Wp/wls/Aloi Pilioko

• 
  Aloi Pilioko (1935-2020)
• 
• 
• 
• 
• 
• 

Kamata'aga

Ne'e tupu Aloi Pilioko i Eua, Alele (Hihifo, 'Uvea) i te ta'u 1935. Ne'e mavae i tona ta'u 21 ki Vila i te ta'u 1956 o kumi gaue ai pea hoko atu tana folau ki Niu Kaletonia o nofo ai.

I te ta'u 1959, ne'e felave'i i Niumea mo Nicolai Michoutouckine, ne'e ko he tagata fai pena lusia ne'e ina avahi tana fale fakahāhā pena i te loto kolo. Ne'e kamata ai leva te fai pena a Aloi o fakalotomalohi'i e Nicolai ke kataki i tana fa'ahiga fai pena ae ko te fio o te 'u me'a pena fakapapalagi mo te fa'ahiga gaue fakatufuga o te Pasifika.

Ne'e gaue mo 'ako'i e Aloi te fa'ahiga tekenike gaue o te 'u tufuga melanesia mo polinesia o ina pena ai te ma'uli o te haha'i o te Pasifika.

Ne'e fakapale Aloi Pilioko aki he metai 'aulo e te Fale'ako ma'oluga o te Pasifika Saute i Suva i te ta'u 1978.

Gaue

Ne'e ma'uli Aloi mo Nicolaï i Niumea, Futuna mo Vila pea ne'e fe'olo'aki o fakahāhā ana gaue fai pena i te 'atu fenua o mālamanei mai Fisi, Toga, Tahisi, Niukini, 'Ositalalia, Niusila, Tailani, Malesia, Sikapole, Itonesia, Saponia, Maloko, Falani, Polotukale, Suisi, Suete o kaku ki Lusia.

Ne'e fakatu'u tana kautahi faiva o fakahigoa ko te ''Michoutouchkine-Pilioko Foundation'' i Vila i te ta'u 1978.

I te ta'u 2006, ne'e foaki fakatemi e Aloi mo Nicolaï ana pena mo me'a gaue e 400 ki te fale taupau koloa o te Museum Pasifika i Bali, Itonesia.

Mavae

Ne'e mate ia Nicolaï Michoutouchkine i Niumea i te 'aho 2 o Maio 2010 i tona ta'u 80.

Ne'e muli ki ai Aloi Pilioko i Vila i te 'aho 26 o Oketopeli 2020 i tona ta'u 85.

Matapuna

• DailyPost: Late Aloi Pilioko, the Picasso of the Pacific, 28 o Oketopeli 2020
• Pāsina Vikipetia a Nicolai Michoutouchkine
• Journal de la Société des Océanistes: In memoriam Aloi Pilioko (1935-2020), 2020
• Nouvelle-Calédonie la 1ère: Disparition d'Aloi Pilioko, peintre prolifique du Pacifique, 27 o Oketopeli 2020