Wp/tdd/ᥓᥝᥲ ᥘᥣᥒᥰ ᥟᥤᥱ ᥑᥛᥰ ᥘᥦᥒ
ᥘᥣᥒᥰ ᥟᥤᥱ ᥑᥛᥰ ᥘᥦᥒ AD. (1295-1311)[edit | edit source]
ᥛᥫᥒᥰ ᥛᥣᥝᥰ ᥘᥨᥒᥴ[edit | edit source]
ᥛᥫ ᥙᥤ 1177 ᥘᥢᥳ ᥟᥧᥲ ᥓᥝᥲ ᥛᥩᥢᥰ ᥘᥣᥳ “ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ” ᥘᥩᥢᥰ ᥚᥥᥰ။ ᥟᥛᥱ ᥛᥤᥰ ᥚᥬᥴ ᥙᥧᥖ ᥞᥣᥒᥲ ᥞᥨᥝᥴ ᥛᥫᥒᥰ ᥛᥣᥝᥰ ᥘᥨᥒᥴ ᥕᥝᥳ ᥘᥦᥲ ᥚᥩᥒᥰ ᥛᥫᥒᥰ ᥐᥣᥱ ᥕᥩᥢᥰ ᥖᥤ ᥓᥝᥲ ᥘᥨᥒᥴ ᥔᥦᥢᥴ ᥓᥥ “ᥑᥧᥢᥴ ᥖᥣᥭᥱ ᥙᥧᥒᥱ ”ᥕᥧᥱ ᥕᥝᥳ။
ᥑᥧᥢᥴ ᥖᥣᥭᥱ ᥙᥧᥒᥱ ᥛᥤᥰ ᥘᥧᥐ ᥓᥣᥭᥰ “ᥚᥫᥴ ᥓᥒᥱ ᥑᥒᥱ၊ ᥑᥧᥢᥴ ᥖᥣᥭᥱ ᥘᥨᥒᥴ၊ ᥑᥧᥢᥴ ᥚᥣᥒᥱ ᥑᥛᥰ ” ᥘᥭᥴ ᥔᥣᥛᥴ ᥐᥨᥝᥳ ᥘᥦᥲ ᥞᥬᥲ “ᥑᥧᥢᥴ ᥚᥣᥒᥱ ᥑᥛᥰ ” ᥛᥫᥰ ᥚᥩᥒᥰ ᥒᥛᥰ ᥛᥫᥒᥰ ᥛᥣᥝᥰ ᥘᥨᥒᥴ ᥔᥥᥴ ᥛᥫᥰ ᥙᥧᥖ ᥘᥒ ᥞᥨᥝᥴ ᥖᥤ “ᥝᥥᥒᥰ ᥛᥨᥢᥰ ” ᥕᥝᥳ။ ᥙᥤ 1178 ᥑᥣᥭᥳ ᥙᥨᥐᥱ ᥖᥒᥲ ᥞᥣᥒᥲ ᥞᥨᥝᥴ “ᥝᥥᥒᥰ ᥝᥣᥭᥴ ”။ ᥖᥤ ᥞᥤᥛᥰ ᥑᥨᥝᥴ ᥘᥨᥒᥴ “ᥑᥣᥒᥴ ᥚᥫᥴ ”ᥕᥧᥱ ᥕᥝᥳ။
ᥙᥤ 1189 ᥛᥣᥰ ᥔᥫᥴ ᥘᥨᥒᥴ ᥟᥢ ᥕᥣᥝᥰ ᥔᥤᥙᥴ ᥔᥩᥒᥴ ᥔᥩᥐᥱ ᥖᥨᥝ ᥘᥫᥒ ᥑᥨᥙᥱ ᥘᥧᥐ ᥕᥤᥒᥰ ᥑᥧᥢᥴ ᥛᥫᥒᥰ ᥘᥣᥢᥳ ᥓᥝᥲ ᥕᥝᥳ ᥙᥣᥭ ᥘᥨᥒᥰ ᥘᥬᥰ ᥛᥫᥒᥰ ᥔᥦᥢᥴ ᥓᥥ ᥘᥭᥴ ᥘᥦᥲ ᥑᥧᥢᥴ ᥛᥫᥒᥰ ᥘᥣᥢᥳ ᥓᥝᥲ ᥞᥬᥲ ᥓᥩᥭ ᥖᥤ ᥕᥩᥙᥱ ᥔᥨᥒᥱ ᥙᥢ။ ᥐᥨᥢᥰ ᥛᥫᥒᥰ ᥖᥤ ᥕᥩᥙᥱ ᥘᥭᥲ ᥕᥝᥳ ᥓᥝᥲ ᥘᥨᥒᥴ ᥔᥦᥢᥴ ᥓᥥ ᥙᥢ ᥑᥧᥢᥴ ᥚᥣᥒᥱ ᥑᥛᥰ ᥛᥫᥰ ᥔᥨᥒᥱ ᥗᥪᥒᥴ ᥘᥣᥢᥳ ᥓᥝᥲ ᥕᥝᥳ။
ᥓᥝᥲ ᥞᥨᥝᥴ ᥔᥦᥒᥴ ᥘᥣᥢᥳ ᥓᥝᥲ ᥒᥤᥢᥰ ᥞᥨᥛᥴ ᥓᥨᥛᥰ ᥘᥦᥢᥱ ᥘᥦᥲ ᥚᥣᥐᥱ ᥖᥩᥢᥲ ᥑᥨᥝᥰ ᥑᥩᥒᥴ ᥘᥦᥲ ᥓᥧᥛᥲ ᥑᥛᥰ ᥟᥢ ᥘᥐᥴ ᥘᥫᥒ ᥙᥢᥰ (80 ᥓᥣᥙ ) ᥘᥧᥐ ᥘᥫᥒ ᥔᥥᥴ ᥘᥣᥭ ᥓᥪ ᥛᥬᥱ ᥔᥬᥱ ᥓᥪ ᥘᥤ ᥙᥢ ᥑᥧᥢᥴ ᥚᥣᥒᥱ ᥑᥛᥰ ᥝᥣ “ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ” ᥘᥭᥴ ᥕᥝᥳ။
ᥙᥤ 1189 ᥘᥢᥳ “ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ” ᥘᥧᥐᥳ ᥝᥥᥒᥰ ᥝᥣᥭᥴ ᥑᥣᥭᥳ ᥖᥒᥲ ᥝᥥᥒᥰ ᥛᥬᥱ ᥖᥤ ᥗᥧᥒᥳ ᥛᥫᥒᥰ ᥛᥣᥝᥰ ᥞᥤᥛᥰ “ᥘᥛᥳ ᥙᥨᥝᥲ ” ᥚᥣᥭᥱ ᥓᥣᥢᥰ “ᥙᥣᥒᥱ ᥑᥛᥰ ” ᥘᥢᥳ ᥕᥝᥳ။ ᥛᥫᥒᥰ ᥛᥣᥝᥰ၊ ᥛᥫᥒᥰ ᥝᥢᥰ၊ ᥛᥫᥒᥰ ᥘᥣᥲ၊ ᥓᥣᥢᥰ ᥖᥣ၊ ᥛᥫᥒᥰ ᥖᥤᥰ၊ ᥛᥫᥒᥰ ᥞᥪᥛᥰ၊ ᥛᥫᥒᥰ ᥑᥣᥢᥴ၊ ᥛᥫᥒᥰ ᥑᥫᥰ၊ ᥛᥫᥒᥰ ᥕᥣᥒᥰ၊ ᥛᥫᥒᥰ ᥑᥣᥴ၊ ᥖᥣ ᥕᥣᥳ ᥓᥫᥰ ᥘᥢᥳ ᥖᥒᥰ ᥔᥥᥒᥲ ᥙᥥᥢ ᥛᥫᥒᥰ ᥖᥬᥲ ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ᥚᥩᥒᥰ ᥒᥛᥰ ᥕᥝᥳ။
ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ᥘᥦᥲ ᥘᥧᥐ ᥘᥣᥒᥰ ᥘᥣᥒᥰ ᥛᥥᥰ[edit | edit source]
“ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ” ᥛᥤᥰ ᥘᥧᥐ ᥕᥤᥒᥰ ᥔᥤᥱ ᥘᥣᥒᥰ။ ᥖᥨᥝᥱ ᥗᥪᥒᥴ ᥟᥣᥱ ᥕᥧᥳ ᥕᥬᥱ ᥐᥥᥱ ᥕᥝᥳ ᥐᥩᥲ ᥟᥛᥱ ᥛᥤᥰ ᥘᥧᥐ ᥓᥣᥭᥰ ᥟᥢ ᥖᥥᥴ ᥙᥧᥖ ᥞᥣᥒᥲ ᥞᥨᥝᥴ ᥘᥦᥲ ᥚᥩᥒᥰ ᥛᥫᥒᥰ ᥖᥒᥰ ᥘᥣᥭᥴ ᥟᥩᥢ ᥐᥢ ᥘᥐᥴ ᥓᥬ ᥝᥭᥳ ᥕᥧᥱ။ ᥘᥧᥐ ᥕᥤᥒᥰ ᥘᥢᥳ ᥓᥪᥒ
1. ᥘᥣᥒᥰ ᥕᥥᥲ ᥑᥛᥰ ᥘᥨᥒᥱ (ᥐᥫᥖᥱ 1266 ᥛᥫᥰ ᥑᥪᥢᥲ ᥙᥬᥳ ᥛᥫᥒᥰ ᥘᥩᥒᥴ ᥔᥥᥴ)။
2. ᥘᥣᥒᥰ ᥟᥤᥱ ᥑᥛᥰ ᥘᥦᥒ (ᥐᥫᥖᥱ 1270 ᥟᥛᥱ ᥖᥥᥱ ᥘᥣᥲ ᥞᥫᥢᥰ။ ᥕᥧᥱ ᥓᥩᥭ ᥐᥣᥢ ᥟᥧᥲ )။
3. ᥘᥣᥒᥰ ᥟᥣᥛ ᥟᥨᥝᥰ (ᥐᥫᥖᥱ 1273 ᥛᥫᥰ ᥑᥪᥢᥲ ᥙᥬᥳ ᥛᥫᥒᥰ ᥐᥩᥒ )။
4. ᥘᥣᥒᥰ ᥔᥦᥒᥴ ᥟᥭᥱ (ᥐᥫᥖᥱ 1276 ᥛᥫᥰ ᥑᥪᥢᥲ ᥙᥬᥳ ᥐᥥᥒᥰ ᥞᥧᥒᥳ )။
ᥛᥫᥒᥰ ᥛᥣᥝᥰ ᥘᥨᥒᥴ ᥕᥣᥛᥲ ᥑᥣᥖᥱ ᥑᥧᥢᥴ ᥛᥣᥰ ᥘᥦᥲ ᥟᥛᥱ ᥛᥤᥰ ᥘᥧᥐ ᥓᥣᥭᥰ ᥘᥢᥳ ᥙᥥᥢ ᥘᥩᥒ ᥘᥐᥴ ᥓᥬ ᥝᥭᥳ ᥖᥥᥳ ᥖᥥᥳ။ “ᥘᥣᥒᥰ ᥟᥤᥱ ᥑᥛᥰ ᥘᥦᥒ ” ᥟᥢ ᥙᥬᥳ ᥓᥩᥭ ᥐᥣᥢ ᥟᥧᥲ ᥕᥧᥱ ᥘᥢᥳ ᥐᥩᥲ ᥐᥨᥝ ᥔᥣᥭᥴ ᥔᥪᥙᥱ ᥑᥧᥢᥴ ᥛᥫᥒᥰ ᥛᥣᥝᥰ ᥑᥣᥖᥱ ᥗᥦᥢᥲ။ ᥐᥨᥝ ᥘᥭᥲ ᥑᥣᥛᥱ ᥖᥣᥒᥱ ᥛᥣᥢᥲ ᥖᥣᥒᥱ ᥛᥫᥒᥰ ᥑᥝᥲ ᥓᥤᥛ ᥕᥣᥳ ᥐᥝᥰ ᥘᥦᥲ ᥘᥐᥴ ᥓᥬ ᥝᥭᥳ ᥕᥧᥱ ᥖᥥᥳ ᥖᥥᥳ။
ᥘᥣᥒᥰ ᥟᥤᥱ ᥑᥛᥰ ᥘᥦᥒ ᥘᥢᥳ “ᥘᥣᥒᥰ ᥟᥤᥱ ” ᥘᥭᥴ ᥐᥩᥰ ᥞᥩᥒᥳ ᥕᥝᥳ။ ᥛᥧᥒ ᥛᥩᥒᥰ ᥛᥤᥰ ᥘᥩᥒᥳ ᥓᥣᥭᥰ ᥙᥧᥖ ᥖᥦᥢᥰ ᥓᥝᥲ ᥟᥧᥲ ᥟᥧᥙᥳ ᥙᥫᥒᥱ ᥛᥫᥒᥰ ᥛᥣᥝᥰ ᥘᥦᥲ ᥙᥤ 1287 ᥘᥣᥒᥰ ᥟᥤᥱ ᥞᥬᥲ ᥓᥝᥲ ᥟᥧᥲ ᥐᥨᥙ ᥐᥧ ᥐᥪᥐᥱ ᥟᥨᥭᥰ ᥐᥨᥝᥳ ᥛᥢᥰ “ᥘᥣᥒᥰ ᥟᥩᥢᥱ ” ᥗᥦᥒᥲ။ ᥘᥣᥒᥰ ᥟᥩᥢᥱ ᥘᥢᥳ “ᥘᥣᥒᥰ ᥝᥣᥒ ᥓᥥ ” ᥘᥭᥴ ᥐᥩᥲ ᥞᥩᥒᥳ ᥕᥝᥳ။
ᥙᥤ 1288 ᥑᥧᥢᥴ ᥙᥧᥳ ᥐᥛᥱ “ᥓᥨᥝᥱ ᥓᥣᥱ ” ᥟᥝ ᥘᥩᥒᥳ ᥕᥤᥒᥰ ᥛᥢᥰ “ᥘᥣᥒᥰ ᥓᥤᥒᥱ ” ᥔᥣᥐ ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ᥗᥦᥢᥲ။ ᥘᥣᥒᥰ ᥜᥣᥳ ᥓᥤᥒᥱ ᥞᥩᥖ ᥛᥫᥒᥰ ᥛᥣᥝᥰ ᥘᥭᥲ ᥞᥨᥐᥱ ᥘᥫᥢ ᥐᥫᥖᥱ ᥘᥥᥒᥳ ᥘᥧᥐ ᥓᥣᥭᥰ။ ᥔᥬᥱ ᥓᥪ ᥝᥣ “ᥓᥝᥲ ᥙᥧᥳ ᥑᥛᥰ ”။ ᥘᥣᥒᥰ ᥜᥣᥳ ᥓᥤᥒᥱ ᥕᥫᥒᥰ ᥟᥣᥢᥰ ᥟᥝ ᥘᥧᥐ ᥛᥢᥰ ᥙᥥᥢ ᥐᥦᥛ ᥛᥫᥒᥰ ᥛᥫᥒᥰ ᥛᥣᥝᥰ ᥘᥨᥒᥴ ᥕᥧᥱ ᥕᥝᥳ။
ᥙᥤ 1289 “ᥘᥣᥒᥰ ᥟᥩᥢᥱ ” ᥓᥙᥱ ᥔᥢᥱ ᥗᥥᥱ ᥛᥣᥰ ᥘᥦᥳ ᥘᥣᥒᥰ ᥜᥣᥳ ᥓᥤᥒᥱ ᥚᥤᥖᥴ ᥓᥬ ᥘᥨᥒᥴ ᥘᥣᥒᥴ ᥔᥥᥴ ᥑᥪᥒᥴ ᥞᥣᥴ ᥘᥣᥭᥰ ᥕᥣᥳ ᥐᥝᥰ ᥞᥥᥖᥱ ᥞᥬᥲ ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ᥞᥢᥴ ᥚᥤᥖᥱ ᥘᥣᥒᥰ ᥟᥩᥢᥱ ᥕᥧᥱ ᥕᥝᥳ။ ᥘᥣᥒᥰ ᥜᥣᥳ ᥓᥤᥒᥱ ᥓᥬᥳ ᥘᥧᥛᥰ ᥘᥣᥒᥰ ᥛᥢᥰ ᥟᥢ ᥘᥧᥐᥳ ᥙᥧᥳ ᥐᥛᥱ ᥛᥣᥰ ᥓᥩᥛᥰ ᥘᥢᥳ ᥚᥦᥢᥴ ᥞᥥᥖᥱ ᥞᥬᥲ ᥙᥫᥢ ᥞᥢᥴ ᥚᥤᥖᥱ ᥘᥣᥒᥰ ᥟᥩᥢᥱ ᥕᥧᥱ ᥕᥝᥳ။ ᥛᥫ ᥚᥬᥴ ᥟᥛᥱ ᥞᥢᥴ ᥙᥩᥭᥱ ᥞᥬᥲ ᥐᥨᥢᥰ ᥓᥣᥭᥰ ᥛᥫᥰ ᥙᥦᥙᥳ ᥔᥩᥢᥲ ᥝᥭᥳ ᥘᥬᥰ ᥛᥪᥖᥴ။ ᥛᥫ ᥔᥥᥴ ᥐᥨᥝᥳ ᥐᥨᥝᥳ ᥘᥦᥙ ᥖᥥᥴ ᥞᥢᥴ ᥔᥛᥳ ᥖᥒᥲ ᥓᥬ ᥞᥥᥖᥱ ᥘᥒᥱ ᥘᥧᥐᥳ ᥘᥬᥰ ᥘᥧᥐ ᥘᥣᥒᥰ ᥟᥩᥢᥱ ᥟᥩᥐᥱ ᥛᥣᥰ ᥔᥥᥴ ᥘᥦᥢᥲ ᥘᥨᥒᥰ ᥞᥨᥝᥴ ᥞᥣᥭᥴ ᥘᥣᥭ ᥐᥣᥱ။ ᥐᥭᥳ ᥐᥭᥳ ᥞᥥᥖᥱ ᥘᥢᥴ ᥕᥧᥱ ᥘᥦᥳ ᥟᥛᥱ ᥞᥪᥒᥴ ᥟᥛᥱ ᥘᥣᥢᥰ ᥑᥣᥝᥱ ᥝᥩᥒᥰ ᥝᥦᥒᥰ ᥟᥩᥐᥱ ᥛᥣᥰ ᥝᥣ “ᥘᥣᥒᥰ ᥟᥩᥢᥱ ᥘᥐ ᥟᥥᥢᥲ ᥓᥧᥳ ᥐᥦᥛ ᥚᥨᥝᥴ ” ᥘᥭᥴ ᥕᥝᥳ။
ᥘᥒᥱ ᥞᥪᥴ ᥖᥥᥴ ᥘᥪᥰ ᥗᥦᥢᥲ ᥘᥣᥒᥰ ᥜᥣᥳ ᥓᥤᥒᥱ ᥙᥩᥭᥱ ᥑᥣᥝᥱ ᥝᥣ “ᥐᥨᥢᥰ ᥓᥣᥭᥰ ᥐᥨᥝᥳ ᥘᥫᥒ ... ᥘᥧᥐ ᥘᥬᥰ ᥘᥧᥐᥴ ᥘᥣᥒᥰ ᥟᥩᥢᥱ ... ᥘᥦᥢᥲ ᥑᥪᥢᥲ ᥓᥩᥛ ᥞᥨᥝᥴ ᥔᥥᥴ ... ᥟᥩᥐᥱ ᥙᥣᥭ ᥐᥣᥱ ᥐᥧ ᥑᥪᥢᥰ ...” ᥘᥭᥴ ᥗᥦᥢᥲ ᥕᥝᥳ။ ᥟᥛᥱ ᥞᥪᥒᥴ ᥟᥛᥱ ᥘᥣᥢᥰ ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ᥘᥭᥲ ᥑᥣᥝᥱ ᥘᥢᥳ ᥔᥥᥴ ᥙᥩᥭᥱ ᥐᥨᥢᥰ ᥘᥩᥛᥴ ᥒᥩᥭᥰ ᥐᥩᥰ ᥘᥭᥲ ᥑᥣᥝᥱ ᥘᥒᥱ ᥕᥣᥛᥲ ᥒᥤᥢᥰ ᥘᥢᥳ ᥗᥦᥒᥢᥲ ᥐᥩᥭᥰ။
ᥑᥪᥢᥰ ᥘᥢᥳ ᥖᥨᥝ ᥛᥢᥰ ᥓᥝᥲ ᥟᥩᥐᥱ ᥖᥨᥭᥰ ᥞᥣᥒᥰ ᥐᥩᥭᥰ။ ᥘᥣᥒᥰ ᥜᥣᥳ ᥓᥤᥒᥱ ᥚᥦᥢᥴ ᥝᥭᥳ ᥕᥝᥳ ᥘᥦᥲ ᥞᥢᥴ ᥐᥨᥢᥰ ᥓᥣᥭᥰ ᥐᥨᥝᥳ ᥘᥫᥒ ᥟᥩᥐᥱ ᥛᥣᥰ ᥘᥬᥰ ᥛᥪᥖᥴ ᥕᥝᥳ ᥓᥩᥐᥱ ᥑᥪᥢᥲ ᥓᥩᥛᥴ ᥞᥨᥝᥴ ᥘᥣᥒᥰ ᥟᥩᥢᥱ ᥔᥥᥴ ᥙᥣᥭ ᥐᥣᥱ ᥕᥧᥱ ᥕᥝᥳ။ ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ᥓᥬ ᥘᥛ ᥘᥦᥢᥱ ᥘᥦᥲ ᥘᥛᥰ ᥘᥨᥭᥰ ᥘᥣᥒᥰ ᥟᥩᥢᥱ ᥟᥩᥐᥱ ᥞᥣᥒᥲ ᥞᥨᥝᥴ ᥐᥣᥱ ᥐᥛᥰ ᥘᥥᥝ။
ᥔᥣᥒᥳ ᥑᥨᥝᥲ ᥙᥨᥒ ᥘᥐᥴ ᥙᥣᥰ ᥝᥣ “ᥚᥬᥴ ᥐᥨᥝᥳ ᥘᥬ ᥔᥥᥴ ᥛᥝᥱ ᥝᥣ ... ᥖᥥᥴ ᥟᥛᥱ ᥘᥭᥲ ᥓᥩᥭ ᥘᥣᥒᥰ ᥟᥩᥢᥱ ... ᥖᥥᥱ ᥓᥥᥛ ᥑᥝᥲ ᥘᥛᥳ ᥖᥣᥒᥰ ᥐᥤᥢ ... ᥖᥤ ᥕᥧᥱ ᥖᥢᥰ ᥔᥝᥰ ... ᥖᥤ ᥘᥒ ᥖᥤ ᥘᥩᥢᥰ ᥘᥢᥳ ... ᥖᥐᥴ ᥖᥥᥴ ᥟᥛᥱ ᥘᥭᥲ ᥕᥪᥢ ᥙᥢ ᥘᥣᥰ ᥘᥣᥰ ... ᥚᥬᥴ ᥘᥫᥴ ᥑᥨᥝᥲ ᥙᥨᥒ ᥘᥭᥳ ᥐᥩᥲ ... ᥘᥣᥙᥱ ᥕᥧᥱ ᥘᥫᥴ ᥑᥨᥝᥰ ᥕᥧᥱ ᥖᥬᥲ ...” ᥘᥭᥴ ᥕᥝᥳ။
ᥘᥣᥒᥰ ᥟᥤᥱ ᥔᥩᥢᥱ ᥙᥥᥢ ᥟᥫᥭᥰ ᥐᥨᥝᥳ။ ᥙᥥᥢ ᥘᥣᥒᥰ ᥘᥨᥒᥴ ᥛᥫᥒᥰ ᥛᥣᥝᥰ။ ᥙᥥᥢ ᥛᥥ ᥘᥩᥒᥳ။ ᥙᥥᥢ ᥘᥣᥒᥰ ᥕᥤᥒᥰ ᥛᥫᥢᥴ ᥐᥢ။ ᥓᥙᥴ ᥔᥢᥱ ᥗᥥᥱ ᥔᥥᥴ ᥘᥨᥒᥰ ᥞᥣᥒᥲ ᥞᥨᥝᥴ ᥐᥣᥱ။ ᥒᥤᥢᥰ ᥟᥤᥴ ᥘᥧᥴ ᥘᥦᥢᥱ ᥘᥦᥲ ᥕᥩᥢᥰ ᥛᥦᥖᥳ ᥖᥣᥱ ᥟᥥᥰ ᥘᥧᥴ ᥙᥢ ᥐᥩᥲ ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ᥟᥛᥱ ᥚᥩᥛᥳ ᥘᥣᥰ ᥘᥣᥰ။ ᥛᥢᥰ ᥘᥣᥒᥰ ᥓᥒᥱ ᥝᥨᥢᥳ ᥞᥣᥴ ᥘᥩᥐᥴ ᥘᥣᥭᥰ ᥖᥣᥱ ᥖᥥᥴ ᥓᥩᥭ ᥗᥦᥛ ᥕᥧᥱ ᥕᥝᥳ။
