Wb/mni/নিঙোল মৱা অপঙ/১

থায়না মমাংঙৈদা য়াম্না শাথিনা পঙবা নুপা অমা লৈরম্মী। মহাক পঙবগী মতিক মপাঙ্গল শাথিনা কল্লি অদুগা মবুকসু ফৈ। মীনা ভাংলবসু চৈরবসু শাউদে, মাবু মীনা নেত্তুনা থবক হেক হেক শিজিন্নবী। মীনা থাগৎলগা মাগী মপাঙ্গল অরৈবা পুথোকতুনা থবক শুই। নোংমা ইনাক খুনবা অহল অমনা মাগী মবুক তিংবা পঙজবা অদুদা মচানুপী লৈশাবী অমা পীদুনা নিঙোল মৱা ওইহনগে খন্দুনা অপঙবা নুপাদু অহলগী ময়ুমদা পুদুনা লাগা মাগী মচানুপীগা লুহোংবীরে। ইনাক খুনবা মনেম, মকুগী য়ুম ফজবা অদু উবদা ইক শুক্লা য়েংদুনা লৈরম্মী। মনেমনা চাক থোংবা লোইরদুনা মহৈ মহৈ চাক চানরে। অপঙদা মনেমনা “ অঙাং নঙসু চাক চারো” হায়দুনা কৌরে। চাক অদু অহানবা নুমিনিনা ইকাইদুনা য়ায়া চারোই খন্দুনা মনেম অদুনা চাকু পুখমদা য়াম্না হাপ্তরে। অপঙনা চাক্তো লোইনা চারে, পুখম অদুদা চাক য়াওদ্রে অদুগা অদুম ফমদুনা লৈরে, হৌগত্তে । মনেমনা চাক ওত্ত্বমাল্লে হায়দুনা অমুক হাপ্পে। অদুসু অপঙনা লোইনা চারে, মথং-মথং হাপ্লকপা খুদিং অপওনা পঙচাদা চারে, মমৈথংদদি মবুক পিক থল্লবদুদা পঙহাপ্তা হাপ্লকই, হায়রগা ফুক হৌগত্তুনা মখুৎ হাম্নে, মচিন ময়া মখুৎ তৈথোক তৈথোকা ফর্মুংদা চঙশিল্পগা য়েংবদা অমুক্তসু উখিদ্রিবা ফমুং অমদি খল্লিবা কাঙখল অদুনা জোম-জোম ফজনা থাদবা অদু উবদা করয়া তুমগদগে খনবদা ওকখি। ইমুংগী অরু-অহেন ময়ামদু অপঙগী পুন্সিদা অমুক ফাউবা উখিদ্রিবনিনা ঙত্তুনা কোয়চৎ চৎলগা অমদা অমুক য়েং অমদা অমুক চৎ তৌরিঙৈদা ময়ামদি চাক চাবা লোইনরদুনা তুয়বা মাগী মাগী ফমুংদা হীপথে। অদুবু অপঙদি হঙ্গৎ হন্দা চৎলি ময়ামদি মিকপ অমমম তানথ্রে