Wb/mni/মণিপুরদা মৈহৌ লাংপোক থোকপা

মণিপুরদা মৈহৌ লাংপোক থোকপা লৈঙাক্না লৌখপা য়াবা থবকশিং লৌখৎসি।

মনিপুরদা মৈহৌ লাংপোক থোকপদী য়ুম, দুকান কয়া মৈ চাতুনা লন-থুম করা মাঙতাকপদা নওনা মীশি-মীনা ফাওবা নংবগী থৌদোক মশীং নাইদনা থোকখে। অদুবু অসিগুম্বা তম্বা ঙমদ্রবা থৌদোকশিং অসি মতৌ করয়া থোক্লিবনো হায়বগী মতাংদা মরম চানা থীজিন হুমজিনবগী থবক চখদুনা অশেংবা খঙদোক্নবা হোৎবা পাক উদ্রি হায়বা য়াই। মসিগা লোয়ননা অসিগুম্বা থৌদোকশিং অসি মতুংদা থোক্তনবা মীয়ামদা মতিক চানা এরেনেস পীবা অমসুং লৈঙাকসু লৌখৎপা য়াবা থবকশিং মতিক চানা লৌখপা হায়বদুসু উবা ফংদে। চহী হেক খুদিংগী মৈহৌ লাংপোক থোকপদী কন্নবা অমদি মীয়ামদা এরেনেস পীননবা হোৎনবগী পরিংদা ফায়র সার্ভিস ডে থৌরম পাঙথোত্তুনা লাক্লবসু মসিগী মহৈ ইফং ফংদবগুম তৌরে। মণিপুরদা মৈহৌ লাংপোক থোকপা অসি মরু ওইনা ইলেক্ট্রিক ৱায়রদগী মৈ হৌবা, গ্যাস ষ্টোব পোকখাইবা অমদি থাউ পৈরগা থম্বদগী মৈ হৌরকপনচিংবা চেকশিন্দবা মওং কয়াদীনি হায়বা য়াই। স্বাইদগী শাখিবা মওংদা মৈহৌ লাংপোক থোকপা অসি হৌখিবা চহী খরগী মনুং’সিদা মণিপুরদা হুরান-লোন্নাদা থাউ লল্লোনবা মীওইশিংনা শেন্দোংগীদমক ময়ুমদা নত্রগা এরিয়া অমদা থাউ পৈশিন্দুনা থম্বদগী ওইরকল্পনা অয়াম্বা ওইরি। চহী খরগী মমাঙদা উরিপোক অমসুং তেরা মায়কৈরোমদা ব্লেকতা থাউ য়োন্নবা পৈশিন্দুনা থম্বা থাউদগী মৈ হৌরক্তুনা মীশি-মীনা নংবা অমদি মাল-চাং কয়া মাঙতাকখিবগী থৌদোক লৈখে। হন্দক অমুক-ইম্ফালদগী পংলাপ লাগুবা কোইরেঙ্গৈদা মৈহৌ লাংপোক থোকপদগী দুকান কয়া মৈনা চাকুনা লন-থুম, মালচাং কয়া মাঙ তাকহনখিবগী মথক্তা পিক্লিবা অঙাং অমগী পুন্সি লোইখে হায়বসি য়াম্না থম্মোয় শোক্না নুংঙাইতবা থৌদোরি। লোনা য়াদবা মওংদা থাউ ব্লেকতা য়োনবগী ইফোং ফোংবা চৎনবী অমা মণিপুরদা মতম কয়াগী মমাঙদগী লৈরক্লে। হিরম’সিগী মতাংদা লৈঙাক্না কদায়ফাওবা মীয়েং থল্লিবগে হায়বদুদি মরী লৈনবা ওথোরিটিনা মীয়ামদা মচা খাইনা ফোঙদোক্কদবা অদুগী মখা পোল্লগনি। এক্সিদেন্ট অমদগী