Wb/mni/য়োং অমসুং অঙাং/২

অদুগা লিন অমোম অদু ঈশিং থক্লগা হনখ্রে। মতম অসিমক্তদা য়োং অসিসু মীকপ থোক্লক্লে । মহাক্না মীকপ হেক থোলকপদা খঙনিং নীংশিংলভুনা অঙাং অদুবু য়েংলুবদা অঙাং অদুদি মুশুক মুনা কাহভুনা শিদুনা লৈরশ্নে। মদু উবদা য়োং অসিনা খল্লি। অঙাং অসি লিননা শোয়দনা চিলম্বা তারে। অদুনদি মপা মমা লাফ্রিঙৈদা অঙাং অসি হিংহন্দবা য়াদে। অসুম্মা খল্লদুনা য়োং অদুনা শিদয়াই থিবা চখে। মমা মপানা হেক য়ৌরকপদা অঙাং অদু মুশুক মুনা কাহত্তুনা শিদুনা লৈবা উরে। অদুগা য়োং অদুদি লৈরমদ্রে। অদুদগীদি মখোয় মতৈ মনাওনা মচা অদুবু কোন্দুনা নোং খোংবগুম কল্গুনা লৈরে ।

অসুম্না কপ্লিঙৈ অসিদা য়োং অসিসু য়াই অমা উল্লগা ময়ুম তমা পরপ পরপ চেল্লক্লে। মদুদা নুপা অসিগা নুপী অসিগনা য়োং অদুবু হেক উবদা শাউমনখিদুনা উতুপ্না থাদুনা হাত্তোক্লে। মতম অসিদা য়োং অসিগী ময়াদী ইরং লংবা পোৎ অমা চোংথোরকে। মদু উবদা মখোয় মতৈ মনাওনা য়াই অদুবু খুল্লগা অঙাং অদুগী ময়াদা হাপচিনবা মতমদদি অঙাং অদু তুম্মুবগী মতৌগুয়া হৌগৎলক্রুনা ঈশিং অদুদা শান্নদুনা লৈয়ে।

অদুগা মখোয় মতৈ মনাওনা খন্নৈ অঙাং অসি করিগুম্বা লিন অমনা চিত্তুনা শিরম্বা তারে। মদুদা য়োং অসিনা শিদয়াই থিবা চৎলম্বা তাই। ঐখোয় অসি ৱাখল ওন্থোক্না থেনথ্রেদা অসুক কান্নাবা য়োং অসিবু ৱাহং পাউহংদবা মখৈ শাউবনা হেনমন্দুনা হাত্তোকপীরে। কোন্না অচুম্বদু খঙলক্ষবসু অশিবদুদি হিংগৎলকউ য়াদবনিনা মতৈ মনাও য়াম্না নীংঙমদনা পুন্সি লেনখি।