Wb/mni/ইমুং মনুংদা মমা

ইমুং-মনুংদা মমা ওইবী অমগী মথৌ য়াম্না মরু ওই। মমা য়াওদবা ইমুং অদুদি থৱায় য়াওদবা হকচাঙনি। মচাশিংনা শান্নরুরগা ময়ুমদা হঞ্জিল্লকপদা “ইপাদি?” হায়না হংদে ‘ইমাদি?” হায়না হংই। মচানা নারকপা মতমদা মমানা মচাবু পোবীদুনা “ইবুংঙো? নহাক্লা নারিবসিগী মহুৎ ঐনা শীনবা যারক্লবদি ফগনি' হায়। মদুগীসু মথক্তা ওক্ত-শিংদবা মচাগী য়াইফনবগীদমক্তা মমানা তোয়না প্রার্থনা তৌই। অফবা মমাগী প্রার্থনাদি ঈশ্বরনা তাবীগনি। মমা অদুদা ঈশ্বরনা থৌজালগী ঈরীক খীক্তবীরক্কনি। স্বর্গদা ইমুং-মনুং শুনা যৌবা য়াদ্রবদি অফবা মমা ৱাৎলি হায়বা তাকপনি।

অফবী মমাগা ফত্তবী মমাগা অনীসি য়াম্না খেন্নৈ। অফবী মমানা মমল কয়া য়াল্লিবনো অদুগা ফত্তবী মমানা কয়া খুদোংথীনীংঙাই ওইরিবনো হায়বা তাকপা লাইরিক ময়াম অমা থেংনৈ, অদুবু ফত্তবা মপাগী মতাংদদি থোইনা থেংনদে। মমা ফরবদি মচা ফবা তাবনি। মসিনা তাক্লিবদি মমা ওইবীনা মীওইবগী পূক্লিংদা অমদি মচাগী লমচৎ-শাজৎ ফনবা শেমগৎপদা শরূক রান্না চাউনা লৈ।

নিংথৌ সোলোমোন্না নুপী ময়াম অমা লোল্লমখি। মহাক্না নুপীগী মরমদা য়াম্না খঙলক্ষ্মী। মহাক্না হায়রম্মী, “ফত্তবা নুপীগী মচীন্দগী খোইহী চেন্থরকই অদুবু মহাক্না মী কয়ামুক্তা অশোক-অপন থোকহল্লি। মহাক্কী ময়ুমদি নরক্কী থোঙ্গালনি।” মরম অদুনা ফত্তবা নুপীগা লৈমীনগদবগী শরূকপুদি য়ুম থাদোত্তুনা উমংদা লৈরুবনা হেন্না ফৈ। মচীন-কনবী নুপীসু লেগুনা চুবা ইঙাগী নোংগা মান্নৈ ৷ নুপী অদুগী মচীন্দি কনানসু থিংবা ঙমদে। মদুবু থিংননবা হোৎত্নবদি নুংশিপু ফাজিন্দুনা থমগে হোত্নবগা চপ মান্নৈ।

অফবী নুপীদি মীনা ঈকায়খুম্নৈ, অদুগা মহাক্তি মপুরোইবগী ফজরবা লুহুপ অমা ওই, অদুগা মহাক্না মচাশিংবুসু অফবা মীশিং ওইহল্লি।

অফবা নুপীনা য়ুম শাগৎলি অদুবু ফত্তবী নুপীনদি য়ুম শীদোকই। অফবী নুপীগী মপুরোইবদি ময়ামদগী তোঙাল্লি। মহাক্তি মরম ওকই, তন্দে অমসুং লায়রবশিংগী উপায় ওই। ইমুং-মনুংগীসু অফবা মপা অমা ওই। মীওইবগী সমাজবু সেবা তৌই। মীয়ামগী য়াইফ- নুংঙাইনবগীদমক্তা কথোকপগী থবকশিং তৌই।