ওইরকখিবা থৌদোক ওইরগসু ব্লেকতা পেত্রোল য়োন্নবা হোৎত্নবা মীওইশিং অদুনা পেত্রোল থাউ পৈরগা থম্বদগী মৈ চাক্লকখিবগী মরম ওইগনি হায়বগী রিপোর্টশিং লৈরে। মীয়ামগী পুন্সিরোলদা ঙমখৈ লৈতনা খুদোংথিবা থোকহন্নীংঙাই ওইবা মওংদা মখল অমত্তগী সেফটি নত্রগা কন্ট্রোল তৌনবা ইক্যুপমেন্ট অমা ফাওবা লৈতনা লোনা থাউ পৈশিন্দুনা থম্বা হায়বসি লীগেলগী ওইবা মীয়েংদা করি থবক লৌখৎপা য়াবগে হায়বদু এক্সপর্টশিংগা তান্নরগা লৈঙাক্না চপ-চাবা থবক লৌখহন্নীংই। মদু নত্রগদি তুংদসু অসিগুম্বা লাইবক থিবা থৌদোক থোরকখিগনি। অমরোমদা ষ্টেট অসিগী মনুংদা লৈরিবা মীয়ামগী পুন্সিরোলদা অসিগুম্বা অকিবগী মশক ফংলবা মৈহৌ লাংপোক থোকপা মতমদা মৈ কনবা হোত্নবগী থবক লৌখত্নবা হোৎত্নরিবা মণিপুর ফায়র সার্ভিস মতিক চানা শেমগৎপা তঙাই ফদে। হৌখিবা চহী কয়াদগী ঙসি ফাওবগী মনুংদা তোঙান তোঙানবা দিষ্ট্রিক্টশিংদা লৈরীবা ফায়র ষ্টেসনশিংদা মতিক চাবা ইক্যুপমেন্ট অমদি হৌজিক্কালগী ওইবা ফায়র টেন্দরনচিংবা মরাং কাইনা থম্বা উদ্রি। মসিগা লোয়ননা ষ্টেট অসিগী দিষ্ট্রিক্টশিংদা মপুং ফানা থবক লৌখত্নবা ফায়র ষ্টেসনশিং শেমগৎ-শাগৎপগী মীয়েং অসিসু ইৱাৎ বাংলি। হিরম’সিগী মতাংদা মণিপুর লৈঙাক্না ৱাখল মুন্না খন্থরগা থবক লৌখৎপা চুল্লে। মীয়ামগী পুন্সি অমদি লন- থুম কন্নবা হোৎত্নবা অমদি লৈঙাক চলাইবদা হিরম খুদিংদা অহকপা মীয়েং থম্বা হায়বদুনা গুদ গভর্নান্স হায়বদু চপ চানা লৈহনবা ঙমগনি। মৈহৌ লাংপোক থোকপা হায়বসি অমরোমদদি তম্বা ঙমদবা থৌদোক্লি। অদুবু মণিপুরদা চৎনবী অমা ওইরক্লিবা ব্লেক মার্কেট হায়বসিদা শেন্দোং হেন্না ফংনবগীদমক পেত্রোল থাউ পৈশিন্দুনা থম্বা অমদি য়ুম নত্রগা দুকানশিংদা পেত্রোল ব্লেকতা য়োনবগী থৌওং’সি থিংনবা থবক লৌখহনীংই। নিংশিংলকপা মতমদা নোঙমা ফাদোক তৌদ য়াদবগী মওংদা দ্রাইব খর চারগা হান্নগী হান্না অদুম্মক মখা চখরকপা ওইরবদি ষ্টেট অসিগী মনুংদা লৈরীবা লৈঙাক অসি চিনবান্দা খোয়হি তৈরগা থবক্তদি ইচু তাহনবা ঙমদবা অমদি মীয়ামগী ইন্টরেষ্টতা থবক তৌদবনি হায়নরক্কনি।