ᥘᥨᥝᥱ ᥔᥦᥒᥴ ᥛᥫᥒᥰ ᥛᥣᥝᥰ ᥘᥨᥒᥴ[edit | edit source]
ᥘᥣᥒᥰ ᥟᥩᥢᥱ ᥐᥩᥲ ᥟᥛᥱ ᥘᥫᥴ ᥘᥭᥲ ᥑᥨᥝᥲ ᥙᥨᥒ ᥘᥐᥴ ᥘᥦᥲ ᥙᥣᥰ ᥔᥢᥱ ᥗᥥᥱ ᥔᥥᥴ ᥘᥨᥒᥰ ᥞᥣᥒᥲ ᥞᥨᥝᥴ ᥐᥣᥱ။ ᥑᥣᥛᥰ ᥙᥨᥒ ᥘᥐᥴ ᥑᥧᥢᥴ ᥘᥭᥴ ᥘᥢᥳ ᥐᥨᥢᥰ ᥖᥒᥰ ᥛᥫᥒᥰ ᥟᥛᥱ ᥞᥖᥱ ᥙᥨᥢᥳ ᥙᥦᥢ ᥘᥣᥰ ᥘᥣᥰ။ “ᥐᥨᥢᥰ ᥟᥛᥱ ᥞᥢᥴ ᥐᥩᥲ ... ᥜᥤᥴ ᥞᥢᥴ ... ᥘᥐᥳ ᥙᥨᥢᥳ ᥙᥦᥢ ᥑᥨᥝᥲ ᥔᥣᥒᥳ ᥑᥧᥢᥴ ... ᥓᥣᥒ ᥖᥧᥐ ᥑᥣᥳ” ᥘᥭᥴ ᥘᥦᥲ ᥚᥬᥴ ᥐᥩᥲ ᥟᥛᥱ ᥞᥖᥴ ᥖᥐᥳ ᥞᥖᥴ ᥘᥣᥖ ᥖᥨᥝᥱ။ ᥙᥫᥒ ᥘᥫᥒ ᥐᥩᥲ ᥐᥨᥝ ᥘᥭᥲ ᥕᥣᥰ ᥖᥣᥛᥱ ᥘᥐᥴ ᥘᥦᥲ ᥟᥥᥰ ᥘᥧᥴ ᥕᥧᥱ ᥐᥩᥲ ᥟᥛᥱ ᥞᥖᥴ ᥓᥩᥭ ᥗᥦᥛᥴ ᥘᥣᥒᥰ ᥟᥩᥢᥱ။
ᥘᥣᥒᥰ ᥟᥩᥢᥱ ᥕᥩᥢᥰ ᥙᥫᥒ ᥞᥨᥛ ᥘᥬ ᥚᥬᥴ ᥟᥛᥱ ᥞᥙᥳ။ ᥕᥩᥢᥰ ᥓᥤᥢ ᥖᥤ ᥗᥬᥴ ᥚᥬᥴ ᥟᥛᥱ ᥘᥥᥒᥳ။ ᥕᥩᥢᥰ ᥘᥒ ᥘᥘᥫᥴ ᥐᥩᥭᥰ ᥚᥬᥴ ᥟᥛᥱ ᥚᥩᥛᥳ။ ᥟᥛᥱ ᥓᥣᥒ ᥙᥫᥒ ᥚᥬᥴ ᥘᥦᥲ ᥙᥣᥭ ᥟᥩᥐᥱ ᥝᥥᥒᥰ ᥐᥣᥱ။ ᥛᥣᥒ ᥝᥢᥰ ᥘᥭᥲ ᥐᥤᥢ။ ᥛᥣᥒ ᥝᥢᥰ ᥟᥪᥙᥴ။ ᥛᥣᥒ ᥑᥪᥢᥰ ᥘᥩᥢᥰ ᥘᥬᥰ ᥕᥧᥛᥰ။ ᥛᥣᥒ ᥑᥪᥢᥰ ᥘᥩᥢᥰ ᥘᥫᥴ ᥘᥤᥢ။ ᥛᥣᥒ ᥑᥪᥢᥰ ᥟᥛᥱ ᥘᥭᥲ ᥘᥩᥢᥰ။ ᥑᥛ ᥖᥤ ᥘᥬ ᥘᥩᥢᥰ ᥖᥤ ᥢᥢᥳ။ ᥕᥣᥰ ᥖᥣᥛᥱ ᥑᥧᥢᥴ ᥔᥥᥴ ᥔᥪᥙᥱ ᥔᥣᥭᥴ ᥓᥬ ᥖᥨᥝ ᥐᥝᥱ ᥘᥦᥲ ᥘᥧᥐ ᥛᥤᥰ ᥘᥬᥰ ᥖᥩᥒᥳ ᥕᥧᥱ ᥘᥢᥳ ᥘᥣᥒᥰ ᥟᥩᥢᥱ ᥖᥧᥐᥳ ᥑᥣᥳ ᥑᥣᥢᥴ ᥓᥬ ᥖᥥᥳ ᥖᥥᥳ။
ᥘᥣᥒᥰ ᥟᥤᥱ ᥘᥫᥐ ᥟᥝ ᥐᥨᥢᥰ ᥛᥢᥰ ᥘᥣᥒᥰ ᥟᥢ ᥛᥤᥰ ᥘᥩᥒ ᥟᥛᥱ ᥘᥙᥳ ᥘᥭᥲ ᥘᥦᥲ ᥘᥭᥲ ᥖᥛᥰ ᥓᥬ ᥘᥢᥳ ᥓᥩᥛᥰ ᥑᥭᥲ ᥓᥩᥛᥰ ᥔᥩᥐ ᥑᥣᥴ ᥘᥣᥒᥰ ᥟᥩᥢᥱ။ ᥞᥣᥴ ᥙᥢ ᥖᥤ ᥛᥨᥐᥴ ᥔᥨᥝᥳ ᥕᥧᥱ ᥔᥝᥰ။ ᥔᥨᥒᥱ ᥘᥥᥒᥳ ᥑᥝᥲ ᥘᥛᥳ ᥖᥣᥒᥰ ᥐᥤᥢ။ ᥘᥣᥒᥰ ᥟᥩᥢᥱ ᥓᥒᥱ ᥟᥛᥱ ᥟᥪᥙᥴ ᥟᥛᥱ ᥕᥣᥐ ᥔᥥᥴ ᥘᥭᥲ ᥛᥨᥐᥴ ᥔᥨᥝᥳ ᥝᥭᥳ ᥕᥧᥱ ᥖᥤ ᥛᥣᥢᥲ “ᥘᥛᥳ ᥐᥭᥱ ᥛᥨᥝᥱ ” ᥞᥤᥛᥰ ᥖᥤᥢ ᥘᥩᥭ ᥘᥣᥝᥰ။ ᥕᥣᥛᥰ ᥘᥥᥝ ᥛᥤᥰ ᥓᥥᥒᥱ ᥓᥣᥢᥰ ᥝᥢᥰ ᥖᥨᥐᥱ ᥛᥧᥱ ᥓᥥ။ ᥚᥣᥭᥱ ᥟᥩᥐᥱ ᥐᥧᥒᥰ ᥔᥣᥱ၊ ᥓᥥ ᥞᥭᥰ ᥘᥢᥳ ᥕᥝᥳ။
ᥘᥣᥒᥰ ᥟᥩᥢᥱ ᥛᥦᥙ ᥛᥨᥐᥱ ᥕᥧᥱ ᥔᥝᥰ ᥝᥭᥳ ᥞᥥᥖᥱ ᥘᥢᥴ ᥔᥥᥴ ᥙᥤ 1290 ᥘᥢᥳ ᥐᥫᥖᥱ ᥘᥥᥒᥳ ᥘᥧᥐ ᥚᥣᥴ ᥚᥥᥴ ᥔᥣᥛᥴ ᥐᥨᥝᥳ။ ᥙᥥᥢ ᥐᥨᥢᥰ ᥓᥣᥭᥰ ᥖᥒᥰ ᥛᥨᥖᥴ ᥘᥦᥲ ᥘᥣᥒᥰ ᥟᥤᥱ ᥖᥒᥲ ᥓᥪ ᥘᥩᥒᥳ ᥝᥣ “ᥑᥧᥢᥴ ᥟᥣᥭᥲ ᥒᥛᥰ ᥛᥫᥒᥰ၊ ᥑᥧᥢᥴ ᥕᥤ ᥑᥣᥒᥴ ᥑᥛᥰ၊ ᥑᥧᥢᥴ ᥔᥣᥛᥴ ᥘᥨᥒᥴ ” ᥘᥭᥴ ᥕᥝᥳ။ ᥘᥪᥢᥰ ᥛᥣᥰ ᥑᥧᥢᥴ ᥔᥣᥛᥴ ᥘᥨᥒᥴ ᥘᥢᥳ ᥑᥧᥢᥴ ᥔᥣᥛᥴ ᥐᥩᥢᥰ ᥒᥪᥢᥰ (ᥟ) ᥔᥣᥛᥴ ᥘᥨᥒᥴ ᥜᥣᥳ ᥘᥭᥴ ᥐᥩᥲ ᥞᥩᥒᥳ ᥕᥝᥳ။
