Wq/ba/Азамат Юлдашбаев

Юлдашбаев Азамат Рәмил улы (10.10.1964, Саҙалы ауылы, Ейәнсура районы, Башҡортостан) — публицист, шағир, әҙәби тәңҡитсе. "Илһам шишмәһе" исемле төбәк-ара поэзия фестивалендә Гран-при яулаусы, Шаһит Хоҙайбирҙин исемендәге премия лауреаты, В.М.Шукшин исемендәге Рәсәй әҙәби конкурсы лауреаты, «Халҡым йөҙө» премияһы лауреаты (2013). "Йыл уҡытыусыһы" (1996), Башҡортостан Республикаһы мәғәриф отличнигы. Башҡортостан Республикаһы һәм Рәсәй Федерацияһы яҙыусылар берлеге ағзаһы, Башҡортостан Республикаһы һәм Рәсәй Федерацияһы журналистар берлеге ағзаһы. Әлеге ваҡытта "Ватандаш" журналында баш мөхәррир булып эшләй.

• Азаматтың фекерҙәрен бергә туплаусылар өсөн Аңлатма - Уның диуарында яңы яҙылған фекерҙәрен бүлектең өҫкө яғына, ә элек яҙылғандарын аҫҡы яҡҡа өҫтәгеҙ. Шулай эшләһәгеҙ башын-осон, ҡайҙа барып еткәнлекте табыуы уңайлыраҡ булыр. Был аңлатма ваҡытлыса яҙма, һуңынан юйыласаҡ.

Инеш һүҙ урынына

Азамат Юлдашбаевтың ижад кисәһенән (21.10.2014)

Тапшырылған бүләктәргә ҡушылып…

Үҙ алдыма...

Ҡотлайым әле....

Ғәҙәттә яҙыусылар нәшриәттә баҫтырылған китаптарын автограф менән дуҫтарына тарата. Бөгөн, донъяла беренсе тапҡыр, быйылғы йылда халыҡ-ара Викимедиа инкубатор проектында яҙыла башланған һәм бер ваҡытта ла тамаланмаясаҡ китапың, кисә генә бер данала баҫтырылған беренсе нөсхәһе уҡыусыһының имзаһы менән авторҙың үҙенә тапшырыла.

Китапта Азаматтың фекерҙәре, цитаталары тупланған. Шартлы исеме “Елле фекерҙәр елгә осмаһын” тип атала. Китапты артабан төҙөүҙә һәр кем ҡатнаша ала. Һәр берегеҙ, теләгегеҙ булһа, үҙегеҙ ҡағыҙға баҫтырып, оҡшаған исем биреп, китап эшләй алаһығыҙ. Тик, онотмағыҙ, бер тонна сифатлы ҡағыҙ етештереү өсөн дүрт кубометр ағас кәрәк. Урмандар күпләп ҡырылмаһын өсөн Аллаһы Тәғәлә кешегә Интернетты бирҙе лә инде.

Интернетта Азамат Юлдашбаев осраһа минән сәләм әйтегеҙ әле. Тағы ла сәхифәһен һүндереп, ҡайҙалыр нимәнелер эҙләп киткән...

Азамат! Үҙең нисек булырға теләйһең, шулай булып ҡал! Һин үҙ елкәңә үҙең баҫып, иңдәреңдә 7 миллиард дуҫыңдың баҫымын күтәреп тораһың. Күтәрә алғансы бәхетле бул! Уңыштар һиңә!

Тапшырылған бүләктәргә ҡушылып…

Үҙ алдыма...

Ҡотланым....

Һ.Һ.(P.S. башҡортса шулай була) Китап араһына ҡыҫтырғысты ла яңыса ҡыҫтырҙым. Иғтибарға ал.

Башҡорт Википедияһы ирекмәне Рөстәм Нурыев.

Виртуаль донъя Ирәмәленән.

