Wp/wls/Petelo Halagahu

Ne'e kau Petelo HALAGAHU i te haha'i ma'uhiga o te ma'uli fakafenua mo fakapolitike o 'Uvea nei.

Ne'e Faipule o Hihifo lolotoga ta'u e 40 (1954-1994) pea ne'e fono fakatelituale lolotoga ta'u e 30 (1962-1992).

Ne'e fualoa tana fua kavega pea gaue tahi mo Uluimonua Atonio SAKO pea mo Kulitea Atoloto UHILA ki te tauhi o te palōkia o Hihifo. Ne'e fakanofo o Faipule lolotoga te temi ae ne'e afio ai Lavelua Aloisia BRIAL pea hoko atu tana gaue mo tekeni ki te taki o te fenua lolotoga te temi ne'e afio ai leva Lavelua Tomasi KULIMOETOKE.

E mahino mai te tohi a Moseniolo Poncet ne'e ko he tagata ne'e to'a i tana temi 'eva (1950).

E toe mahino mai te 'u fakamatala a te kau mātu'a, ne'e ko he tagata ne'e fili ke hau i te 1959 kae ne'e fakafisi ki te tu'ulaga o ina tuku ke hau ia Lavelua Tomasi o 'io ki te 'u tālaga ne'e fai mo Pulufegu.

'Uhi ko te felogo'i mo te fe'apa'apa'aki a te kau taki o Mu'a, Hahake mo Hihifo i te temi aia, ne'e feala ai te fakatu'u o te telituale pea mo te tokalelei o te fenua lolotoga ta'u e 40.

Ne'e maliu Faipule HALAGAHU i te 'aho 23 o Novepeli 1994. Ne'e fetogi i te tu'ulaga e Paulo TA'OFIFENUA i te 'aho 1 o Tesepeli 1994.