaŵa dekhe, ba so dödö mangosikayo, ba hadia zalua, manakoe bakha dödö. Si tenga ölönia, si tenga tana khönia ba lahalö, latagö. Lua-lua möi bakha ba gurunga.

Andrö nogu, mi be'e ba mbörö dödömi da'a. Ba mböböi sasi'asimi auri ami. Sitenga ölömi ba böi mihalö. Böi so khömi wangakali awömi. Mi be'e fönami wa'atulö dödö. Hadia zatulö da'ö miŵa'ö. Mi'atunösi fefu hada'ia molo'ö goi-goi.

Moguna wamadaya

Fangatalisi faehu ira 'atali', heŵa'ae mo'amakhaita. Fehede 'fangatalisi' fagöna ia ba wotenagö yaŵa moroi ba zinöndra ero waŵa ena'ö böi i'anemai'ö ahori zinöndra.

'Atali' ba no tefadege geluahania ma'ifu. Duma-dumania, no asika mbarunia, tebai mena sa'ae mufake ba gödo, ba börö wa'atali, ba ifake manö. Tenga sa'ae ya'ia göi da'ö.

Fa'auri andre ba moguna göi tafadaya. Andrö mohalöŵö ami ba ena'ö göi ohau dödömi. Hadia geluaha göi natobali ami duduma hörö niha me fabö'ö samösa ami. Mifaigi göi zinangea.

Setaigö gohitömö ba ndöfi

Na nano irai mibaso ba so wehede sasese sibai iŵa'ö amada Soekarno , Ama Proklamator, wa mi saitagö gohitö dödömi yaŵa ba ndöfi, na atö aekhu ia ba tosake ia ba lawuo.

Eluahania, migohi wa'atua-atua nogu, milau ndregemi ba wogohi sekolami. Hadia zomasi tobali ami ba mi gohi da'ö, irege tola misöndra.

Hadia manö gohitö dödömi ba mi be'e ia ba mbute lai . Ba mi'abe'e dödömi wa tola mifalua ia.

Hadia zomasi Soekarno ba ikhamö, tobali ia Presiden siföföna ba Indonesia. No itötö'u wa'atobalinia Presiden. Ilau ndregenia irege tola ikhamö gohitö dödönia.