21.10.2014

Азамат Юлдашбаевтың ҡыҫҡа фекерҙәре

• әйҙә

һөйләшәйек

аралағы бушлыҡ аша

һүҙһеҙ генә

һин – үҙ-үҙең менән

мин – үҙ алдыма

• Яҡшылыҡ ҡылыр өсөн тәүҙә яуызлыҡты ҡабул итеп өйрәнергә кәрәк...
• Ҡулымдан килмәй, ти берәү... Ғәйеп ҡулда түгел шул, ғәйеп - башта...
• Мыжымаҫҡа! Кем ниндәйгә лайыҡ - эргәһендә шундай кеше...
• Кешеләрҙең бөйөклөгөнә, уларҙың күңел сафлығына, намыҫ таҙалығына, уйҙар матурлығына, изгелеклелегенә, татыулығына һоҡланам... Урманда янғыҙ сағымда... Яҡын-тирәлә бер кем дә булмаһа...
• Яңғыҙаҡ яҙмыштың яҡшы яғы - кешеләр көтөүенең дөйөм фекере менән килешмәҫкә, уртаҡ ҡағиҙәләренә буйһонмаҫҡа мөмкин...
• Әҙәм бәхетте күпме кәрәк, шул тиклем көтә ала... Шунан тағы саҡ ҡына... Шунан йәнә бер аҙ... Шунан...
• Бер ҡараш... Йә көлгә әйләндерә... Йә, Феникс-ҡош кеүек итеп, көлдән терелтә...
• Әрнеү бер үк... Фил өсөн дә, серекәй өсөн дә...
• Ваҡытты еңеп булмай... Уның менән ваҡытлыса килешеү төҙөргә генә була: һин мине күрмәйһең, мин - һине...
• Намыҫ кеҫәрткенең ҡойроғо һымаҡ яңынан үҫмәй...
• Офоҡ киңлеге эргәңдәге киң күңелле кешеләрҙең күплеге менән билдәләнә...
• Ахмаҡтар юл яра... Аҡыллылар уларға бармаҡ төртөп көлә... Аҙаҡ бөтәһе лә шул юлдан йөрөй...
• Ҡайнау градусы шартлау градусына әйләнергә мөмкин... Һөйөүҙә лә шулай...
• Бала сағында сатлама һыуыҡта туң тимерҙе ялап ҡарамаған кеше тормоштоң асылын бер ҡасан да аңламаясаҡ :)
• Кисә ябай бер нәмәне төшөндөрҙөләр... Яңғыҙлыҡ һәм яңғыҙаҡлыҡ тураһында... Яңғыҙлыҡ - һин бер кемгә лә кәрәкмәйһең... Яңғыҙаҡлыҡ - һиңә бер кем дә кәрәкмәй... Бәндәнең бар йәшәйеше ошо ике сик араһында...
• Уйланыр уйҙар уйланылһын... Әйтер һүҙҙәр әйтелһен... Ҡылыныр эштәр ҡылынһын... Тик... Сер - сер булып ҡалһын...
• Ҡайһы бер яҙыусының оҙаҡ йылдар буйына бер нимә лә яҙа алмауы - бәлки, уның иң оло ижадылыр ;)
• Гел изге уйҙар ғына уйлап йөрөүең һинең изге кеше булыуыңды аңлатмай әле...
• Үҙеңде генә яратыуҙың бер ыңғай яғы бар: бер кемгә лә бурыслы түгелһең...
• Һеҙҙең гүзәл сәскәгә ҡарап һоҡланыуығыҙ, шул уҡ сәскәнең һеҙҙең менән һоҡланырға тейешлеген аңлатмай бит әле...
• Яңғыҙлыҡ сәйгә айырым бер үҙенсәлекле тәм өҫтәй...
• Ысын азатлыҡ юғалтыр нәмәңде юғалтып бөтөүҙең аръяғында башлана...
• Тормошта бер нәмә лә аңламағанымды аңлағанға тиклем миңә барыһы ла аңлашыла ине...
• Ҡылырлыҡ гөнаһтар бөткәс, ул, аптырағандан, тәүбәгә килде...
• Яҡын кешеңә нимәлер аңлатырға тейешһең икән... Тимәк, бик яҡын түгел... Тимәк, бик аңлатырға ла кәрәкмәй...
• Упҡынға осорға икән... Күҙҙе йоммағыҙ... Һәләкәт алдынан матурлыҡҡа һоҡланып өлгөрөргә мөмкин...
• Мөхәббәт яланғасландыра... Тәнде генә түгел, йәнде лә... Тәнде кейендереү оҙаҡ түгел дә... Яланғас ҡалған йәнгә һыуыҡ ел үтә өрөп аптырата аҙаҡ...
• Кемдер “үҙемә киттем”, ти... Кемдер – “үҙенән китә”... Асылда, ялған... Быларҙың икеһе лә... Кеше үҙенә лә, үҙенән дә китә алмай... Кемдер, нимәлер өсөн, хатта ки, үҙең өсөн яуаплы булырға теләмәгәнлектән йә бер нәмә лә эшләгең килмәгәнен аҡларға маташҡанлыҡтан килеп сыҡҡан һүҙҙәр...
• Һәр тамсы үҙен диңгеҙмен тип хис итә... Шунһыҙ... Йәшәүҙең ни мәғәнәһе?..
• Үҙемдең еңеүемдән еңелдем дә...Байтаҡ ҡына ятҡас... Еңелеүемде яңы еңеүгә әйләндерҙем...
• Йәшәйбеҙ, тиһегеҙме?.. Юҡ, һеҙ бер төндән икенсеһенә йүгереп үтәһегеҙ... Яҡтылыҡ аша ҡараңғынан ҡараңғыға һикерәһегеҙ... "Үҙ-үҙеңә илткән юл"
• Мин ваҡытты һуҙа беләм... Ваҡыт үҙе күрһәтә, кемдең еңгәнен, кемдең еңелгәнен...
• Яҙмыштан хәйер һорамайҙар...
• Ҡазанда - 50 йән... Ригала - 33... Теге ҡаҡ һөйәк ҡарсыҡ элек салғы менән йөрөй ине... Хәҙер косилкаға күсте шикелле...
• Кисә йөрәк аҡылға импичмент иғлан итте...
• Күп һөйләп тә, бер нимә лә өндәшмәҫкә өйрәндем... Инде өндәшмәй генә һөйләшеп өйрәнергә ине...
• Бер төн... Йә ул күҙ йомоп асҡан ара ғына... Йә уға мәңгелек һыя...
• Ҡулын һуҙҙы... Һәм йылмайҙы... Уға бағышлана...
• Дошман пуляһынан ҡаплаған кеүек, бөтмәҫ һағыштан һаҡланың, дуҫым...
• Кемдеңдер алдында иҙән һепергән ҡанаттар ҡабаттан осорға һәләтен юғалта...
• Ике дуҫтың береһе - ҡол. Ғашиҡтарҙың - икеһе лә...
• Кемделер үҙ-үҙенә ышандырырға маташыу һинең үҙ-үҙеңә булған ышанысты кәметергә мөмкин...
• Әгәр хыял булһа... Ул өмөт менән нығытылһа... Уларҙың нигеҙендә сабырлыҡ ятһа... Икән дә ул...
• Тормошта ҡаршылыҡтар булһа - булһын, башыңда ҡаршылыҡтар булмаһын...
• Аллаһ рәхимле. Беҙ, яуызлыҡ тип, ҡабул иткәнде, Ул изгелеккә әйләндерә... Сөнки беҙ сәбәптәрҙә сыуалып соҡсонғанда, Ул эҙемтәләрҙе хәстәрләй...
• Әрләүҙән туҡтаһалар, күңелдә шик ярала: Алла һаҡлаһын, әллә йәлләйҙәрме икән?..
• Бөтә батырлыҡтар ҡатын-ҡыҙ хаҡына ҡылына... Бар ахмаҡлыҡтар ҡатын-ҡыҙ арҡаһында эшләнә...
• Телеңде сығарып, йә урта бармағыңды күрһәтерлек хәлең бар икән - һин яҙмышҡа баш эймәйһең әле ;)
• Силикон хистәр заманы...
• Сәйер кешеләр... Сәйер һүҙҙәр... Сәйер ҡылыҡтар... Әҙәми зат ҡапыл ғына бөтәһе бер юлы сәйерлегенән арынһа, донъя ни тиклем сәйер булып ҡалыр ине. Һәм күңелһеҙ...
• Тормош ауыр, тиҙәр... Йә еңел... Кем уны күтәреп ҡараған һуң? Һәм уның ауырлығын-еңеллеген нимә менән сағыштырып үлсәйҙәр икән?
• Ғашиҡ йәндәр бер-береһенән китмәй... Бер ҡасан да... Араларҙа саҡрымдар, йылдар булһа ла...
• Өс нәмә кешенән философ яһай: кире ҡайтарып булмаҫлыҡ юғалтыу, ғәфү ителмәгән ғәйеп тойғоһо һәм оҙайлы ямғыр...
• Әллә ниндәй быйыл әбейҙәр сыуағы, тип һуҡрана халыҡ. Ғәфү итегеҙ, әбейҙәре ниндәй - сыуағы ла шулайыраҡ инде ;)
• Кешенән ялҡырға мөмкин, уны яратмаҫҡа, хатта, күрә алмаҫҡа ла мөмкин... Тик... уның менән һоҡланыу өсөн сәбәптәр барыбер күберәк.
• Телһеҙлек - аралашыу өсөн физик мөмкинлектәрҙең сикләнеүе генә түгел. Ғүмер буйы һөйләшеп йөрөгәндәрҙең араһында ла телһеҙҙәр күп...
• Парадокстар яҙа, тиһегеҙме? Бөгөн плинтустарҙы буяныҡ, буяу еҫе үҙенекен эшләй ;)
• Намыҫыңды һатҡан хаҡҡа тыныс йоҡо ала алдыңмы?..
• Яралар иҫке... Тоҙ ғына яңы...
• Нисек кенә дөрөҫ йәшәргә теләһәң дә, кемгәлер нимәлер барыбер оҡшамаясаҡ... Шулай булғас, ниңә үҙеңсә йәшәмәҫкә?...
• Йәнә һайлау: “бер нимә лә” менән “бер ҡасан да” араһында...
• Намыҫ һуңғы ваҡытта үтә лә баҫалҡы һәм тыйнаҡ булып китте: кешеләрҙе бик борсомаҫҡа тырыша...
• Һүнгән өмөттө тик бер генә нәмә алыштыра ала: яңы өмөт.
• Йығылһалар, тороп, төкөрөп китәләр... Элек - йығылған урынға, хәҙер - торорға ярҙам иткән кешенең битенә ;)
• Яратыуҙан төңөлгән күңел ағыуҙан туҡтаған йылға һымаҡ: яйлап мүк баҫа, һаҙға әйләнә...
• Һүндерегеҙ ҡояшты, минең яҡтылығым да етер, тине тәккәбер Ай...
• Нимә һөйләгәнеңде ҡолағың ишетһен. Тик ҡолағың нимә ишетә – шуны һөйләмә...
• Яңғыҙ ҙа йәшәргә мөмкин. Яныңда яратҡан кешең булһа...
• Шыуышырға тыуғандар төштәрендә лә осмай...
• Фекер тарлығы хәйләнең киңлегенә килтерә.
• Мейескә тығылған утынға ҡайһылай яҡшыраҡ икән: беренсе шырпынан тоҡаныумы, әллә... ун икенсеһенәнме?

