Wb/mni/লুখ্রাবী অনী মতা শান্নবা/২

মমৌ অদুনসু মপুরোইবা অমদি মনেমগী সেবাদা কায়বা লৈরমদে। নিংথৌগী মচানুপীদুসু মনেম মপুরোইবগী সেবাদা লৈকাইগী তমজনফম ওইরম্মী। নিংথৌ মচানুপীগী মনেম অসি য়াম্না কন্না নারে। মতমদুদা মমৌ নুপী অদুবু চাক চখোম অমতা ইল্লুলাউ হায়দুনা কৌরগা, থোংবা থাকপা পুম্নমক তৌহল্লগা নিংথৌগী মচানুপী অদুবু মনেমদা চাক ইলহল্লম্মী। অদুবু মনেম অদুনা চাবা য়াননবা অহাও অথুম ঙা চাক্তি থোংহল্লমদে। মদুদা মচানুপা অদুনা ইমানা তৌরিবসি করিনো হায়দুনা খনখিরম্মী। নারিবা মনেম অদুগী থৱায়না করবনা শিরমদায় ফাওবা চানিংবা অমতা পিজদ্রিবসিবু করিগীনো মঙোন্দা অমুক হনজিন্দুনা পোকপা হৌনদে হায়দুনা হকচাংগী থোঙ খুদিংদা কাওশিনখি। মনাতোন্দা কাওশিনবনা মনাতোন ফৈরে, মমিত্তা কাওশিনবনা মমিৎ তাংলে, মচিন্দা কাওশিনবনা মচিন ফৈদুনা ৱা ঙাংবা থোক্তরে, মনাদা কাওশিনবনা মনা পঙলে, অসুম্না ভাংলিবা, কাওশিল্লিবা ময়াম অদু মমৌ সতী অদুনা ঙাংবা ওইনা মনেমদুনা তাবগা লোয়ননা থৱায় পাইথোকখিদুনা মসিদগী মপি তাদুনা কপচরগা শিখিরমই।

খরা লৈরগা অসোমগী মতা লুখ্রাবী অদুসু নাদুনা শিরে। শিবা মতমদা অতোপা লুখ্রাবীগী মমৌ অদুবুদি নিংযৌগী মচানুপী অদুনা হেন্না কপলক্ষ্মী। মরমদি মাগী ফরম্বা ময়ামদু খলুবদগীনি। ময়ুমদা লাগা মপুরোইবা অদুনা ইতাওগা নওগা মরী লৈনরবনি। মরমদি ইমা শিবদনা করিমতা কপত্রগা ইতাওগী মমা শিবদনা য়াম্না কপ্পী হায়দুনা চৈখিরম্মী। নিংথৌ মচানুপী অদুদি মপুরোইবা অদুদা লমচৎ করিমতা কায়জরমদে।

নোংঙাল্লকপদা নিংথৌগী মচানুপী অদুনা থোক্লকপা উবদা উচেক অমনা হায়রকই - নখোয়গী অৱাং থংবা তুরেল অসিদা নিংথৌগী মচানুপী কন্যা অমা মখুত্তা সনা খুদোপ য়াইওইবা থোকউ হায়বদা থোকপা অমা শিরগা তুরেলদা তাওদুনা লৈরে, পরপ পরপ লৌহৌরু।