Wb/mni/থবাতোন (ফিল্ম)

থবাতোন - ২ ‘বিগ ব্রদর্স ফিল্মস’ন পুথোকপ, ৱারী পরীং অমদ নমথরকপ ফিল্ম অমগী অনীশুবা শরূক- ঐগী পুলি অসিগী কাউঙমদ্রব অমদি কাউফদ্রব থৌদোকশিংগী মরক্ত অম ওইদুন লৈহৌরগনী। ঐতগী নত্তে, ঐগী লোয়নবী অমদি ঈচানুপা অতোনব, মখোয় অনিগীসুনি। ওক্টোবর 5, 2014 নোংমাইজিং নুমিৎ ইম্ফাল হোটেল'গী ওদিতোরিয়ম’দ ফিল্ম অদুগী ‘অহানব উৎপ’ নুমিত্তুদ, হৌখিব চহী মাপন’সিদ ঐগী ইমুং-মনুংগী মরু ওইব মীকোক অমগুম লোয়নরক্লব, অৱা নুংঙাইগী খোঙলোয় অম ওইরক্লব ‘মারুতি (অল্টো) কার' (এম, এন-০১কে-৬০২৬) অদু হোটেলদুগী মমাঙ' পার্কিংদগী কনাগুম্ব ‘পূকচেল চাউরব হুরানব’ অমন হুরানবীখি। সিনেমা লোইরগ থোক্লকপদ লৈরমখিদে। হুরানবদু কনানো - ঐ খঙদে। ওইনিংব অম ওইরমসনু। ঐন মাবু পূকচেল-চাউবা-হুরানব কৌজবগী মরমদি মীগী মপোৎ হুরাল্লগ মতু-মচা অমদি মশাগী পূকচাক থাক্কনী খল্লিব, মীঙোন্দ অৱাব পীরগ মহাক্ন নুংঙাইনী খল্লিব হুরানবদুগী থম্মোয়দু – মীগী অৱাব উরগ মীত্ত পিরাং সীব, সিনেমা- দ্রামাগী অৱাব খুৎশেম-ৱারী’দু ঈশাদা থোক্লিবগুম খন্দুন ৱাজব, ঐগুম্ব মী মচাদি ওইরম্লরোইদন! অতোপ্প মীগী অৱা-অনা, খুদোংথীব অমদি মীশি-মীনা থোকপ’দ মপূক্লিংদ করিসু ফাওদব ঙল্লব, অচৌব মীনি মহাক। অচৌব মীগী অচৌব পূকচেল অদুবু নত্ন ‘পুকচেল চাউব’ হায়বদুবো? ঐন তাইবং মপু/অল্লাহ/জিসস / ঈশ্বর মহাক্কী মফমদ মহাক্কীদমক থৌনিবীরি- মহাক নোংমদি মমিঙ চপ, অচৌব হুরানব অম ওইরকসনু! ঐগী অমনব কারদুগুম্ব নত্তব, মমল য়াম্ল-য়াল্লব হুরানব-কার ময়ামগী অচৌবা পূক্কৈ অম লৈরস !

হুরানববু ওইরো, মীহাৎপবু ওইরো, লাইনীংববু ওইরো, লাইপোকমকপু ওইরো - মীওইবগী মরক্ত মী মখল কয়া খায়দোতুন থল্পমলিবসিগী মশক লেপ্লব, খূন শোব্লু-থেংলু’ ঙমদ্রব পোশক অমখক লৈ। মদুবু কৌই- নুংশিব। হুরানবসু, মীহাৎপসু নুংশিব’দি মশক খঙই। অদুবু, অতোপ্পবু নুংশিব ঙমদব মহাক মশামক্কী পুলি অমদি মহাক্কী মমা, মচা অমদি লোয়নবীতবু নুংশিব- অদুনি লুরিবদি। নুংশিব হায়বসিদ য়ুম্ফম ওইরগনী- মীওইব’ন ধৰ্ম্ম হায়ব নুংশিবগী লীপুন' অম শেম্লল্লিব। কোরান, বাইবল, গীতা- ধৰ্ম্মগী পাউজেল- লাইরিক অমত্তন মীগী মপোৎ হুরান্নব, মীহাৎপ অম ওইনব পাউতাক অমত্ত পীরমদে। অদুবু মীওইব মরকসিদ নুংশিব খঙদব, ইচা নত্তব মীগী মচা অমদ নুংশিবগী মীৎয়েং মচেৎ অমত্তসু য়েংঙমদব মীন পিক থন্ন লৈ। মদুমকী ‘থবাতোন’ ফিল্ম অসিন পন্দুপ অনী থোক অয়েংবশিংদ ঊৎলিব, অনীশুব পন্দুপ পুথোকপ নুমিৎ’তুদ ঐগী ঈফমদ থোক্লিব। ‘অৱাফমদ তারিব মহাক অদু ঐ ওইরক্লবদি’... হায়ব ৱাখল অসি হুরানব নভগ মীহাপ অদুন অমুক্তং খন্থব ভল্লবদি মালেম অসি ফন ফজন ঈংন-তপ্ন পানব গ্রহ অম ওইরমগনী।