Боронғоға заманса ҡараш

• Тырышҡан - ташҡа ҡаҙаҡ ҡаҡҡан. Ул таштан-ташҡа ҡаҙаҡ ҡағып йөрөгәндә, бисәһе емерек ҡойманы, мунсаның ишеген, һарайҙың тәҙрәһен йүнәтеп ҡуйған...
• Эҙләгән - тапҡан. Тапҡанын күргәс, юҡҡа эҙләгәнмен, тигән уйға батҡан.
• Тырмаға баҫып маңлайына алған кешене нимә йыуата ала? Шул уҡ тырмаға тағы ла кемдеңдер баҫҡанын күреү...

Оҙон фекерҙәр

• Ҡар бөртөгө алты мөйөшлө... Дүртәү, йә етәү түгел... Һыуҙар үргә аҡмай... Тәүлектә егерме дүрт сәғәт... Өлөшләтә ауырлы булмайҙар... Гамлет менән Спанч Боб – икеһе ике донъянан... Урал батыр өсөнсөһөнән... Аннушка һатып алған көнбағыш майы ҡасан булһа ла, ҡайҙа булһа ла барыбер түгеләсәк... Бары ла үҙ урынында һәм үҙ ваҡытында... Факттар, дәлилдәр, ҡанундар... Ғөмүмән, донъяла – тәртип... Ер аҫтында ла, ер өҫтөндә лә... Йыһанда ла... Меңәр, миллион йылдар буйына... Тик... Кешенең күңелендә генә мәңгелек хаос... Әлмисаҡтан бирле... Иғлан ителмәгән һуғыш... Ахырһыҙ яу... Аҡыл менән тойғо араһында... Нәфсе менән выждан, теләк менән мәжбүрилек, шәхсиәт менән ижтимағилыҡ, хыял менән ысынбарлыҡ, ирек менән сикләнгәнлек араһында... Тәртипһеҙлек түгел... Әммә тәртип тә юҡ... Шулай булған... Шулай... Һәм шулай буласаҡ...
• Үҙәк телеканалдар һымаҡ бай йөкмәткеле һәм һис мәғәнәһеҙ көндәрем күп уйлау һәм бер нәмә лә эшләмәү менән мөлдөрәмә генә тулы...
• Ат йылы... Беҙҙеңсә - йылҡы... Ҡыҫҡаһы, киләһе йылда муйындарығыҙҙы ҡамыт быумаһын, теҙгенде ныҡ тартмаһындар, ауыҙлыҡ ауыҙҙарҙы йыртмаһын, арҡалыҡ умыртҡаны баҫмаһын, бауырлыҡ аҙымдарҙы тарайтмаһын, ҡойошҡан ҡойроҡ аҫтын ышҡымаһын... Колхоз һолоно мул бүлһен... Беҙгә тәғәйен һолоно конюхтар һатып эсмәһен... Һәм... Һәм... Ҡыҫҡаһы, бәхетле булығыҙ...
• Йылан йылы тамам... Иншалла... Арыным йыл буйы йыландан сағылып... Ҡырҙан килгәндәре лә саҡты, ҡуйындан сыҡҡандары ла... Тик... Барыбер... Һәйбәт кешеләр күберәк осрағандыр... Юлымда осрағандарҙың һәм юлымдан киткәндәрҙең барыһына ла рәхмәт... Бына... Йыл аҙағына оҙайлы бәләләрҙең яҡшы ахыры: "Һомай" студияһының премияһы... Беләһегеҙме?.. Рәсми мисәте булмаған, ҡулдан ғына яҙылған ошо шөһрәтнамә минең архивымда иң ҡиммәтле танытмаларҙың береһелер... Ихласлығы менән... Рәхмәт, ҡыҙҙар!
• Бәғзе буҙ турғайҙың төшөндә бөркөт булып осоуы мәҙәк түгел... Ҡайһы бер бөркөттәрҙең буҙ турғай яҙмышына күнеүе ҡыҙыҡ... Һәм ҡыҙғаныс...
• Уҡытыусыларығыҙҙы иҫләйһегеҙме? Барыһын да?.. Мин - юҡ... Сөнки күп улар... Бәлки, биш меңдер... Бәлки, ун мең... Күберәктер, моғайын... Асылда, 50 йыл буйына тормошомда осраған һәр кем минең өсөн уҡытыусы булды... Һәр береһе нимәгәлер өйрәтте... Атларға, һөйләшергә, хәреф танырға, бейергә, сылғау урарға, һүгенергә, шиғыр яҙырға, тәмәке тартырға, уйларға, матурлыҡты күрә белергә, гөнаһ ҡылырға һәм тәүбәгә килергә, йәштәр аша көлөргә, йылмайып ҡына иларға, күҙҙәргә ышанмаҫҡа, бер үк тырмаға 101 мәртәбә баҫырға, кешенән тамам биҙергә һәм барыбер уға ышанырға, ялған менән ике ҡуллап күрешергә, яҙмышыңа яҙған менән риза булып айырылышырға... Күп нимәгә өйрәттеләр улар... Йәғни, йәшәргә... Хәйер, әле лә һәр яңы көнгә беренсе синыф уҡыусыһы тәү ҡат мәктәп тупһаһы аша атлап үткән кеүек инәм...
• Һәр яңы көн мине алышҡа саҡыра... Йөҙөндә - йылмайыу... Йылмайыуында серле сәм дә, сәйер уйын да, етди ҡәтғилек тә сағыла... “Алыш бармы, атыш бармы?” – ти... Яуап урынына мин дә йылмайғандай итәм... Һәм ике усымды күрһәтәм... Бына, йәнәһе, ҡулдарым да буш, күңелдә лә мәкер, хәйлә юҡ... Тимәк, атыш – атаң башына, алыш бар... Йә, бөгөнгә ниндәй һынауҙар әҙерләнең, өр-яңы көн?.. Ниндәй бейеклеккә күтәрерһең, ниндәй түбәнлеккә төшөрөрһөң?.. Нимә табырмын, нимә юғалтырмын?.. Ҡайһы дуҫ аяҡ салыр, ҡайһы дошман күтәреп торғоҙор?.. Кем йәнде яралар, яраларҙы кем бәйләр?.. Хәйер, хәҙер инде мин бер кемгә лә арҡа менән боролмайым... Был – дөрөҫ түгел... Еңелдән дә түгел... Әммә шулай тынысыраҡ...

Һәр яңы көн мине алышҡа саҡыра... Ҡабул итәм саҡырыуын... Аҙаҡҡаса шулай буласаҡ... Бәлки... Бер көн килеп... Шул көндәрҙең береһендә тороп ҡалырмын... Ә әлегә... Һәр көн аҙағына... Төнгә ингән саҡта үҙем менән хыял һәм өмөт ҡала икән – тимәк... Әлегә мин еңеүсе... Хыял менән өмөт бар саҡта һин мине еңә алмаҫһың... Бик тиҙ генә...

• Бәғзе берәү үҙен юғалтҡан, имеш... Кемдер, үҙемде таптым, ти... Буш хәбәр... Төптө ялған... Үҙеңде юғалтып та, табып та булмай... Бары һине уратып алған донъяңды, әйләнә-тирәңде үҙеңә яраҡлаштырырға мөмкин... Йә бөтөнләй мөхитеңде алыштыр... Тәүәккәллә... Шунда ғына “үҙеңде табырһың”... Ә инде үҙеңде мөхиткә һәм донъяға яраҡлаштырып, ҡулайлаштырып, йәмғиәттең һиңә көсләп табылған ҡалыптарына ҡыуып индерергә маташыуың - баяғыса “үҙеңде юғалтыуға” килтерәсәк...
• Ниһайәт... Осраштыҡ бына... Күптән күрешкән юҡ ине... Урау юлдар аша килдем һиңә... Һағындырғанһың... Танһыҡһың... Нимә әйтергә лә белмәйем... Өндәшмәйек... Өнһөҙ генә бергә булайыҡ... Их, ниндәй ҡәҙерлеһең һин, ЯЛ КӨНӨ...
• Башҡорт халҡына кемдәр ҡаршы? Глобализация, либерализм, масондар, баҙар иҡтисады, оптимизация, федераль сәйәсәт, урындағы етәкселек... Тик былар – 2-се, 3-сө, 4-се, 5-се, 6-сы, 7-се урында торған сәбәптәр... 1-се урында – ул үҙе... Үҙенә үҙе ҡаршы...
• Ең һыҙғанып, балаҡ төрөп, дәртләнеп, осҡондар сағып, табан аҫтында ерҙе тоймай, ҡолаҡтарҙы ҡайсылап, ҡойроҡ сәнсеп, бөтәһен дә таң ҡалдырып, барыһын һоҡландырып, дуҫтарҙы ҡыуандырып, дошмандарҙы көнләштереп... Ҡыҫҡаһы, бер нимә лә эшләге килмәй ;)
• Әйләнә буйлап... Ҡойроғон баҫтырған эт кеүек... Әллә үҙ-үҙеңдән ҡасыпмы?.. Азатлыҡтан әрем тәме килә... Һәм яңғыҙлыҡ еҫе... Тағы ла - хард-рок... Әллә блюз? Хәл юҡ... Сабыр бул йөрәк... Аҡыл, һин түҙ...
• Ниңә килгәнен дә аңламаным.... Ни өсөн китеүен дә төшөнмәнем... Рөхсәт һорап торманы... Килергә лә, китергә лә... Бер нимә лә алманы... Бер нимә лә ҡалдырманы... Әйтерһең дә, вокзалда... Электричкаһын көтөргә... Тик килгән поезға ултырманы... Ингән ишегенән кире сығып китте... Үҙ алдына үҙе менән һөйләште лә... Ҡарашы ғына ҡалды... Чешир бесәйенең йылмайыуы кеүек...
• Күк Ергә яҡынайҙы. Һәм Көн - төнгә.

Офоҡта - ҡыш шәүләһе.

Һин нөктә ҡуйҙың әкиәт аҙағына.

Ә мин - һорау билдәһе...

• Әйҙә, бөгөн өндәшмәйек... Ямғыр ғына һөйләһен... Көҙгө ел көйөнә... Минең нимә уйлағанымды... Һинең нимә тойғаныңды... Һинһеҙ, минһеҙ саҡта ниҙәр булғанын... Һинле, минле таңдың нисек атҡанын... Нисек төндөң йәндәр аша аҡҡанын... Талған йөрәк йәнә ҡаҡҡанын... кемдең нимә юғалтҡанын, нимә тапҡанын... Ағастарҙың яҙҙы көткәнен... Һәм... Сикәләрҙе йәштәр өткәнен... Өндәшмәйек... Ямғырҙы тыңлайыҡ...
• - Дуҫтарың күпме?

- Берәү ҙә юҡ.

- Әгәр шаяртмай ғына әйтһәң?..

- 7 млрд...

• Теләһәң дә... Төндә ҡалып булмай... Таңдан - ҡасып... Көҙ... Машиналар... Тегеләй-былай... Һыуыҡ ҡояш... "Бәйләнештә" - меңгә яҡын дуҫ... Телефонда - биш йөҙҙҙән артыҡ контакт... Былай ғына... Һәр кем - үҙенсә... Бәхетле йә бәхетһеҙ... Машиналар... Тегеләй-былай... Бәхет менән бәхетһеҙлек араһында... Ташый... Ҡайҙандыр киткәндәр, ҡайҙалыр етмәгәндәр... Барыһы ла ҡәҙимгесә... Һәүетемсә... Тик... Күләүектә йәйғор йәшенгән... Һәм танһыҡ йылмайыу... Ҡайҙалыр... Яҡында... Өн менән төш араһында... Мөғжизә... Барыбер... Тимәк...
• Йәнәһе смайликтарҙы американдар уйлап сығарған... Бәлки... Йылмайып торғанын... Ә бына телен сығарып торғанын... Баҡһаң, Достоевский... Бөгөн Камюны уҡыйым... Абсурд тураһында... Шунда тап булды..."Братья Карамазовы"... "Шатову вернулась жена.

На листке, который найдут после его смерти, ему хочется нарисовать "рожу с высунутым языком"... Үәт...

• Сәскәһен дә алырға мөмкин... Башҡаһын да табырға... Тик бына... Йылдар һуҙымында таушалған күҙҙәр һәм туҙған уйҙар менән ни ҡылырға?...
• Тимур Ямаловтың ижади кисәһендәге сығышымдан...

Ҡараңғылыҡ ҡара шаршауы менән Ерҙе япҡас... Төн һайын... Йымылдаған гәүһәр бөртөктәре һибелгән көмбәҙ аша, алыҫ сикһеҙлектән, өнһөҙ бушлыҡтан бер моң ишетелә... Юҡ, юҡ... Моң да түгел, хатта, дөрөҫөрәге, бер сың... Сың... сың...сың... Нимә бар был серле сыңда? Атылған йондоҙҙоң һуңғы иңрәүеме, атаһы менән әсәһе араһында иркәләп йоҡлап киткән сабыйҙың тылсымлы төшөмө, донъялыҡта бергә була алмаған ике ғашиҡ йәндең Күктәрҙә ҡушылыуының шатлыҡлы ауазымы, көмөш һыулы шишмә ағышымы, Етегәндең парһыҙ ҡалған йондоҙоноң бөтмәҫ һағышымы, илен-ерен һаҡлап сапҡан яугир атының сал быуаттар аша ишетелгән тояҡ тауышымы, һөйгәне янына ашҡынған һылыуҙың йөрәк ҡағышымы, балаларын көтөп яңғыҙлыҡтан ялҡҡан әсә яҙмышымы?.. Яуап юҡ... Ә сың бар... Ишетәһегеҙме: сың,сың, сың...

