Wb/mni/উচেকশিংগা ৱারী শান্নবা ঙম্বা নুপামচা/১
থায়না লৌউবা নুপা অমগী মচানুপা য়াম্না হৈথোই শিংথোইবা অমা লৈরম্মী। মপা মচানা নুমিৎ খুদিংগী লৌবুক্তা কুমদুনা লৌউ শিংউ তৌরগা মমানা য়ুমগী অকুপ অতা নোমদুনা ইমুং অসি য়াম্না নুংঙাইনা লৈরম্মী। মখোয়গী লৌবুভুগী মনাক্তা তুরেল অমা লৈরম্মী। তুরেলদু নিংথমথাদা হেক হেক কংবা মরমা মচানুপা অদুনা অথাপ্পা মফমদগী ঈশিং শোকপা চৎলম্মী। ঈশিং শোকপা চৎপদা উমং ৱামংদা লৈরম্বা উচেক ৱায়াশিংনা খোংবসি অসুম তাবদী মমৈথংদদি নুপামচা অসি উচেক্কী মরোল খঙলকে। উচেকশিং অসি ঈশিং নুংশিকী ফিভম য়াম্না মুন্না খঙই। নুপামচা অদুনা মপাদা উচেক্কী মরোল খঙবা গুম্লে হায়জরুবদা মপানা থবক শুনিংদদুনা উমংদা কোয়দুনা লৈগদবগী তাৎ তৌরিবনি হায়দুনা থওইবিরমদে।
নোংমদি মপানা লৌবুক্তা লৈরিঙৈদা মচানুপা অসিনা উমংদগী স্বপ্ন থবেৎ থবেৎ হোনবমখৈ চেলক্লগা উচেকশিংনা লেন য়াওবা নোংলৈ নুংশিৎ অকনবা অমা ভৌগদৌরে হায়হৌই অদুনা ঐখোয় য়ুমদা থুনা চৎহৌরসি হায়খিরম্মী। মচানা হায়জরিবদু মপানা থওইনা তাবিরমদে। ঙৈহাক লৈরগা নোংলৈ নুংশিৎ অকনবা অমা লাত্তুনা মপা মচাদু লৌতাংশঙ মচা অমদা য়াম্না ৱানা অহিং থেঙলফাওবা লৈখিরমী। অসুন্না লৈরকপসিনা নোংজু থা চঙলনা মহৈ মরোং লিংনবা মতমদা লৌউবা অদুসু মহৈ-মরোং হুনগদবগী লৌবুক্তা লৌ খোইবা চৎলম্মী। মপানা তৌরিবদু উবদা মচানুপানা “ হন্দক্তি ঐনা হায়জরিবসি তাবীয়ু উচেকশিংনা নোং য়াম্না থেঙনা চুগনি হায়নহৌই, অদুনা ঐখোয়না হুনগদৌরিবা মরু-মরাংশিংসি খরা থেঙনা হুল্লসি নত্রবদি অরেম্বদা লোইনা মাঙলগনি হায়জখিরমী। মচানা হায়জরিবদু থৌওইদনা মপানা মরু-মরাংশিং অদু হুনজিল্লম্মী।