ᥘᥣᥒᥰ ᥜᥣᥳ ᥓᥤᥒᥱ ᥘᥩᥛᥴ ᥟᥝ ᥑᥣᥝᥱ ᥘᥣᥒᥰ ᥟᥩᥢᥱ ᥕᥧᥱ ᥖᥣᥱ ᥔᥥᥱ ᥘᥦᥲ ᥞᥧᥳ ᥝᥣ ᥛᥤᥰ ᥐᥨᥢᥰ ᥘᥐᥳ ᥓᥩᥭ ᥖᥨᥭᥰ ᥗᥪᥒᥴ ᥘᥥᥒᥳ ᥘᥧᥴ ᥝᥭᥳ ᥔᥥᥴ ᥐᥫᥖᥱ ᥘᥧᥐ ᥓᥣᥭᥰ ᥛᥣᥰ ᥔᥣᥛᥴ ᥐᥨᥝᥳ ᥘᥭᥴ ᥔᥥᥴ ᥚᥤᥖᥴ ᥓᥬ ᥘᥨᥒᥴ ᥘᥣᥒᥴ ᥕᥝᥳ ᥙᥩᥭᥱ ᥐᥨᥢᥰ ᥓᥩᥛᥰ ᥙᥩᥒ ᥐᥨᥖᥳ ᥘᥣᥒᥰ ᥟᥩᥢᥱ ᥑᥝᥴ ᥛᥥ ᥘᥧᥐ ᥗᥦᥢᥲ ᥕᥧᥱ ᥕᥝᥳ။
ᥘᥣᥒᥰ ᥟᥤᥱ ᥖᥢᥰ ᥘᥭᥲ ᥑᥣᥝᥱ ᥘᥣᥒᥰ ᥜᥣᥳ ᥓᥤᥒᥱ ᥓᥩᥛᥰ ᥚᥦᥢᥴ ᥐᥨᥖᥳ ᥘᥢᥳ ᥔᥥᥴ ᥙᥩᥭᥱ ᥐᥨᥢᥰ ᥑᥤᥱ ᥛᥣᥳ ᥘᥖᥴ ᥖᥣᥒᥰ ᥐᥣᥱ ᥓᥩᥭ ᥐᥛᥰ ᥘᥥᥝ။ ᥐᥨᥢᥰ ᥘᥣᥒᥰ ᥟᥤᥱ ᥘᥦᥲ ᥐᥨᥢᥰ ᥘᥣᥒᥰ ᥜᥣᥳ ᥓᥤᥒᥱ ᥖᥪᥐᥴ ᥚᥢᥰ ᥐᥢ။ ᥐᥨᥢᥰ ᥘᥣᥒᥰ ᥟᥤᥱ ᥟᥝ ᥑᥝᥴ ᥛᥥ ᥘᥧᥐ ᥘᥩᥖ ᥚᥥᥰ ᥘᥭᥲ ᥔᥥᥴ ᥖᥣᥳ ᥐᥛᥳ ᥚᥩᥒ ᥘᥭᥲ ᥛᥣᥖᥱ ᥓᥥᥙᥱ။ ᥐᥛᥳ ᥚᥩᥒ ᥘᥭᥲ ᥖᥨᥐᥱ ᥔᥧᥛᥰ ᥐᥣᥱ ᥕᥧᥱ။
ᥙᥤ 1292 ᥟᥣᥱ ᥕᥧᥳ ᥘᥩᥒᥳ ᥘᥭᥲ (2)ᥑᥨᥙᥱ ᥔᥥᥴ ᥚᥩᥒᥰ ᥖᥪᥐᥳ ᥘᥣᥝᥴ ᥝᥭᥳ ᥕᥧᥱ ᥘᥢᥳ ᥘᥣᥒᥰ ᥜᥣᥳ ᥓᥤᥒᥱ ᥙᥩᥭᥱ ᥐᥨᥢᥰ ᥓᥩᥛᥰ ᥞᥥᥖᥱ ᥑᥥᥢᥴ ᥗᥦᥢᥲ။ ᥘᥣᥒᥰ ᥟᥤᥱ ᥙᥩᥭᥱ ᥐᥨᥢᥰ ᥓᥩᥛᥰ ᥓᥩᥭ ᥗᥦᥒᥲ။ ᥙᥩᥐ ᥘᥭᥳ ᥐᥩᥲ ᥘᥭᥲ ᥖᥪᥐᥱ ᥚᥢᥰ ᥐᥢ။ ᥐᥨᥢᥰ ᥘᥣᥒᥰ ᥟᥤᥱ ᥐᥛᥳ ᥚᥩᥒ ᥖᥨᥐᥱ ᥔᥧᥛᥰ ᥗᥦᥢᥲ။ ᥘᥣᥒᥰ ᥟᥩᥢᥱ ᥑᥝᥴ ᥛᥥ ᥘᥧᥐ ᥙᥨᥢᥳ ᥘᥩᥖ ᥑᥥᥢᥴ ᥘᥣᥒᥰ ᥜᥣᥳ ᥓᥤᥒᥱ ᥔᥥᥴ ᥖᥣᥳ ᥘᥭᥲ ᥙᥣᥭ ᥘᥤᥴ ᥚᥩᥒᥰ ᥘᥣᥝᥴ ᥑᥪᥢᥲ၊ ᥘᥭᥲ ᥖᥨᥐᥱ ᥓᥬ ᥐᥨᥝ ᥞᥦᥴ ᥘᥦᥲ ᥕᥨᥖᥱ ᥕᥣ ᥟᥛᥱ ᥘᥭᥲ ᥔᥥᥴ “ᥑᥧᥢᥴ ᥟᥣᥭᥲ ᥒᥛᥰ ᥛᥫᥒᥰ ” ᥘᥧᥳ ᥞᥣᥭᥴ ᥖᥣᥭ ᥐᥣᥱ ᥕᥧᥱ ᥕᥝᥳ။ ᥝᥣᥭᥰ ᥔᥥᥴ ᥙᥨᥢᥳ ᥘᥩᥖ ᥑᥥᥢᥴ ᥕᥝᥳ ᥘᥣᥒᥰ ᥟᥩᥢᥱ ᥑᥝᥴ ᥛᥥ ᥘᥧᥐ ᥑᥪᥢᥰ ᥛᥫᥰ ᥖᥥᥖᥱ ᥕᥧᥱ ᥝᥭᥳ ᥘᥬᥰ ᥗᥛᥲ ᥕᥧᥱ ᥕᥝᥳ။
ᥛᥫ ᥘᥢᥳ ᥛᥤᥰ ᥔᥫᥴ ᥚᥫᥐᥱ ᥙᥨᥝ ᥛᥥ ᥘᥧᥐ ᥛᥫᥰ ᥛᥨᥐᥱ ᥔᥨᥝᥳ ᥕᥧᥱ ᥓᥩᥛᥰ ᥗᥛᥲ ᥘᥢᥳ ᥗᥦᥒᥲ။ ᥟᥛᥱ ᥙᥢ ᥚᥥᥰ ᥑᥝᥴ ᥛᥥ ᥘᥧᥐ ᥐᥩᥭᥰ ᥛᥝᥱ ᥐᥣᥰ ᥐᥭᥳ ᥟᥥᥢᥲ ᥐᥨᥝᥳ ᥔᥩᥒᥴ ᥙᥤ ᥘᥩᥒᥳ ᥗᥦᥢᥲ ᥘᥦᥲ ᥙᥥᥢ ᥘᥩᥒ ᥘᥣᥐᥱ ᥘᥣᥭᥰ ᥘᥨᥒᥴ ᥖᥥᥳ ᥖᥥᥳ ᥘᥭᥴ ᥕᥝᥳ။ ᥛᥫ ᥟᥥᥢᥲ ᥐᥨᥝᥳ ᥔᥫᥴ ᥘᥢᥳ ᥕᥤ ᥑᥣᥒᥴ ᥑᥛᥰ ᥐᥭᥳ ᥘᥭᥲ ᥞᥩᥭᥰ ᥘᥥᥙ ᥔᥫᥴ ᥟᥩᥢᥱ ᥕᥣᥭᥰ ᥑᥣᥢᥱ ᥖᥫᥳ ᥛᥦᥢ ᥝᥭᥳ ᥖᥣᥱ ᥔᥥᥱ ᥘᥦᥲ ᥓᥙᥴ ᥓᥪ ᥝᥣ “ᥕᥤ ᥔᥫᥴ ᥑᥣᥢᥱ ” ᥘᥭᥴ ᥕᥝᥳ။ ᥖᥒᥲ ᥟᥝ ᥘᥢᥳ ᥛᥣᥰ ᥕᥤ ᥔᥫᥴ ᥑᥣᥢᥱ ᥐᥭᥳ ᥞᥣᥭᥴ ᥘᥣᥭᥴ ᥐᥣᥱ ᥟᥥᥢᥲ ᥐᥨᥝᥳ ᥔᥫᥴ ᥕᥧᥱ ᥖᥣᥱ ᥔᥥᥱ ᥘᥭᥴ ᥕᥝᥳ။
ᥙᥤ 1294 ᥘᥢᥳ ᥙᥤ ᥟᥣᥭᥲ ᥘᥣᥒᥰ ᥜᥣᥳ ᥓᥤᥒᥱ ᥑᥧᥢᥴ ᥙᥧᥳ ᥐᥛᥱ “ᥓᥨᥝᥱ ᥓᥣᥱ ” ᥙᥩᥭᥱ ᥔᥫᥐᥱ ᥑᥪᥢᥲ ᥖᥪᥐᥱ ᥛᥫᥒᥰ ᥖᥭᥰ ᥘᥦᥲ ᥑᥧᥢᥴ ᥕᥤ ᥐᥣᥭᥰ ᥑᥛᥰ ᥑᥤᥱ ᥔᥪᥐᥱ ᥛᥫᥒᥰ ᥛᥣᥝᥰ၊ ᥛᥫᥒᥰ ᥛᥤᥖ၊ ᥔᥦᥢᥲ ᥝᥤᥴ၊ ᥛᥫᥒᥰ ᥐᥩᥒ၊ ᥛᥫᥒᥰ ᥕᥣᥒᥰ ᥘᥨᥒᥰ ᥖᥪᥐᥱ ᥙᥧᥳ ᥐᥛᥱ ᥕᥧᥱ ᥕᥝᥳ။ ᥛᥫᥒᥰ ᥔᥧᥐᥳ ᥘᥦᥲ ᥘᥣᥒᥰ ᥜᥣᥳ ᥓᥤᥒᥱ ᥟᥛᥱ ᥞᥖᥴ ᥕᥧᥱ ᥛᥫᥒᥰ ᥛᥣᥝᥰ ᥔᥥᥴ ᥟᥩᥢ ᥘᥧᥐ ᥓᥣᥭᥰ ᥛᥢᥰ ᥛᥫᥰ ᥑᥪᥢᥰ ᥙᥧᥳ ᥐᥛᥱ။ ᥗᥪᥒᥴ ᥙᥧᥳ ᥐᥛᥱ ᥕᥝᥳ ᥟᥛᥱ ᥞᥪᥒᥴ ᥟᥛᥱ ᥘᥣᥢᥰ ᥓᥙᥴ ᥛᥭᥲ၊ ᥑᥭᥲ ᥘᥣᥝᥴ ᥕᥨᥖᥱ ᥕᥣ ᥟᥛᥱ ᥘᥭᥲ ᥘᥦᥲ ᥓᥝᥲ ᥙᥧᥳ ᥑᥛᥰ ᥖᥣᥭ ᥐᥣᥱ ᥕᥧᥱ ᥕᥝᥳ။ ᥟᥛᥱ ᥛᥤᥰ ᥘᥧᥐ ᥓᥣᥭᥰ ᥖᥥᥴ ᥟᥝ ᥑᥦᥳ ᥑᥥᥒᥱ ᥙᥥᥢ ᥑᥧᥢᥴ ᥛᥫᥒᥰ ᥛᥣᥝᥰ ᥘᥭᥲ ᥕᥝᥳ ᥔᥥᥴ ᥛᥫᥒᥰ ᥙᥧᥳ ᥐᥛᥱ ᥐᥩᥰ ᥔᥧᥐᥳ ᥕᥧᥒᥲ ᥘᥦᥢᥱ ᥘᥦᥳ ᥘᥣᥒᥰ ᥜᥣᥳ ᥓᥤᥒᥱ ᥙᥭᥱ ᥞᥖᥴ ᥛᥫᥰ ᥑᥪᥢᥰ ᥛᥫᥒᥰ ᥛᥣᥝᥰ။
ᥘᥣᥒᥰ ᥟᥤᥱ ᥑᥪᥢᥲ ᥟᥧᥙ ᥛᥫᥒᥰ[edit | edit source]
ᥙᥤ 1295 ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ᥘᥩᥢᥰ ᥚᥥᥰ ᥕᥝᥳ။ ᥛᥫᥒᥰ ᥛᥣᥝᥰ ᥘᥨᥒᥴ ᥟᥛᥱ ᥛᥤᥰ ᥐᥨᥝᥳ ᥖᥥᥴ ᥙᥧᥖ ᥞᥣᥒᥲ ᥞᥨᥝᥴ ᥖᥥᥳ ᥕᥝᥳ။ ᥘᥨᥝᥱ ᥔᥦᥒᥴ ᥖᥪᥢᥰ ᥑᥛᥰ ᥔᥩᥒᥴ ᥙᥤ ᥘᥩᥒᥳ ᥐᥩᥲ ᥙᥥᥢᥴᥴ ᥘᥧᥐ ᥛᥥ ᥘᥭᥲ ᥖᥨᥙᥱ ᥖᥣᥛᥱ ᥝᥭᥳ။ ᥟᥣᥱ ᥕᥧᥳ ᥐᥩᥲ ᥕᥒᥰ ᥖᥪᥐᥳ ᥘᥥᥐᥳ ᥕᥧᥱ ᥘᥦᥲ ᥟᥛᥱ ᥓᥣᥒ ᥕᥧᥐᥳ ᥕᥩᥒᥲ ᥟᥧᥙᥳ ᥛᥫᥒᥰ။ ᥖᥥᥴ ᥙᥩᥭᥱ ᥙᥥᥢ ᥛᥫᥒᥰ ᥘᥧᥖ ᥓᥝᥲ ᥞᥣᥛᥰ ᥑᥧᥢᥴ ᥐᥩᥲ ᥛᥫᥒᥰ ᥞᥤᥛᥰ ᥞᥩᥛᥰ ᥖᥥᥴ ᥓᥣᥒ ᥑᥝᥲ ᥓᥤᥛ ᥘᥦᥲ ᥝᥨᥢᥳ ᥕᥣᥙᥱ ᥝᥭᥳ ᥕᥧᥱ ᥖᥥᥳ ᥖᥥᥳ ᥕᥝᥳ။
ᥖᥣᥝᥳ၊ ᥔᥪᥒᥱ၊ ᥚᥩᥒᥰ ᥛᥫᥒᥰ ᥖᥒᥰ ᥘᥣᥭᥴ ᥐᥧᥛ ᥐᥢ ᥝᥣ “ᥘᥣᥒᥰ ᥟᥤᥱ ᥑᥛᥰ ᥘᥦᥒ ᥘᥢᥳ ... ᥕᥣᥛᥲ ᥕᥧᥱ ᥞᥤᥛᥰ ᥓᥝᥲ ᥟᥧᥲ ᥔᥥᥴ ... ᥓᥩᥭ ᥐᥣᥢ ᥛᥣᥰ ᥘᥦᥲ ... ᥛᥤᥰ ᥖᥨᥝ ᥖᥨᥙᥱ ᥐᥣᥢ ᥚᥩᥒᥰ ᥒᥛᥰ ᥛᥣᥢᥲ ᥛᥫᥒᥰ ᥕᥧᥱ ... ᥔᥒᥴ ᥝᥣ ᥟᥛᥱ ᥑᥬᥲ ᥞᥬᥲ ᥛᥣᥢᥲ ᥛᥫᥒᥰ ... ᥖᥨᥐᥱ ᥖᥬᥲ ᥖᥣᥒᥱ ᥛᥣᥢᥲ ᥖᥣᥒᥱ ᥛᥫᥒᥰ ᥖᥥᥳ ... ᥗᥧᥐᥴ ᥕᥧᥐᥳ ᥘᥣᥒᥰ ᥟᥤᥱ ... ᥑᥪᥢᥲ ᥟᥧᥙᥳ ᥛᥫᥒᥰ ᥐᥩᥭᥰ ᥕᥝᥳ ...” ᥘᥭᥴ ᥔᥥᥴ ᥖᥨᥐᥱ ᥕᥩᥢᥰ ᥘᥣᥒᥰ ᥟᥤᥱ ᥑᥪᥢᥲ ᥙᥧᥖ ᥞᥣᥒᥲ ᥞᥨᥝᥴ ᥘᥦᥲ ᥛᥫ ᥖᥥᥱ ᥖᥦᥳ ᥘᥣᥒᥰ ᥟᥤᥱ ᥟᥛᥱ ᥑᥬᥲ ᥚᥩᥛᥳ ᥞᥙᥳ။ ᥚᥩᥒᥰ ᥛᥫᥒᥰ ᥖᥒᥰ ᥘᥣᥭᥴ ᥖᥨᥐᥱ ᥕᥩᥢᥰ ᥘᥦᥢᥱ ᥘᥦᥲ ᥛᥢᥰ ᥘᥣᥒᥰ ᥝᥨᥢᥳ ᥝᥣ
“ᥚᥩᥒᥰ ᥛᥫ ...ᥛᥫᥒᥰ ᥖᥭᥰ ᥘᥦᥲ ... ᥙᥧᥳ ᥐᥛᥱ ᥖᥪᥐᥱ ᥐᥢ ᥔᥥᥴ ... ᥛᥣᥢᥲ ᥛᥫᥒᥰ ᥔᥧᥐ ᥕᥧᥒᥲ ᥝᥭᥳ ᥕᥧᥱ ᥘᥒᥱ ᥘᥭᥴ ... ᥘᥣᥒᥰ ᥜᥣᥳ ᥓᥤᥒᥱ ᥐᥩᥰ ... ᥛᥫᥰ ᥛᥤᥰ ᥝᥭᥳ ᥖᥤ ᥙᥧᥳ ᥐᥛᥱ ... ᥔᥒᥴ ᥓᥫᥳ ᥖᥭᥰ ᥟᥛᥱ ᥙᥥᥳ ᥙᥧᥳ ᥐᥛᥱ ᥘᥦᥲ ... ᥛᥫᥒᥰ ᥛᥣᥝᥰ ᥔᥛᥳ ᥑᥣᥖᥱ ᥑᥧᥢᥴ ᥝᥭᥳ ᥘᥭᥴ ᥓᥪᥒ ... ᥛᥫᥒᥰ ᥛᥣᥝᥰ ᥖᥥᥴ ᥓᥣᥒ ... ᥖᥨᥐᥱ ᥖᥬᥲ ᥙᥧᥳ ᥐᥛᥱ ᥐᥣᥱ ... ᥛᥫ ᥘᥩᥒᥳ ᥕᥬᥱ ᥛᥣᥰ ᥐᥩᥲ ... ᥖᥥᥴ ᥟᥛᥱ ᥛᥤᥰ ᥝᥛᥣᥢᥲ ᥛᥫᥒᥰ ... ᥟᥧᥙᥳ ᥙᥫᥒᥱ ᥕᥝᥳ ᥘᥦᥲ ... ᥔᥣᥭᥴ ᥔᥪᥙ ᥑᥫᥰ ᥑᥧᥢᥴ ᥛᥫᥒᥰ ᥛᥣᥝᥰ ... ᥖᥥᥴ ᥞᥣᥭᥴ ᥘᥣᥭ ᥐᥣᥱ ...” ᥘᥭᥴ ᥔᥥᥴ ᥛᥧᥒ ᥗᥪᥒᥴ ᥐᥣᥛᥱ ᥓᥛᥱ ᥛᥣᥱ ᥛᥣᥢᥲ ᥛᥫᥒᥰ ᥛᥫᥰ ᥘᥣᥲ ᥘᥦᥰ ᥘᥣᥒᥰ ᥟᥤᥱ ᥑᥪᥢᥲ ᥟᥧᥙᥳ ᥙᥫᥒᥱ ᥛᥫᥒᥰ ᥛᥣᥝᥰ ᥘᥨᥒᥴ ᥛᥫ ᥙᥤ 1295 ᥘᥢᥳ ᥕᥧᥱ ᥕᥝᥳ။
