Wb/mni/নিঙোল মৱা অপঙ/৩

মানা মখোঙ হান্নিবা অদু থেঙ্গু অমা নুংশা য়াইরম্বদগী মপা থোক্তুনা অমাংবগী ফোঙ-ফোঙ শাবা অদুদা থেঙ্গুদু তুরেল লোমদা চৎলম্মী। অপঙনা মদু উবদা “ও! ঐগী অমাংবসিদি চৎপোয়রে, ঐদি নহানমখৈ খঙদেনা ঐগী অমাংবসিদি ওন্থোক্না মরম মোক পোয়রে ” খনখি।

নোংমদি অহিং অথেংবদা নুংঙাইনা তুল্লম্বদগী অপঙদু মখোঙ হামনিংদুনা মিৎকপ থোকখি। মাগী নুপী হৌদোক্কদবসু নুংঙাইনা তুম্বা অদুদা হৌদোক্তে মানা খল্লি “ঐগী অমাংবদি মখোঙনা থোংনা চৎলি অদুনা অরাপ্পদা চৎলরোই নুপীসু খঙহল্লরোই, ফৰ্ম্মাংসিদা হেক্তা হাল্লগে খন্দুনা ফৰ্ম্মাংদা হামদোকলে ” ময়ামনা নোংঙালগা হৌগৎলকপদা ইমুংদু অমাংবগী মনমনা খাঙবা ভল্লমদে। অপঙগী ফম্মাংদা মখোঙ হাল্লম্বা উবদা মনেয়া “অপঙ নঙদি ফাংদা নখোঙ হাম্লবোইরেকো ওন্থোকপনিদা” হায়খি। মনেমগী রা তাবদা অপঙনা “হাইমা! মহৌশাদি হেক হেক চপনি, ঙসিদি কৈদৌরবনো? হায়দুনা অপঙনা ইকাইরদুনা মাগী লুখুমদা থম্বা কাঙজৈ অদু তাপ পায়খলগা অমাবদা য়েংলগা হায়খি। “ঙসিদি নঙ চত্রবদি করি তৌরে? ফরে ওসাই মখৈ নঙনা চত্রবসু ঐনা নঙরু ঙাকপিরগে। হৌজিক থুনা য়াঙনা চলো, নত্রবদি নঙ চৈ চাবা তারে ঐগী কাঙজৈ অসি উরেদনা হায়খি। অদুবু অমাংবদি মফম অদুদা অদুমক লেংদনা লৈরে অপঙদি শাউবনা লুতোন কাস্ত্রে। ফরে নঙ ঐনা হায়বা তাদ্রে, নও খণ্ডুকো ? ঐগী ইতিক খঙদবা শারি” হায়রম্লগা কাণ্ডজৈনা অমাংবদা ‘পোপ' লাউনা থোল্লে অদুগা “কমদৌরে হৌজিক্তি করিগী চেল্লি কিররা?” হায়খি। অমাংবনা পুমচাই চাইদুনা ফিরোল, কাংথোল উপু ফক্লাংদা চোংদুনা পুমতৈ তৈরে মদুদা মনেমা “করিনো তৌরিবা সিবু লোইরেদনা ইংসি পুমতৈ তৈরে, লোইনা মাংথোক্লেদনা” হায়রগা মকোক্তা মখুৎ হাপ্লগা ফমথখি। অদুবু নিংঙোল মৱা অসি পঙই খঙনা খঙনা মনেম মকুনা অদুমক লুনা চান্না তৌরি।