Wb/bcl/Kawat:Intigan sa dyolen

An intigan sa dyolen sarong kawat nin mga aki sa Filipinas kun saen dyolin an ginagamit. Ini kinakawat parati sa daga asin poon duwa sagkod sa pirang gustong mabarali, depende sa pinagkaoyonan kan pag'iriba. Nalabot sa daga na tiponan kan mga tayang dyolin. Parati, bool sana an iniitok-itok padodo sa daga ngane makagibo nin labot na igdi tinitipon an mga taya kan magraralaban. Kun tolo halimbawa an makarawat Integan, pwedeng an taya tigtorolo, kaya siyam an ikakaag sa labot. Lambang parakawat may sadiring dyolin na bato. Ngane maisihan kun isay an mano (enot na matira), nakurit sa may duru-distansya asin lambang parakawat matindog sa lugar na kinuritan man saka i'aapon an saiyang bato sa ikinaag na guhit. An pinakaharani sa guhit iyo an mano. An masurunod na matira depende sa pagkarani sa kurit.

An tuyo sa kawat ngane manggana, iyo an pag'integ kan mga taya duman sa labot na umolsit an mga dyolin. Dai mapondo an parainteg sagkod na dai na siya makapatalsik kan dyolin sa labot. Kun igwa pang natada, an sunod naman an mainteg asin mapondo kun dai na siya makapa'olsit kan mga dyolin. An gana iyo an makatipon nin pinakadakul na dyolin na napa'olsit. Kun ini may tarayaan na ganahon na kwarta, tinata'wan halaga an bawat dyolin, halimbawa, dos pesos lambang dyolin. Kaya kun 5 an napaluwas sa labot, siya an masingil nin sampolong pesos, singko sa lambang kakawat kun sinda 3 an nagkakarawat.

Alagad, sa mga aki bakong sugal ini asin an kaogmahan yaon sa makatipon nin dakul na dyolin imbes ini bakalon pa sa tindahan.