ᥘᥣᥒᥰ ᥟᥤᥱ ᥑᥪᥢᥲ ᥙᥥᥢ ᥑᥧᥢᥴ ᥕᥝᥳ ᥔᥥᥴ ᥖᥣᥳ ᥟᥛᥱ ᥐᥪᥒᥳ ᥐᥣᥒᥳ ᥞᥖᥳ ᥔᥣᥢᥴ ᥑᥖᥱ ᥚᥦᥖ ᥑᥨᥝᥲ ᥙᥨᥒ ᥘᥐᥴ ᥓᥝᥲ ᥟᥧᥲ ᥘᥦᥲ ᥟᥛᥱ ᥓᥣᥒ ᥞᥩᥒᥳ ᥟᥝ ᥘᥣᥒᥰ ᥟᥩᥢᥱ ᥑᥝᥴ ᥛᥥ ᥘᥧᥐ ᥑᥝᥲ ᥞᥣᥒᥲ ᥞᥨᥝᥴ ᥑᥪᥢᥰ ᥐᥛᥰ ᥘᥥᥝ။ ᥔᥪᥙᥱ ᥘᥐ ᥘᥩᥛᥴ ᥘᥥᥒᥳ ᥘᥧᥴ ᥝᥭᥳ ᥕᥧᥱ ᥖᥤ ᥐᥝᥱ ᥘᥢᥳ ᥐᥩᥭᥰ ᥕᥝᥳ။ ᥙᥤ 1304 ᥘᥢᥳ ᥟᥣᥭᥲ ᥔᥦᥒᥴ ᥑᥭᥱ ᥖᥦᥙᥱ ᥟᥝ ᥞᥨᥝᥴ “ᥓᥨᥝᥱ ᥓᥣᥱ ” ᥔᥣᥐ ᥗᥪᥒᥴ ᥑᥧᥢᥴ ᥕᥤ ᥑᥣᥭᥰ ᥑᥛᥰ ᥘᥦᥲ ᥘᥣᥒᥰ ᥜᥣᥳ ᥓᥤᥒᥱ ᥟᥛᥱ ᥞᥖᥴ ᥕᥧᥱ ᥙᥧᥳ ᥐᥛᥱ ᥕᥝᥳ ᥔᥥᥴ ᥛᥫᥰ ᥙᥪᥒ ᥘᥣᥒᥰ ᥟᥤᥱ ᥑᥪᥢᥰ။
ᥙᥤ 1305 ᥛᥫ ᥟᥣᥱ ᥕᥧᥳ ᥘᥩᥒᥳ ᥘᥭᥲ (15)ᥙᥤ ᥘᥣᥒᥰ ᥟᥤᥱ ᥝᥣ “ᥑᥧᥢᥴ ᥚᥩᥒᥰ ᥒᥛᥰ ᥛᥣᥢᥲ ᥛᥫᥒᥰ ... ᥛᥢᥲ ᥐᥪᥛᥰ ᥑᥪᥢᥲ ᥕᥬᥱ ᥘᥢᥳ ... ᥖᥥᥴ ᥘᥭᥲ ᥛᥤᥰ ᥑᥣᥛᥰ ᥞᥧᥳ ᥘᥤ ... ᥟᥫᥭᥰ ᥐᥨᥝᥳ ᥘᥤ ᥘᥦᥲ ... ᥐᥪᥒᥱ ᥘᥤ ᥙᥨᥐᥱ ᥙᥩᥒ ᥙᥢ ᥘᥩᥒᥳ ᥕᥝᥳ ...” ᥘᥭᥴ ᥔᥥᥴ ᥔᥨᥒᥱ ᥑᥧᥢᥴ ᥕᥤ ᥛᥫᥰ ᥓᥧᥰ ᥘᥣᥒᥰ ᥕᥥᥲ ᥑᥛᥰ ᥘᥨᥒᥱ ᥛᥫᥒᥰ ᥘᥩᥒᥴ ᥔᥥᥴ။ ᥙᥩᥭᥱ ᥑᥧᥢᥴ ᥔᥣᥛᥴ ᥘᥨᥒᥴ ᥛᥫᥰ ᥓᥧᥰ ᥘᥣᥒᥰ ᥟᥣᥛ ᥟᥨᥝᥰ ᥖᥤ ᥐᥥᥒᥰ ᥞᥧᥒᥳ ᥕᥧᥱ ᥕᥝᥳ။
ᥛᥫᥒᥰ ᥛᥣᥝᥰ ᥘᥨᥒᥴ ᥘᥦᥳ ᥛᥫᥒᥰ ᥛᥤᥖ[edit | edit source]
ᥙᥤ 1306 ᥑᥧᥢᥴ ᥕᥤ ᥑᥣᥭᥰ ᥑᥛᥰ ᥘᥩᥢᥰ ᥚᥥᥰ ᥘᥦᥲ ᥟᥛᥱ ᥛᥤᥰ ᥑᥧᥢᥴ ᥙᥧᥖ ᥚᥩᥒᥰ ᥒᥛᥰ ᥛᥫᥒᥰ ᥛᥤᥖ ᥕᥝᥳ။ ᥚᥩᥒᥰ ᥛᥫᥒᥰ ᥛᥫᥰ ᥕᥩᥢᥰ ᥖᥤ “ᥑᥧᥢᥴ ᥖᥣᥭᥱ ᥙᥧᥒ ” ᥓᥝᥲ ᥘᥨᥒᥴ ᥔᥦᥢᥴ ᥓᥥ ᥘᥦᥲ ᥞᥬᥲ ᥘᥧᥐ ᥓᥣᥭᥰ ᥘᥨᥒᥴ ᥛᥢᥰ “ᥚᥫᥴ ᥓᥒᥱ ᥑᥒᥱ ” ᥛᥫᥰ ᥚᥩᥒᥰ ᥒᥛᥰ ᥛᥫᥒᥰ ᥛᥤᥖ ᥕᥝᥳ။
“ᥚᥫᥴ ᥓᥒᥱ ᥑᥒᥱ ” ᥖᥢᥰ ᥞᥥᥖᥱ ᥑᥧᥢᥴ ᥘᥭᥲ ᥔᥩᥒᥴ ᥙᥤ ᥐᥩᥭᥰ ᥔᥥᥴ ᥘᥩᥢᥰ ᥚᥥᥰ ᥐᥣᥱ ᥘᥦᥲ ᥙᥤ 1308 ᥘᥧᥐ ᥓᥣᥭᥰ ᥛᥢᥰ “ᥑᥧᥢᥴ ᥖᥣᥭᥱ ᥑᥪᥢᥲ ” ᥑᥪᥢᥰ ᥙᥧᥖ။ ᥘᥧᥐ ᥕᥤᥒᥰ ᥓᥝᥲ ᥜᥣᥳ ᥛᥫᥒᥰ ᥘᥦᥛᥰ “ᥘᥣᥒᥰ ᥟᥣᥛ ᥑᥩᥒᥱ ” ᥛᥫᥰ ᥙᥥᥢ ᥘᥣᥒᥰ ᥜᥣᥳ “ᥑᥧᥢᥴ ᥖᥣᥭᥱ ᥑᥪᥢᥲ ” ᥝᥭᥳ ᥘᥦᥲ ᥘᥩᥒᥳ ᥕᥤᥒᥰ ᥛᥢᥰ ᥘᥣᥒᥰ “ᥘᥣᥒᥰ ᥐᥣᥢᥲ ᥑᥛᥰ ᥔᥬᥴ ” ᥐᥩᥲ ᥛᥫᥰ ᥕᥧᥱ ᥓᥩᥛᥰ ᥖᥤ ᥛᥫᥒᥰ ᥛᥤᥖ ᥝᥭᥳ ᥕᥝᥳ။
