Wb/mni/শামু অঙৌবগী মচানুপী/২

নোংমা লম অসিগী রাজকুমার অমনা জঙ্গলদা শা তানবা লাকপদা নুপীমচাসিগা কোক হেক থেংনবদগী মাগী ফজবা মশকসি উবদা রাজকুমার অদুনা পামলমই। জঙ্গল অসিদা লৈরিবসিবু মীরা লাইরা, লাই ওইরে থেংনরগে, মী ওইরে ফারগা পুণ্ড্রগে হায়দুনা নুপীমচাদুগী মৱা হংবদা মাদি মীনি শামু অৗেবগী মচানুপীনি হায়না তাকলমই। মথংদা অমুক রাজকুমারসি লাত্তুনা কন্যাসিগা লুহোংলসি হায়বদগী য়ান্নরে। লুহোংবদা তাইবঙ মীদৌনা লুহোংবা য়াদে মপা শামুনা মাবু সোয়দনমক্কী হাকনি হায়রে। ফরে মহাক্না হায়বদো তৌগনি হায়না য়ান্নরে। মপা শামুনা লাক্লবা মতমদা তাইবঙ মীনম নমবদগী কনা লাকম্বগে হংবদসু কনাসু লাক্লমদে মাসু মীনি অদুনা নম্বা ওইরমনি হায়না মপাদা মীনন্থা ঙাংখি। মপা শামুনা মঙোনদা শাপ তৌখিরমই, 'নপাদা মীনম্বা ঙাংবা করিগীনো, মফম অসিদা উন্নরিবা নখোয় অনী লৈমিন্নবা ফংদবা ওইয়ু।

নোংঙানবগা মপা শামুসি চৎখিবা তাঞ্জা য়েংলগা রাজকুমারদু লাত্তুনা নুপী মচাদু পুদুনা চৎখিরম্মী। শামুনা হল্লকপদা মচানুপীসি লৈরমদ্রবদুদা লাপ্পা য়েংবদা মখোয় অনী চৎমিন্নবা উবদা ফরে চখ্রস খন্দুনা ৱা অমতা হায়দনা লৈহৌরে। রাজকুমারনা নুপীসি য়ুমদা পুশিন্দনা খোংনাং মখোঙদা ফমহন্দুনা থম্লল্লগা মপা নিংথৌদা মশক মতৌ ফজবী অমা পুররে নুংঙাইবা ইমুংগী মচানুপীনি লুহোংবিয়ু হায়বদগী নিংথৌনসু য়াবিরমই।

সোমদনা লম অসিগী মশক থীঘ্রবা য়াম্না ফত্তবী নুপী অমা লৈরমই। মহাক্না ঈশিং শোকপা থোরকপা উবদগী নুপীমচাদু খোংনাং মখোঙদা ফল্লম্বদগী উথক্তা কাখভুনা লৈখরে। মানা ঈশিং শোকপগী ঈশিং হায়দোকপদা খোংনাং মথক্তা ফমলিবী অদুগী মমি ঈশিংদা তারা উবদা মশাগী মমি ওইরবোই নিংদুনা মতোমতা খঞ্জরমই, ‘অসুক ফজখ্রবা ঐগী শকসিবু মীনা য়েংনদ্রিবসিবো করিগীনো ? অমুক্কা ঈশিং হায়দোত্তুনা য়েংবদা মশাদি ওইরমদ্রদুনা ওসাইগী খোংনাং মথক্তা ফমলিবীগী ওইরম্মী। অমুক্তা কুমথরকউ ঈশিং থোংগৎপীয়ু হায়না কৌথরগা করিগী লৈরিবনো হংবদা ৱারম পুম্নমক তল্লবদা পুথ্রিদুদা নমশিন্দুনা হাতোকলে অদুগা মহাক্না ফিরুক খুমজিল্লগা খোংনাং মথক্তা কাখতুনা লৈখরে।