লন-থুম- শেলতবু লাইনীং ওইব কনাগুম্ব’ন অতোপ্প কনাগুস্বগী পুন্সিবু ঈকায়খুম্নব ঙমদব, নুংশিনব অমদি ঈকায়খুম্নব হায়বসি নুংঙাই-য়াইফ থোং মান্নবশিংগী মরক্ত ওইগদবনি হায়ব- চাও থেকপ কনাগুম্বগী পুন্সিন লৈখা তাখিব, মশামক্কী সনা-ঈ মচাদুম ইন্থোকখিব- তমথীরব ৱারী অমদ য়ুম্ফম ওইবা ‘নুংশি ৱারী” অম য়েংখ্রে- “থবাতোন’। নুংশিব লৈত্রব খুন্নাইসিদ, নুংশিবগী ঈখৌ লাংলব মণিপুরগী সিনেমা য়েংবশিংন, ঈখৌ লাংন পায়ন য়েংনখিব’দুনা ঈথিল অম পীদুন প্রদ্যুসর ‘সুরজীৎকান্ত’ অমদি রাইটর-দিরেক্টর ‘বিজগুপ্ত লাইশ্রম' অনিবু ‘থবাতোন-২' পুথোকহল্লকখি। ওক্টোবর ৫, ২০১৪, নোংমাইজিং নুমিৎ- ইম্ফালগী মফম অহুমদ ‘প্রিমিয়র-শো' উৎখি - হোটেল ইম্ফালগী ওদিটোরিয়ম, ভাগ্যচন্দ্র ওপন এয়র থিয়েটর অমদি শঙ্কর টোকিজ। মফম অহুম্মক’ত মীন চীরু-চাইন ঙমদন তিনখি, মণিপুরী সিনেমাগী পুৱারীদ রেকোর্দ অম শেমখি, নুমিত্তুদ ‘বোট’ত য়েংব ফংহৌদব টিকেৎ পায়বশিংদু শঙ্কর টোকিজ'দ নুমিৎ হুমনী চঙন য়েংহনখি। শৈহৌ অসিন তাকপদি- ‘থবাতোন-২', মায় পাব ফিল্ম অম ওইরগনী হায়বগী ময়েক লায়রব খৃত্তম- চাংতম’নী।

বিজগুপ্ত লাইশ্রম- মণিপুরী-দিজিটেল ফিল্ম তাইবংগী নীংথিন মায় পাক্লব রাইটর-দিরেক্টর অমনী হায়ব ফিল্ম অসিন অমুকসু কনফার্ম তৌরে। মমাঙদ পুথোকখিব মহাক্কী ফিল্মশিং, অয়েংবশিংদ তোপ তোপ্প মহাও অমমম পীব ঙমখিব ঙাক্তনী। হিন্দি কৰ্ম্মর্সিয়েল ফিল্মগী মহাও কাউব ঙমদ্রব, মণিপুরী সিনেমা য়েংবশিংদ মখোয়ন পামজব মথেল অদুমক পীব ঙম্ব মায় পারব ‘কৰ্ম্মর্সিয়েল ফিল্ম মেকর' অমনি। অদুবু, মহাক কয়ামুক য়ায় সিরিয়াস ওইব ফিল্ম-মেকর অমনো হায়বদুদি হৌজিকসু খন্থনীংঙাই ওইরি, বাহং করা হংনীংঙাই ওইরি। বিজগুপ্তগী সিনেমা’ন খুন্নাইসিদ করি হায়রি? মহাক্কী সিনেমা’দ করম্ব সোসল ইস্যু, কয়ামুক সিরিয়স ওইন নৈনরি? ইচম চম্ন অয়েংবশিংপু নুংঙাইহনব, নোক্লীংহনব, কপীংহনব-অদুখক্তন পন্দম’ল? সিনেমা এন্তর্তেনমেন্ত-মেদিয়া অম ওইন’ত লৌবর? সিনেমাটিক ইলিমেন্তশিংদু মহাক্ন করম্ব ত্রিতমেন্ত চথবগে?