মপা হায়বসিদি য়ুমদা কয়া লৈগন্দে। মমা ওইবীশিংনা যুন্নুরেম্বী ওইদুনা লৈবনি, য়ুমগী লাইরেম্বীনি। অদুবু মমা ওইবীদুনা কোয়চৎ চতুনা লৈরবদি ইমুং-মনুং অদু ইচায় চায়গনি। য়ুমদা চঙলকপদা মপা ওইবদুনা তুমিন্না লৈজরবসু মমা ওইবীদুনা তরাম-তরাম তৌরগা ৱা ভাঙলবদি লাক্লিবা মীশিংনা নুংঙাইজৈ। য়ুমদা মমা লৈত্রবসু মচাশিংনা নুংঙাইজদে। অঙাংনা কল্পদসু ‘বাবা’ হায়না কৌদুনা কপদে ‘ইমা’ হায়না কৌরগা কপনৈ। মরম অদুনা ‘ইমা’ হায়বসে য়াম্না মরু ওই। মমা ফরগা মচা নিংঙোল ফৈ। মচা নিংঙোল ফরা ফত্তরা খঙগে হায়রবদি মমা হন্না য়েংউ হায়নরিবনি। “মচা নিংঙোলনা মমা লৌই' হায়বসি ধৰ্ম্মগী লাইরিকশিংদসু থেংনৈ। মরম অদুনা মমা ওইবীশিংদি মচাশিংগী লীচৎ-শাজৎ নত্রগা লমচৎ-শাজ‍ শেমগত্নবা অহানবা স্কুলশিং ওইবনিনা য়াম্না মরু ওই। ফাউরবা মীওইশিংনা মখোয়না মখোয়গী লমচৎ-শাজৎশিং অদু মখোয়গী মমা- মপাদগী থংথরকপনি হায়না ফোঙদোক্লরি।

নুপীশিংনা মীরোল্লিঙৈ মতমদা শাউগনবা ফত্তে। মমাগী ঈদগী মচা মথং মথং শেম্লকপদা মমাগী শাউগনবা মতৌ অদু মচাদুনা লৌগনি। মরম অদুনা মীরোল্লিঙৈ মতমদা মমানা য়াম্না শাউগল্পবা নত্রগা পেনগন্দ্রবা ওইরবদি মহাক্না তৌবগুম নত্রগা ওইবগুম মচাসু ওইরকপা তাবনি। মমানা মীরোল্লিঙৈ মতমদদি মপুরাইবনা অমদি ইমুং-মনুংগী মী খুদিংনা মহাকপু য়াম্না লুনা তৌবীগদবনি। মহাক্কী চাবা অমসুং থকপসু ফহনগদবনি। অসিগুম্বা মতম অসিদদি পূক্লিং ঈং-তপ্না, হরাউ-নুংঙাইনা নোতুনা অমদি পূকচেল শেংনা লৈননবা মহাকা কন্না হোত্নগদবনি। খৃষ্টিয়ান ধৰ্ম্মদা পূক্লিং লূপ্লবী নুপী অমনা অসুম্না হায়রম্মী, “ঐনা মীরোল্লিঙৈ মতমদা বাইবল তোয়না পারম্মী, মদুদা পোকপা অঙাং অদুদি বাইবল পাবা য়াম্না পামখি।” মসি ওইথোকপা য়াবা ৱাফমনি। অঙাং হায়বসি মমানা পোকপনি, মমা লৌগনি, মরম অদুনা অঙাংবু ফহনগে হায়রবদি মমা ওইবী অদু ফবা তাই, থৌজাল হৈবী অমদি ঈং-তপ্পী অমা ওইবা তাই।

লৈশাবী অয়াম্বনা ময়ুম পাল্লি। ময়ুম পাল্লবী নুপী খুদীংমক লোইনা মতীক চাবীদি নত্তে। মতীকচাবী নুপীদি মশক-মতৌ ফজবা অমদি মশা-মউ ফবদা নত্তে, মহৈ-মশিং অমদি বুদ্ধি-লৌশিংদসু নত্তে; ধৰ্ম্ম লৈনা ইমুং-মনুংগীদমক্তা হিংবা অমসুং মহাক্কী মতম নীংথিজনা শীজিন্নদুনা নুপী ওইবীগী য়াম্না মরুওইবা মথৌ অমসুং শক্তম অদু উৎপনা নুপী নত্রগা মমা অমা ওইবগী মতীচাবা মগুননি। করিসু নত্তবীদা শাউগনবা, চরাঙনবা, অপাম্বনা হেনখিদুনা অপেনবা নাইদবা অমসুং পামদবা মফমদনা করিস থৌশাদবা, শাউবা মতমদনা মহাক্কী ফত্তবা ৱাহৈশিং খাকপা লৈতনা হায়দোক্লকপা-অসিগুম্বা নুপী মতীকচাবীনি হায়বা য়ারোই।

‘মমা’ হায়বসিদি ৱাহৈনা মপুং ফানা ফোঙদোকপা ঙম্বা নত্তে, অদুবু মশানা মশা অদুম ওইজৈ। ইমুং-মনুংগী মমা অমা ওইনা নুপীনা য়ুম পাল্লি। ইমুং-মনুংগী ময়াইদা মমা ওইবীনা লৈ, অদুগা অমুকসু মমা ওইবীগী ময়ায়দা ইমুং-মনুংসু লৈ। মমা ওইবীনা ইমুং-মনুংদী লাপথোকখিবগা ইমুং-মনুংদা অকায়বা, অৱাবা অমসুং খুদোংথীবা লাক্কনি, মরম অদুনা ইমুং-মনুংদা মমা হায়বসি য়াম্না মরুওই ।