• Саҡ ҡына иғтибар... Һаҡ ҡына ишара... Туҡтағыҙ... Үҙегеҙҙе туҡтарға мәжбүр итегеҙ... Ишетегеҙ... Тауышты... Өндө... Кемдеңдер яраһы һулҡылдағанын тойоғоҙ... Сыҡмаған күҙ йәшен тойоғоҙ... Һиҙегеҙ... Үҙегеҙҙе һиҙергә мәжбүр итегеҙ... Кемдер мохтаж бит һеҙҙең аңлауға... Саҡ ҡына ишара... Һаҡ ҡына иғтибар... Кемдеңдер хыялының йыртыҡ елкәненә ямау, таушалған өмөт ҡанатына бер ҡауырһын булыр, уны аяҡҡа баҫтырыр, диңгеҙ киңлегенә ҡабат алып сығыр, яңынан күккә күтәрелергә әйҙәр... Беҙ һәр саҡ мохтажбыҙ... Көтәбеҙ... Күккә ҡарап... Күҙҙәргә текләп... Саҡ ҡына... Һаҡ ҡына... Һәр беребеҙ... Бер-беребеҙҙе...
• Һәр яңы көн һорау ҡуя. Мин табырға тейеш... Яуабын... Ул көтә... Һәр яңы көнгә мин һорау бирәм. Һәм көтәм... Яуабын... Кисектереү юҡ... Хаталар өҫтөндә эш тә... Кисәге яуап бөгөн ярамай. Көнгә лә... Миңә лә... Яуапһыҙ һорау йөк һымаҡ... Һаман аҫҡа тарта... Төпкә... Түбәнгә... Артҡа... Үткәндәргә... Үткәндәр менән иҫәп-хисапты өҙөргә кәрәк... Ауыр булһа ла... Ҡасан булһа ла... Шунһыҙ иртәгә юҡ... Яңы көндөң һорауы ла... Тимәк яуабы ла... Ваҡыт... Түләргә... Яуап бирергә... Иртәгә... Бөгөн һуң...
• Итәнсәк, офоҡтар алланғанда.... Йә кисен, ҡояш тауҙы артылғанда... Көнсығыштан... Бәлки көнбайыштан... Һеҙ көтмәгәндә... Һәр берегеҙ үҙ мәшәҡәтенә сумған мәлдә... Ул ҡайтасаҡ... Мотлаҡ... Ниҙәр күрҙе?.. Ниҙәр кисерҙе?.. Нимә юғалтты?.. Ниҙәр тапты... Ғәфү үтенергә ҡайттымы? Тәүбәһенә?.. Шым ғына... Әллә оло байрам яһарғамы?.. Шаулы... Беҙ белмәйбеҙ... Беҙ көтмәйбеҙ... Ә ул ҡайтасаҡ!.. Заһир Байыҡ... I'll be back.
• Бындай хәлде, хатта, аҡһаҡалдар иҫләмәй. Беренсе тапҡыр... Яңғыҙ микрофон, яңғыҙ гитара һәм яңғыҙ йырсы. Тынлыҡ... Ҡараңғылыҡ... Моң... Һүҙҙәр... Тамашасы менән күҙгә күҙ ҡарашып... Сәхнә юҡ... Зал да... Бөтәһе бергә... Берҙәм... Бер бөтөн... Монолог... Өс кимәлдә: Йырсы үҙ-үҙе менән һөйләшә - тамашасы менән һөйләшә - һәр тамашасы үҙ-үҙе менән һөйләшә... Нимә тураһынды был сәйер әңгәмә? Бер йондоҙ атылғанда, икенсеһе нимә кисерә - шул турала, һуңғы сиктең аръяғында ниҙәр бар - шул турала, Ҡош юлы буйлап ялан аяҡ атлағанда табандар аҫтында йондоҙҙар шығырлаймы - шул турала, яҙын морон төрткән бәпкә үлән нимәләр шыбырлай - шул турала, мөхәббәтле кешеләрҙең күҙҙәрендә ниндәй серле осҡон уйнай - шул турала... Ялған һүҙҙәр йәнде яралағанда нисек һаман Изгелеккә ышанырға - шул турала... Ғөмүмән... Бәләкәй принц Ҡош юлы буйлап сәфәргә сыҡты...
• "Буранбай". Был бөйөк йырҙы тыуҙырған, быуындан-быуынға, изге аманаттай тапшырып, һаҡлап ҡалған һәм ошо кимәлдә башҡара алған халыҡ бөтөр тип кем әйтә ала???
• Мәғәнә... Йәшәүҙең мәғәнәһе... Беренселлек ҡайҙа: йәшәүҙәме, әллә мәғәнәләме? Мәғәнә эҙләйбеҙ... Һәр ваҡыт... Бөтә ерҙә лә... Күҙҙәрҙән, һүҙҙәрҙән, кинәйәнән, ым-ишаранан, эш-хәрәкәттән, мөнәсәбәттән... Һәм табабыҙ... Табабыҙ!!! Бөтөнләй мәғәнә булмаған ерҙә лә... Мәғәнә булырға тейеш түгел ваҡытта ла... Тынлыҡтан да, өнһөҙлөктән дә, бушлыҡтан да... Йәшәүҙең мәғәнәһен юғалтмаҫ өсөн табабыҙ... Беренселлек ҡайҙа??? Мәғәнә эҙләп йәшәүҙәме, әллә йәшәүеңдә - бөтә мәғәнәме?.. Нулде нулгә ҡушһаң да, ҡабатлаһаң да, һөҙөмтә бер: бушлыҡ... Үҙеңде һанға һанайһың, кемделер һанға һанайһың – ҡушаһың, ҡабатлайһың, алаһың, бүләһең... Мәсьәләнең яуабы бер - бушлыҡ... Нулгә нулде ҡушһаң да, алһаң да, һөҙөмтә бер: бушлыҡ... Мәғәнә?.. Ҡушыуҙа һәм алыуҙа... Халыҡта бер һүҙ бар: “мәғәнәһеҙ”... Өс нәмәнән ҡурҡам... Йырлай-көйләй белмәһәм дә - “моңһоҙлоҡтан”, уйынсаҡ Амур ҡабат-ҡабат ағыулы уғы менән атып яралаһа ла – “мөхәббәтһеҙлектән”, йәнә-йәнә нулде нулгә ҡушып, ҡабатлап, бер үк һөҙөмтә алһам да – “мәғәнәһеҙлектән”...
• Ҡыҙҙарҙы, беренсе, икенсе, өсөнсө, бишенсе..., тип бары физкультура. бары уҡытыусыһы әйттерә ала... Башҡа осраҡта уларҙың һәр береһе: беренсе, беренсе, беренсе...
• Иманға тартылыусылар артты. Мәслихәт! Тик... Иманға илтеүсе юл ӘҘӘП, ӘХЛАҠ, яҡыныңа ИХТИРАМ, башҡаларға ХӨРМӘТ, ИЛТИФАТ кеүек сифаттар аша үтә, минең уйымса. Хәҙер шуларға һуғылмай ғына тура ынтылыусылар күбәйҙе...
• - Алдамайһыңмы?

- Алдашырға мин һиңә ыштанһыҙ малайҙыр шул...

