Wb/mni/মণিপুর অমদি ম্যান্মার/৪শুবা তাংকক্

পঞ্জহৌনীংবা ৱাফম অমনা – মৈদিংঙু চরাইরোংবনা মহাক্কী - মচাইবেম্মা চকপা মখাওঙম্বীগা নুংশি মরী লৈনরম্মী হায়বা পোলেম শাগৈগী ‘পোল্লিবা লমথোক’ কৌবা পাখং অমবুসু কৈশুমশদা থমজিনবীখিরম্মী। অদুবু চকপা মখাওঙম্বীগী পীবুকনুংদা য়াওখিবা পোল্লিবা লমথোক্কী নুংশি খুদোল অদুদি ঔৱা কোনুংদা অদুম য়ৌখে। চহী অমগী মতুংদদি ঔৱা লৈমা চকপা মখাওঙম্বীবু লৈমরেম্বী ফমথোন দগী থৈথখে হায়বা মৈদিংগী মনাকোংদা তারে। লোয়ননা ঔৱানা লৌশিনখিবা চকপা খুঙ্গংশিংদুসু হঞ্জিল্লকখিদ্রে।

মৈদিংঙু চরাইরোংবনা মহাক্কী মচানুপীবু ইকায়বা পীবা অমসুং মখোয় ঔৱাশিংনা লৌশিনখিবা খুঙ্গংশিংদুসু হন্দোক্লক্রবদা ঔৱাশিংগী মথক্তা লমন খুম্নবা খুজিল থৌরাং লৌখৎলম্মী। হায়রিবা থৌরাংসিদা মৈদিংঙু চরাইরোংবনা নোংচুপলোমদগী মীচং খোম্বদা বৈদিক লাইনীংদা ওনশিন্দুনা কালিক (দেবী) লাপা হৌখিরম্মী। মৈদিং চরাইরোংবনা শক্তা, লাইনীংদা য়ূম্ফম ওইবা ক্ষেত্রিগী লীচৎ লৌদুনা শক্তা লাইনীংদা লাইমীং লৌখিবসি কুমজা ১৭০৪দনি। মতুং তারকপদা বিষ্ণু, রাধা কৃষ্ণনচিংবসু লাপা হৌখি। মৈদিংঙু চরাইরোংবগী পুলি তেল্লকপনা কুমজা ১৭০৯দা মশাগী চহী ৩৭ শুরকপদা পুকচৎপা লাইনানা নাশিল্লত্তুনা মৈদিংঙুগী পুন্সি চেংজেল লোইখিরম্মী। মৈদিংঙুনা থুপলমদাইগী মতমদা মচা ইংঙো অহল নিংথম ময়াম্বা (পামহৈবা/গরিবনিৱাজ) দা মচানুপী চকপা মখাওঙম্বীগী লমন শিংনবা শীরন্নরমখি।