Wb/mni/শজিগা ক্বাককা মতা শান্নবা/২

লমহুইনা ফরেদা মহাক্না নিংদুনা লাকপসিদি মফমসিদা লৈরেদনা খল্লকই। হৌজিকমক ইতা শক্তি লৌরুদবা যাদে হায়দুনা শক্তি অদুগী মনাক্তা লাতুনা হৈব্ৰু চারুসি হায়দুনা শজি অদুবু তাৎ তৌদুনা পুবিরকে। লমহুই অদুনা লাং লৈবা মায়কৈলোমদা শক্তি অদুবু পুদুনা লাকে। লাইবক থিবদগী শজি অদু লাং অদুনা থুবদী মখোঙ মখুৎ অদু ফনা কন্না হোৎত্নরবসু নান্থোকপা ঙমদরে। লাং অদুসু হাইগৎলাং ওইরম্বদগী উ কাচি অমগী মথক্তা হাইগৎখিদুনা লৈখবোইরে। লমহুই অসিনসু চাবা ফংদরে মানা নিংবা পুম্নমক লোইনা কায়রে। লমহুইনা অমুক খল্লকই লাং থাক্লিবা নিপা অসিনা লাংদগী শক্তি অসিবু লৌথোক্লগা শেম্লকপা মতমদা মহাক্না চেনশিল্পগা লাতুনা চাথোকে খল্লদুনা নাথৈদুনা মফমদুদা লৈরম্মী। শজি অসিনা মতা ক্বাক অসিবু নিংশিংলক্রুনা হন্না-হন্না কৌজরম্মী। ক্বাক অসিনা শজিদুনা কৌবা তারদুনা মনাক তমা পাইশিল্লকপদা হাইগৎলাং অমনা শজিদুবু থুদুনা লৈৱম্বা উবদা য়ামা মঞ্চায় ৱানা শজিদুদা হংলক্ষ্মী। ৱারী পুম্নমক শজিদুনা লিবদগী মহাক্না লোইনা খঙলক্ষ্মী। ক্বাক্না রাখল তৌরগা হায়রকই “ইতা শক্তি ঐদি নঙগী নম্বায় কনবা ঙমগনি হায়বসু থাজদে অদুবু ইতা লাংগী মপু অসিনা লাকপা মতমদা ঐনা ইতা নঙগী নিঙ্গোং অসিদা ইচিল অতুম্বা অসিনা হন- হনদুনা চাগে। লাং মপু অসিনা ভরাং শিবা ওইরমগনি অদুনা পুল্লল্লগনি খন্দুনা লৌথোক্লগা লৈবাক্তা থম্বা মতমদা ঐনা ‘ইতা’ হায়না কৌরকপা মতম অদুদা হৌগত্তুনা চেনখরো। ইতা নঙ ঐগী ইচিল অসিনা হনবা মতমদা নারবসু লেংদনা লৈয়।” অসুম্না শরৌ শিন্নরবা মতুংদা মখোয় অনীমক লাং মপু লাকপা ঙাইদুনা লৈখিরমই। লাং কায়বা লাকপা উবদা ওসাই কাকনা হায়বা অদুম্না শজিদুদা তৌরম্মী। মদু উবদা লাং মপু অদুনা গুরাং শিবা ওইরম্ননি অদুনা পুল্লল্লনী খল্লম্মী। মতমদুদা কাকনা ইতা হায়না কৌরকপগা শব্জি অদু ফুক হৌগতুনা লমহুইনা লোলগা লৈবা মফমলোমদা চেনশিনখিদুনা লোক তয়া চেনখিরম্মী। মতম অদুদা লাং মপু অদুনা শজি অদুবু তান্নরকপদা লুমদুনা লৈরিবা লমহুই অদুবু থেংনদুনা লাং মপুদুনা পায়রিবা তা অদুনা লংদুনা হালগা লাইনা তন্বীরক্লবনি খনদুনা ময়ুমদা মদুবু পুদুনা হনখিরমই। লানজদবা শজি অমোম অদু য়েক্লবশিংগী মখুত্তগী নানথোক্তুনা নুংঙাইনা পানখিরম্মী।