Template:Wp/zgh/ⴰⵡⵡⵓⵔ:ⴰⵙⴳⴷ/ⵉⵙⴳⴷⴰⵏⵏ ⵉⴱⵕⴰⵀⵉⵎⵉⵢⵏ

ⵉⵙⴳⴷⴰⵏ ⵉⴱⵕⴰⵀⵉⵎⵉⵢⵏ ⵏⵖ ⵉⵙⴳⴷⴰⵏ ⵉⴳⵏⵏⴰⵡⵏ, ⴳⴰⵏ ⵜⵏ ⵉⵙⴳⴷⴰⵏ ⵍⵍⵉ ⴷ ⴼⴼⵖⵏⵉⵏ ⵙⴳ ⵓⵢⵏⵏⴰ ⵉⵜⵜⵓⵙⵙⴰⵏⵏ ⵖⵓⴷ ⵉⴽⴰⴷⵉⵎⵉⵢⵏ ⵙ ⵜⵏⵙⴰⵢⵉⵏ ⵜⵉⴱⵕⴰⵀⵉⵎⵉⵏ ⵙ ⵜⵓⵇⵇⵏⴰ ⴷ ⵡⴰⵡⵔⵉⴽ ⴰⵜⵓⵕⴰⵜⵉⵢ ⴱⵕⴰⵀⵉⵎ (ⵙ ⵜⵄⵉⴱⵔⵉⵜ: אַבְרָהָם ⴰⴱⵕⴰⵀⴰⵎ/ⴰⴼⵕⴰⵀⴰⵎ).

ⵉⵍⵍⴰ ⵓⵎⵣⴰⵔⴰⵢ ⴳⵔ ⵉⵏⴼⵍⴰⵙⵏ ⵙ ⵉⵙⴳⴷⴰⵏ ⴰⴷ ⵅⴼ ⵎⴰⵢⴷ ⵢⴰⵍⵍⴼⵓⵙⵏ ⴰⴷ ⵉⴳ ⴰⵙⴳⴷ ⴰⴱⵕⴰⵀⵉⵎⵉ, ⴰⵛⴽⵓ ⵉⵔⵎ ⴰⴷ ⵉⵡⴰⴷⵙ ⵜⵓⴷⴰⵢⵜ ⴷ ⵜⵎⴰⵙⵉⵃⵜ ⴷ ⵜⵏⵙⵍⵎⵜ/ⵉⵙⵍⴰⵎ ⵙ ⵓⵎⴰⵜⴰ, ⵉⵍⵉⵏ ⴽⵔⴰ ⵏ ⵉⵙⴳⴷⴰⵏ ⴷ ⵜⴳⵔⴱⴰⵣⵉⵏ ⵢⴰⴹⵏⵉⵏ ⴰⵔ ⵜⵜⵓⵙⵎⵉⵍⵏ ⴽⵔⴰ ⵏ ⵜⵉⴽⴽⴰⵍ ⵎⴰⵙ ⴳⴰⵏ ⵉⵙⴳⴷⴰⵏ ⵉⴱⵕⴰⵀⵉⵎⵉⵢⵏ ⵣⵓⵏ ⴷ ⵜⴰⵙⴰⵎⵉⵔⵉⵜ, ⵜⴰⴷⵓⵔⵣⵉⵜ, ⵜⴰⴱⴰⴱⵉⵜ, ⵜⴰⴱⴰⵀⴰⵢⵉⵜ, ⵜⵎⵓⵔⵎⵓⵏⵉⵜ, ⵜⴰⵔⴰⵙⵜⴰⴼⴰⵔⵉⵜ, ⴷ ⵜⵎⴰⵏⴷⴰⵢⵉⵜ.

ⵓⵔ ⵉⵥⵍⵉⵢ ⵢⵉⵔⵎ ⵏ ⵉⵙⴳⴷⴰⵏ ⵉⵎⵙⵢⵉⵡⵏⵏ ⵖⴰⵙ ⵙ ⵉⵙⴳⴷⴰⵏ ⵉⴱⵕⴰⵀⵉⵎⵉⵢⵏ ⴰⵛⴽⵓ ⵍⵍⴰⵏ ⵉⵙⴳⴷⴰⵏ ⵢⴰⴹⵏⵉⵏ ⴼⵍⵙⵏ ⵙ ⵢⴰⵏ ⵡⴰⴽⵓⵛ ⵎⴰⵛⵛ ⵓⵔ ⵙⵙⵉⴽⵣⵏ ⵙ ⴱⵕⴰⵀⵉⵎ, ⵣⵓⵏ ⴷ ⵜⴰⵜⵓⵏⵉⵜ ⵙ ⵜⵓⵇⵇⵏⴰ ⴷ ⵡⴰⴽⵓⵛ ⴰⵎⵉⵚⵕⵉ "ⴰⵜⵓⵏ" ⵎⴽⴷⴰ ⵜ ⵉⵙⵙⵉⴹⵏ ⵓⴼⵔⵖⵓⵏ ⴰⵎⵏⵃⵓⵜⵉⴱ ⵡⵉⵙⵙ ⴽⴽⵓⵥ, ⴷ ⵉⵙⴳⴷⴰⵏ ⵢⴰⴹⵏⵉⵏ ⵣⵓⵏ ⴷ ⵜⴰⵣⵔⴷⴰⵛⵜⵉⵜ ⴷ ⵜⵙⵉⵅⵉⵜ.