মতম অমদ হিন্দি ফিল্মগী সুপর হিত কয়া পুথোক্লম্ব দাইরেক্তর “মনমোহন দেসাই’বু ক্ৰিতিকশিংন ‘লোস এন্দ ফাউন্দ’ (মাঙলুরগ ফংলকপ) হায়ব থিম অদুখদ হঞ্জিন হঞ্জিন নম্ব, সিরিয়স ওইদব দাইরেক্তরনি হায়ন শত্তাকপদ মহাক্নহায়খি.... “নখোয়ন ঙাঙলিব সিনেমাগী লোনদু ঐ খণ্ডদে, ফিল্ম মেকার অম ওইন ঐগী পান্দমদি সিনেমা হোলদ ঙাইহাক পোখাব লাক্লিব অয়েংবশিংবু নুংঙাইহনবনি, মখোয়ন পাম্বদু পীবনী'...। অদুবু হৌজিত্তি হোংলে। অয়েংবশিংগী ৱাখলসু হোংলে। বোল্লিদকী পোত্থোকশিং, হোল্লিদ’ক চাংদশন য়েংলক্লে। পাৱরফুল ওইব ৱারী পরীংগী মথক্ত 'ভিজ্যুএল ইফেক্ত' হায়বসি ফিল্ম অম মায় পারবগী অচোব মরম ওইররে। মরম’সিননী মণিপুরী সিনেমা তৌব অমদি য়েংবশিংন মতম খর তেলেগু/তামিল সিনেমা’দ ঙাওনরুরিবদু। মতৌ তলগ নলম্ব করা অম খঙনরকখেদন! অদুগুম্ন, কুরাং বান’দ মচু তৈশিল্পগ অনৌব মালহন্নব হোত্নব, অনৌব রাইতর- দাইরেক্তরশিংদুগী মরক্ত য়াওদে, বিজগুপ্ত লাইশ্রমদি মশাগী ওরিজিনেলিতি অমগ ঈরোয়মিন্নব ফিল্ম-মেকর অমনি। অদুবু, ঐগী ইরন্নাই ওইব ৱাফম অমত্তং দাইরেক্তর অসিগী মরমদ (রাইতর ওইন নত্তব) হায়জব তারগদি, মহাক-ফিল্ম হায়বসি অয়েংবশিংবু নুংঙাইহনগদবনী হায়ব ৱাখল অসিন, “ফিল্ম হায়বসি কলাকার অমগী আর্তিস্তিক ক্রিয়েসন অমনী' হায়বসিদগী হেন লয় লৌব দাইরেক্তর অমনী হায়নীংই। নৎলমদ্রগদি ফিল্মসিগী মতাঙ খরদ “হ্যমরস ইলিমেন্ত ’শিংন ওভরদোজ ওইদুন ‘এন্টি-ক্লাইমেক্স” চৎলিবদু নীংথিন চেক তৌরমগনি।

মায় পাকপগী থোঙজিন’দ হান্নন খোঙ থাংজিনখুব ফিল্ম অসিদ অতোপ্প নৈননীংঙাই ওইরিবা শরুক’তি - ফিল্ম অসিগী ‘বেকগ্রাউন দ ম্যুজিক স্কোর অসিনী। ফিল্ম ম্যুজিক হায়বসি, মতাঙ মতাঙগী চানব ম্যুজিক স্কোর থিবদু নত্তে। ফিল্মদুগীঅহৌব-ময়াই-অরোইব নাইবগুম, মহাকসু ঈরোয়নন চেন্থরক্কদবনী।

অদুমকপু, পুমশুপ শুপ্ন- থবাতোন-২ অয়েংবশিংগী থম্মোয় খুদুম চন্নব খুলায় মতীক চান পায়রগ থোরক্লব লাল্লোই অমনী। সিনেমা হোলশিংদ মহাক্ন লান্দারকপদু য়েংমিন্নসি।