Ғәҙәттә, шулайыраҡ һөйләшәләр... Ә ыштанһыҙ малайҙар алдамайҙар бит. Улар әле хәйләне белмәй. Тормошто нисек бар – шулай күрәләр, нимә уйлайҙар – шуны һөйләйҙәр...

• Оҙайлымы, әллә ҡыҫҡа ваҡытлымы, юғары рухи ҡараштар берлеге менән төйнәлгәнме, әллә түбән ике енес инстинктары менән бәйләнгәнме – иң мөһиме, икәү бер береһенә “яратам” тип әйткән икән – бындай мөнәсәббәттәрҙән һуң кемеһенеңдер “дуҫ булып ҡалырға” тәҡдим итеүе – бер генә нәмәне: булғандарға хыянатты, әйткән һүҙҙәрҙән, биргән вәғәҙәләрҙән һәм бергәләп тә, айырым-айырым да кисергәндәрҙән баш тартыуҙы, тойғоларҙың һәм хистәрҙең ялған булыуын таныуҙы аңлата... Бәлки, дошманлыҡ та булмаҫ, әммә дуҫлыҡтың булыуы ла шикле... Һуңғыһы бер генә осраҡта мөмкин, әгәр ҙә икеһе лә бер юлы көлә-көлә үткәндәрҙең оло хата булыуын таныһа... Һуғышта ғына солох була, ә мөхәббәттә?..
• ... Хушлашҡан һайын әсәйемә ниндәйҙер һүҙ әйтелмәгән тойғо ҡала. Бик мөһим һүҙ... Тик аңлай алмайым: нимә тураһында ул һүҙ. Ғәфү үтенергәме?.. Әсәйҙәр былай ҙа барыһын да ғәфү итә... Рәхмәт әйтергәме?.. Быныһын әсәй әйтмәйенсә лә белә: бөтәһен дә күҙҙән һәм һүҙҙәр араһынан уҡый... Ә тойғо ҡала... Бик мөһим һүҙ тураһында...
• Изгелекте лә һайлап ҡына ҡылырға кәрәктер, моғайын. Ҡабул итә белгәндәргә генә... Юҡ, рәхмәт әйтеүҙәре-әйтмәүҙәре тураһында түгел һүҙ, ҡыуана белгәндәр хаҡында...
• Мәскәү, Сочи, Себер киңлектәре... Гастарбайтерҙар... Быныһына түҙергә мөмкин... Килешмәһәң дә... Тик тотош милләтең үҙ ерендә гастарбайтер (нем. – ҡунаҡ-хеҙмәтсе) хәлендә булыуы ғына ваҡыт-ваҡыты менән әрнетә йәнде...
• - Һин миңә ышанаһыңмы?

- Юҡ.

- Улай булғас, ни эшләп...

- Һаман һинең менәнме?.. Ә мин башҡаларға һиңә ҡарағанда ла нығыраҡ ышанмайым...

• Ҡатын-ҡыҙҙар кис ултырып, донъяларын онотоп илаһи хистәр тураһында мелодрамалар ҡарай. Беҙ, ирҙәр, йыш, бик йыш көләбеҙ шунан. Ә улар һаман ҡарай. Тормошта осратырға насип булмаған мөхәббәт тураһында ҡарай улар, наҙлы һөйөү тураһында, бәхетле тамамланған әкиәт хаҡында... Йыш ҡына үҙҙәрен күрергә теләй улар. Кемдәрҙер ьиреп еткермәгәнде зәңгәр экрандар аша ала улар... Беҙ көләбеҙ...

Беҙ бит, ирҙәр, һуғыш тураһында героик фильмдар ҡарайбыҙ... Тик... Беҙ ҙә үҙебеҙҙе шул киногеройҙар араһында күрәбеҙ, улар менән донъяны яуызлыҡтан ҡотҡарабыҙ, һөйгәндәребеҙ хаҡына оло ҡаһарманлыҡтар ҡылабыҙ... Беҙ көслө, сибәр, ҡурҡыу белмәйбеҙ... Йәнәһе... Тормошта ҡулыбыҙҙан килмәгәнде экрандан эҙләйбеҙ... Исмаһам... Ә ҡатындар “күбекле” сериалдар ҡарай... Беҙҙең арҡала... Беҙ, ирҙәр, йыш, бик йыш көләбеҙ шунан...

• Бер ҡыҙ бала кәңәш һораны. “Юлға сыҡҡанһың икән, атла, – тинем. – Артыңдан таш бәрәләрме, сәскәләр ырғыталармы – был хаҡта уйлама... Бары юлыңдың хаҡ булыуына ышан. Ысын күңелдән ышан...”
• Нисек өйрәтергә һине – минһеҙлеккә,

Нисек күндерергә мине – һинһеҙлеккә?..

• Беҙ һәр ваҡыт китәбеҙ... Аҙға ғына йә бик оҙаҡҡа... Китәбеҙ өйҙән, кешенән... Кемдәндер, нимәнәндер... Кемгәлер, нимәгәлер... Китәбеҙ ҡасып, китәбеҙ эҙләп... Иртәнге эңерҙә, киске һалҡында китәбеҙ... Ауға, яуға... Ил гиҙергә, юғалтмағаныбыҙҙы табырға... Был – беҙҙең булмыш, ирҙәр яҙмышы... Китәбеҙ... Арттан көл һибеп ҡалалар йә фатиха бирәләр...
• - Ялҡытты ла бер төрлөлөк. Бәлки уйын уйнап алырбыҙ?

- Ниндәй уйын?

- Мәҫәлән, йәшенмәк. Һин минән йәшенәһең, мин - һинән. Мәңге тапмаҫлыҡ итеп...

• Утыҙ йәшкә тиклем тормошто үҙеңә яраҡлаштырырға маташаһың. Утыҙҙан алтмышҡа хәтлем үҙеңде - тормошҡа. Аръяғына кем-кемгә һәм нимә нимәгә яраҡлашырға тейеш икәнен дә онотаһың...
• Зевс Прометейҙы нисек язалаған? Ҡаяға сылбыр менән бәйләп ҡуйған. Көн һайын бөркөт осоп килеп уның бауырын суҡыған. Бауыр ҡабат үҫкән. Йәнә килгән бөркөт. Йәнә, йәнә... һәр төн Хәтер Йәнде суҡый. Суҡый ҙа суҡый... Ҡабат-ҡабат...
• Ғәйет мөбәрәк, байрам күркәм булһын! Ҡорбан салғандарҙың да, салмағандарҙың да ниәттәре ихластан, ғәмәлдәре изге, уйҙары саф, теләктәре матур булһын, өмөттәре аҡланһын! Аллаһтың рәхмәтенә ирешһен һәр ҡайһыныһы! Ҡорбан байрамында барыбыҙ ҡорбанлыҡтан арынайыҡ: нәфсе ҡорбаны, мин-минлек, тәккәберлек, хәмер ҡорбаны, яуыз уйлы кешеләр һәм мәкер ҡорбаны булыуҙан! Үҙ иркең менән ҡорбан булыуҙың биш хаҡын таныйым мин: Аллаһ хаҡын, халҡың өсөн хаҡ юл хаҡын, атай-әсәй хаҡын, бала хаҡын, мөхәббәт хаҡын. Шәһитлек тураһында түгел һүҙ, мөкиббәнлек тураһында...

P.S. Тейеш түгелен йәнәш яҙһам әгәр, ғәйеп ташларға ашыҡмағыҙ, зинһар. Үзем инанғандарҙы ғына теркәнем - язаһын да үҙем күтәрермен...

• Тыуған көнөм менән ҡотлап, берәү минә гармония табыуымды теләне. Теләге изгеләрҙән булғандыр, һүҙ юҡ. Рәхмәт! Тик шул һүҙ - гармония... Был һүҙ йә шыр тилеләр, йә лаяҡын иҫеректәр, йә эгоистар философияһынан. Гармония - үҙ-үҙең менән килешеп йәшәү. Ә башҡалар менән? Илең яҙмышы, халҡың хәле менән. Һинән ярҙам өмөт иткәндәр, һүҙ көткәндәр менән. Гармония - минең өсөн битарафлыҡтың башы, ғәмһеҙлектең тәүге аҙымы. Көнсығыш философияһы - эгоизм философияһы. Көнбайыш философия - индивидуализм философияһы. Беҙҙең яҙмышыбыҙ ҙа башҡа. Булмышыбыҙ ҙа... Беҙҙең философия - "Урал батыр" философияһы. Унан тыш, гармония - ижадтың һәләкәте. Яныу, көйөү, үрһәләнеү һәм тетрәнеү теләгеҙ. Миңә лә, бер берегеҙгә лә... Рәми Ғарипов эпиграф итеп Горькийҙың һүҙҙәрен алған бит: "Килешмәҫкә килдем был донъяға!" "Бөтә Дон Кихоттар минең арттан, Эй, фекерем, булма фәхишә!" Бына шулай. Йәки шулайыраҡ...
• - Һаумы!

- Һау... Һин кем?

- Һинең күләгәң.

- Ә ниңә мин һине бығаса күрмәнем?

- Сөнки һин ошоғаса Ҡояшҡа табан барҙың...

... Күләгәңдең артынан эйәреп йөрөгөң килмәһә, яҡтылыҡҡа табан атла.

• Киткәндәр кире ҡайтмай. Һүҙ мәрхүмдәр тураһында түгел: улар менән бөтәһе лә билдәле. Тереләр ҙә кире ҡайтмай. Айырылышҡаныңды ҡабат осратырға мөмкин, тағы күрешеү ҙә, ҡауышыу ҙа ихтимал, хатта. Бәлки ул аҡыллыраҡҡа әйләнгәндер, яҡшыраҡ, матурыраҡтыр, тик ул "ТЕГЕ" түгел. Айырылышҡан ваҡыт эсендә ул да үҙгәргән, һин дә. Һеҙ инде башҡалар. Дауам итеү мөмкин түгел, яңынан башларға кәрәк: "ТЕГЕНЕҺЕНӘН" баш тартып, "УНЫҺЫН" онотоп, "БЫНЫҺЫН" ҡабул итергә, танып, эҫенеп, һағынып өйрәнергә, яратырға... Киткәндәр кире ҡайтмай...
• Азатлыҡ етмәүгә һуҡраныу, ирек тарлығына зарланыу йыш ҡына бер нимә лә эшләмәү өсөн сәбәп, булдыҡһыҙлыҡты, ялҡаулыҡты аҡлау өсөн һылтау. Булған азатлығыцды бөтә тулылығында файҙаланмайынса ҙурырағын даулау бер кәнфитен ашап бөтмәйенсә икенсеһенә, өсөнсөһөнә ынтылған бала һымағыраҡ килеп сыға...
• Һөйөүҙең гәлсәр һарайынан сығыуға өс ишек бар: береһе - һағыш, икенсеһе - нәфрәт, өсөнсөһө - бушлыҡ... "Ә дүртенсеһе юҡмы ни, - тиерҙәр сабырһыҙҙар, - бәхет тигәне?" Ғәфү итегеҙ, ингән ишегегеҙҙәге яҙыуҙы уҡыманығыҙмы ни?..
• Беренсе тапҡыр яңылышлыҡ менән алдайҙар. Быныһы - ихласлыҡтан. Йә бер ҡатлылыҡтан. Икенсе тапҡыр, уйлап алдайҙар, зыян килтермәү өсөн, кемделер, нимәнелер һаҡлап ҡалыу маҡсатында. Быныһы - изгелек теләүҙән. Исмаһам, үҙеңә булһа ла... Өсөнсө тапҡыр ғәҙәт буйынса алдайҙар һәм артабан туҡтай алмайҙар. Быныһы - ялған.
• Иҫкән елде эләктереп алып ағасҡа бәйләгеҙ. Ишетелгән моңдо усығыҙға йыйығыҙ. Ҡояш нурҙарын ҡараңғы келәткә ябығыҙ... Йәйғорҙо тоҡҡа тултырығыҙ... Аптырайһығыҙмы? Мин дә!

Ә һеҙ мөхәббәтте аңларға һәм аңлатырға маташаһығыҙ...

• Әкиәттәге Йоморо икмәк кеүек... Әбейҙән дә ҡасырһың, бабайҙан да, айыу менән бүренән дә... Минән дә, тегенән дә... Тик төштәрең менән нимә эшләрһең? Улар бит һинең ихтыярыңда түгел. Улар бер кемдең дә ихтыярында түгел: ҡасып та, йәшенеп тә, ялҡытҡан фильм кеүек һүндереп тә булмай...
• Әйттеләр: "Ошо тылсымлы һарайҙа һинең бәхетең. Тик ишек бикле. Асҡысы ете диңгеҙ аръяғында ун ике башлы дейеү һаҡлаған мәмерйәлә. Дейеүҙе үлтереп, асҡысты алып килһәң, бәхет һинеке!" Тауҙар артылып, диңгеҙҙәр кисеп, дейеүҙең ун ике башын өҙөп асҡысты алып килеүемә... гәлсәр һарайҙың йоҙағын алыштырғандар ине...

Көндәр ҡулсаһы

• Ҡулса тоташты... Аҙна дауам иткән исемле көндәр тамам... Бәхетле булығыҙ һәм барығыҙға ла рәхмәт! Ҡыҫҡаһы, бөгөн Рәхмәт көнө! Рәхмәт әйтәйек дуҫтарға һәм дошмандарға, яҡындарға һәм алыҫтағыларға, яҙмышыбыҙға һәм билдәһеҙ киләсәгебеҙгә... Һәр кемебеҙҙең рәхмәт әйтер кешебеҙ бар. Һәр хәлдә, минеке...
• Йылмайып йоҡлап киттем кисә... Беренсенән, Сибайҙағы осрашыуҙарҙағы рух тантанаһы тәъҫире... Икенсенән, Мөнир Ҡунафин менән донъя, ижад һәм матурлыҡ тураһында иркенләп һөйләшеү мөмкинлеге булды... Өсөнсөнән... Хәйер, өсөнсөһө барыһы өсөн мөһим түгел ;) Ҡыҫҡаһы, Йылмайыу көнө бөгөн...
• Әгәр ҙә... Ул булмаһа...Йыл миҙгелдәренән тик Көҙ ҡалыр, күңелдәрҙе мәңгелек Боҙлоҡ алыр, киләсәкте йырып сыҡҡыһыҙ томан баҫыр, йырҙарыбыҙҙан һүҙҙәр ҡасыр ине... Әгәр ҙә... Ул булмаһа... Кем беҙҙе йоҡонан да, тамаҡтан да, аҡылдан да, юлдан да яҙҙырыр ине... Әл дә Ул бар... Ҡыҫҡаһы, бөгөн - Хыял көнө... Кисә Ул шундай яҡын ине ;)
• "Иртәгә"... Йәнәһе, барыһы ла шунда башланасаҡ... Тик һәр иртәгәнең йәнә иртәгәһе була икән... Шуға күрә... Бер ниндәй ҙә "иртәгә" түгел, барыһын - бөгөн!.. Ҡыҫҡаһы, бөгөн - Тәүәккәллек көнө... Беҙ һәр ваҡыт пландар ҡорабыҙ, уйлайбыҙ, иҫәпләйбеҙ, хыялланабыҙ, нииәтләйбеҙ... Тик... Тәүге аҙым эшләнмәй, әйтер һүҙ әйтелмәй, яуланыр үр яуланмай, килер бәхет килмәй ҡала... Ҡурҡабыҙ, оялабыҙ, үҙ-үҙебеҙгә ышанмайбыҙ, йә әрләрҙәр, йә көлөрҙәр тип шикләнәбеҙ... Шуға күрә - долой бөтә комплекстарҙы! Тәүәккәләйбеҙ! Бөгөн! Иртәгә түгел! "За флажки...."
• Кемдер... Ҡасандыр... Кемделер.... Ҡыҫҡаһы, бөгөн Ғәфү үтенеү көнө... Әгәр, бәғзе берәү үҙен ап-аҡ ҡына, саф һәм йомшаҡ ҡына, фәрештәләй йә сабый кеүек бер гөнаһһыҙмын, тип уйлай икән - уның өсөн ял көнө дауам итһен... Ә башҡалар... Һәр хәлдә, минең ғәфү үтенер кешем бар....
• Ял... "Ваҡ мәшәҡәт, ығы-зығы тамам..." Ҡыҫҡаһы, бөгөн һәм иртәгә - Ғаилә көнө... Киноға, театрға барығыҙ, урманға сығығыҙ, мунса яғығыҙ... Ҡунаҡ саҡырығыҙ... Бик булмаһа, йоҡо туйҙырығыҙ...
• Һәр иртә әсәйемә шылтыратам... Бөгөн дә... Ҡыҫҡаһы, бөгөн Әсәйҙәр көнө... Кем булыуығыҙға, ҡайҙа булыуығыҙға ҡарамаҫтан, хәҙер үк әсәйгә шылтыратабыҙ ҙа, уның "ИҢ-ИҢ ҠӘҘЕРЛЕ КЕШЕ" булыуын әйтәбеҙ... Һис сәбәпһеҙ, һылтауһыҙ шылтыратабыҙ... Ә инде... Кемдең ҡәҙерле кешеһе донъялыҡтан киткән булһа... Хәйер бирәбеҙ, доға ҡылабыҙ, иҫкә алабыҙ... Ә комментарийҙарға?.. Әсәйҙәребеҙҙең фотоларын һәм улар тураһында шиғырҙар...
• Ҡыҫҡаһы, оҙаҡ уйлап йонсоманым: бөгөн - Шиғриәт көнө... Көн һуҙымында, исмаһам, берешәр шиғыр уҡыйыҡ... Һәм Гүзәллеккә табан бер аҙым яһайыҡ, донъяны саҡ ҡына булһа ла йәмләйек... Тик үтенес бар... Уҡыған шиғырығыҙҙың бер генә строфаһын аҫтағы комментҡа элһәгеҙ ине...
• Ҡыҫҡаһы, эштәр шулайыраҡ: Айгөлдөң үтенесе һәм үҙемдең теләгем менән бөгөнгө көндө Татлы көн тип иғлан итәм... Туғандарығыҙҙы, яҡындарығыҙҙы, балаларығыҙҙы һәм, әлбиттә, һөйөклө үҙегеҙҙе һәр төрлө тәмлекәстәр менән һыйлағыҙ... Мин башланым да инде... Үҙемдән ;)
• Ҡыҫҡаһы, ошолай: булған һәм бер ҡасан да булмаясаҡ хоҡуҡтарымды файҙаланып, бөгөнгө көндө һәр берегеҙ өсөн Бәхет көнө тип иғлан итәм!.. Көсөгөҙ еткән, күтәрә алған, аңығыҙ иңләгән, тойғоларығыҙ түҙгән тиклем Бәхетле булығыҙ!

Әҫәрҙәре

• Юлдашбаев А.Р. Мәлъяҙмалар. – Өфө: Китап, 2010 2.
• Юлдашбаев А.Р. Яңғыҙлыҡ анатомияһы. – Өфө, 2011 3.
• Юлдашбаев, А.Р. Яуаплылыҡ ҡулға ҡәләм тоттора[Текст] / А.Р. Юлдашбаев //Йәшлек.- 2005.- №109.- 3 б. 4.
• Юлдашбаев А.Р.Әтәс йылын ҡаршылағанда [Текст]: хикәйә/ А.Р. Юлдашбаев //Ағиҙел.- 2007.-№3.-103-112 б. 5.
• Юлдашбаев А.Р. Үҙ хөкөм: ғәйепле, үтә бер ҡатлы [Текст] / А.Р. Юлдашбаев //Ағиҙел.-2008.-№1.-55-59 б.

Уның тураһында әҫәрҙәр

• Абдуллина Л. Ижадсы кредоһы[Текст] / Л. Абдуллина //Башҡортостан.- 2009.- №194.- 4 б. 2.
• Абдуллина, Л. Творчество насыщенной гражданственности [Текст] / Л.Абдуллина // Омет. - 2005. - №6. – С3. 3.
• Антология поэзии Башкортостана.Голоса веков./ Юлдашбаев Азамат.- Уфа:Китап, 2007.- С.434 - 436. 4.
• Алибаев, С. Расправие белые паруса... [Текст] / С.Алибаев // Агидель. – 2005. - №12. – С.106 – 108. 5.
• Бикбаев, Р. Судьбой предписано быть поэтом [Текст] / Р.Бикбаев// Агидель. - 2003. - №3. – С.137-140 . 6.
• Ишкинин,Т. Новая звезда политической журналистики [Текст] / Т.Ишкинин //Йэшлек. - 2005. - №6. – С.7 7.
• Хусаинов, Г. Большие раздумья о маленькой книге [Текст] / Г.Хусаинов //Башкортостан. - 2004. - №12. – С.3. 8.
• Шарафутдинов, Д. Истинный гражданин Азамат [Текст] / Д.Шарафутдинов // Башкортостан. - 2005. - №24. – С.6.

Һылтанмалар

• "Литературная карта РБ" сайтында мәғлүмәт (урыҫса)
• "Национальная литература" сайтында әҫәрҙәре (урыҫса)
• Зәйнәб Биишева исемендәге "Китап" нәшриәт сайтында Азамат Юлдашбаев тураһында мәғлүмәт (урыҫса)
• "Бельские просторы" сайтында мәғлүмәт һәм журналда баҫтырылған әҫәрҙәре (урыҫса)
• "Бәйләнештә" социаль селтәр сайтында шәхси диуары
• Азамат Юлдашбаев шиғыр уҡый