“ᥚᥫᥴ ᥓᥒᥱ ᥑᥒᥱ ” ᥙᥥᥢ ᥙᥤ ᥟᥣᥭᥲ ᥟᥩᥐᥱ ᥟᥩᥐᥱ ᥑᥧᥢᥴ ᥚᥣᥒᥱ ᥑᥛᥰ (ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ )ᥘᥦᥲ ᥑᥧᥢᥴ ᥖᥣᥭᥱ ᥑᥪᥢᥰ ᥑᥣᥴ ᥘᥣᥒᥰ ᥟᥤᥱ ᥐᥩᥲ ᥙᥥᥢ ᥘᥧᥐ ᥙᥤ ᥘᥧᥐ ᥘᥩᥒᥳ ᥐᥢ ᥕᥝᥳ။ ᥛᥫᥒᥰ ᥛᥤᥖ ᥘᥦᥲ ᥛᥫᥒᥰ ᥛᥣᥝᥰ ᥘᥨᥒᥴ ᥙᥥᥢ ᥛᥫᥒᥰ ᥙᥤ ᥛᥫᥒᥰ ᥘᥩᥒᥳ ᥐᥢ ᥔᥥᥴ ᥛᥫᥒᥰ ᥛᥣᥝᥰ ᥟᥛᥱ ᥛᥤᥰ ᥐᥦᥛ ᥛᥫᥒᥰ ᥝᥭᥳ ᥘᥦᥲ ᥑᥧᥢᥴ ᥖᥣᥭᥱ ᥑᥪᥢᥲ ᥛᥧᥒ ᥛᥩᥒᥰ ᥘᥭᥲ ᥟᥧᥙᥳ ᥙᥣᥰ ᥛᥫᥒᥰ ᥛᥣᥝᥰ ᥔᥥᥴ ᥐᥭᥳ ᥛᥫᥰ ᥔᥧᥱ ᥓᥬᥰ ᥛᥫᥒᥰ ᥛᥣᥝᥰ ᥖᥣᥱ ᥔᥥᥱ ᥕᥝᥳ။
ᥙᥤ 1309 ᥘᥢᥳ ᥘᥣᥒᥰ ᥟᥤᥱ ᥓᥙᥴ ᥖᥣᥒᥰ ᥙᥥᥢ။ ᥑᥧᥢᥴ ᥖᥣᥭᥱ ᥑᥪᥢᥲ ᥛᥫᥰ ᥙᥬᥳ ᥕᥧᥱ ᥖᥤ ᥛᥫᥒᥰ ᥛᥣᥝᥰ။ ᥛᥫ ᥞᥧᥳ ᥝᥣ ᥘᥣᥒᥰ ᥟᥤᥱ ᥖᥥᥴ ᥟᥛᥱ ᥑᥦᥢᥰ ᥑᥪᥢᥰ ᥕᥝᥳ ᥘᥭᥴ ᥘᥢᥳ ᥑᥧᥢᥴ ᥖᥣᥭᥱ ᥑᥪᥢᥲ ᥕᥩᥢᥰ ᥞᥬᥲ ᥟᥝ ᥛᥫᥒᥰ ᥛᥣᥝᥰ ᥟᥣᥙ ᥙᥢ ᥛᥢᥰ ᥔᥥᥴ ᥖᥣᥳ ᥘᥣᥒᥰ ᥟᥤᥱ ᥟᥛᥱ ᥖᥩᥙᥱ ᥔᥒᥴ။ ᥘᥐᥳ ᥘᥐᥴ ᥓᥬᥴ ᥖᥣᥱ ᥛᥣᥢᥲ ᥛᥫᥒᥰ ᥛᥢᥰ ᥘᥣᥒᥰ ᥕᥧᥱ ᥖᥥᥳ ᥖᥥᥳ။ ᥖᥣᥒᥰ ᥙᥥᥢ ᥐᥩᥲ ᥐᥤᥢᥰ ᥛᥣᥰ ᥘᥩᥭᥰ ᥘᥩᥭᥰ။ ᥘᥩᥒᥳ ᥓᥣᥭᥰ ᥔᥛᥳ ᥟᥛᥱ ᥛᥤᥰ ᥖᥤ ᥛᥣᥢᥲ ᥛᥫᥒᥰ ᥘᥦᥲ ᥘᥣᥒᥰ ᥟᥤᥱ ᥓᥒᥱ ᥘᥐᥳ ᥙᥩᥭᥱ ᥐᥨᥢᥰ ᥓᥩᥛᥰ ᥑᥣᥴ ᥞᥬᥲ ᥛᥣᥰ ᥑᥪᥢᥰ ᥝᥭᥰ ᥝᥭᥰ ᥕᥧᥱ ᥕᥝᥳ။
ᥘᥣᥒᥰ ᥟᥤᥱ ᥘᥩᥢᥰ ᥚᥥᥰ[edit | edit source]
ᥙᥤ 1310 ᥘᥣᥒᥰ ᥟᥤᥱ ᥟᥛᥱ ᥘᥣᥛᥰ ᥞᥧᥳ ᥘᥭᥲ ᥔᥣᥭᥴ ᥓᥬ ᥖᥨᥝ ᥐᥝᥱ ᥘᥦᥲ ᥘᥐᥳ ᥐᥧᥛ “ᥚᥩᥒᥰ ᥑᥣᥒᥰ ” ᥛᥢᥰ ᥘᥣᥒᥰ ᥕᥝᥳ ᥞᥬᥲ ᥟᥝ ᥓᥧᥛᥲ ᥛᥫᥒᥰ ᥛᥣᥝᥰ ᥘᥨᥒᥴ ᥟᥢ ᥙᥥᥢ ᥑᥛᥰ ᥘᥐᥴ ᥘᥫᥒ ᥙᥢᥰ (80 ᥓᥣᥙ )ᥘᥢᥳ ᥐᥣᥱ ᥙᥢ ᥘᥣᥒᥰ ᥟᥩᥢᥱ ᥔᥤᥛᥰ ᥝᥭᥳ။ ᥔᥒᥱ ᥘᥣᥖ ᥙᥣᥰ ᥝᥣ
“ᥟᥛᥱ ᥞᥪᥒᥴ ᥟᥛᥱ ᥘᥣᥢᥰ ... ᥛᥫᥒᥰ ᥛᥣᥝᥰ ᥘᥨᥒᥴ ᥞᥝᥰ ᥘᥭᥳ ... ᥖᥥᥴ ᥓᥣᥒ ᥛᥤᥰ ᥘᥩᥒ ᥔᥧᥐᥳ ᥕᥧᥒᥲ ... ᥞᥤᥛᥴ ᥛᥣᥢᥲ ᥛᥫᥒᥰ ᥐᥢ ᥕᥧᥱ ... ᥘᥩᥒᥳ ᥔᥩᥒᥴ ᥓᥝᥲ ᥐᥩᥲ ... ᥙᥭᥱ ᥚᥦᥝᥴ ᥞᥩᥖ ᥛᥣᥰ ᥘᥦᥲ ... ᥛᥤᥰ ᥘᥩᥒ ᥘᥐᥴ ᥓᥬ ᥔᥥᥴ ... ᥟᥝ ᥓᥧᥛᥲ ᥛᥫᥒᥰ ᥔᥨᥒᥱ ᥛᥣᥰ ᥕᥝᥳ ... ᥟᥛᥱ ᥑᥬᥲ ᥞᥬᥲ ᥖᥨᥙᥱ ᥚᥥᥰ ᥕᥩᥢᥳ ᥘᥦᥲ ... ᥓᥨᥝ ᥐᥣ ᥑᥣᥝᥰ ᥛᥢᥰ ᥙᥭᥱ ᥗᥪᥒᥴ ᥘᥢᥳ ... ᥟᥛ ᥘᥙᥳ ᥝᥭᥳ ᥘᥩᥒ ᥘᥭᥳ ᥘᥤ ᥘᥤ ... ᥛᥫ ᥘᥩᥒᥳ ᥞᥩᥖ ᥛᥣᥰ ᥘᥦᥲ ... ᥛᥤᥰ ᥘᥩᥒ ᥞᥤᥛᥴ ᥛᥫᥒᥰ ᥐᥢ ᥓᥪᥒ ... ᥞᥬᥲ ᥘᥩᥒᥳ ᥟᥝ ᥓᥧᥛᥲ ᥛᥫᥒᥰ ᥘᥭᥳ ... ᥙᥥᥢ ᥔᥣᥐ ᥔᥥᥱ ᥔᥥᥴ ... ᥑᥪᥢᥲ ᥙᥧᥖ ᥔᥣᥭᥴ ᥔᥪᥙᥱ ᥑᥧᥢᥴ ... ᥛᥫᥒᥰ ᥛᥣᥝᥰ ᥘᥨᥒᥴ ᥞᥝᥰ ᥐᥣᥱ ...” ᥘᥭᥴ ᥕᥝᥳ။ ᥘᥣᥒᥰ ᥟᥩᥢᥱ ᥟᥝ ᥓᥧᥛᥲ ᥛᥫᥒᥰ ᥐᥣᥱ ᥚᥒᥴ ᥝᥭᥳ ᥖᥬᥲ ᥛᥣᥐᥱ ᥞᥤᥢᥴ ᥘᥨᥒᥴ ᥞᥤᥛᥰ ᥗᥛᥲ ᥛᥢᥰ ᥘᥣᥒᥰ ᥘᥢᥳ ᥕᥝᥳ။
ᥙᥤ 1311 ᥘᥭᥲ ᥟᥝ ᥓᥧᥛᥲ ᥛᥫᥒᥰ ᥙᥢ ᥘᥣᥒᥰ ᥟᥩᥢᥱ ᥝᥭᥳ ᥕᥝᥳ ᥘᥦᥲ ᥘᥣᥒᥰ ᥟᥤᥱ ᥙᥨᥒ ᥓᥬ ᥐᥣᥱ ᥕᥝᥳ ᥔᥥᥴ ᥚᥩᥒᥰ ᥛᥫ ᥘᥩᥒᥳ ᥖᥪᥐᥳ ᥛᥤᥰ ᥕᥧᥱ ᥓᥩᥛᥰ ᥖᥣᥒᥰ ᥘᥢᥳ ᥘᥣᥒᥰ ᥟᥤᥱ ᥘᥩᥢᥰ ᥚᥥᥰ ᥐᥣᥱ ᥕᥧᥱ ᥕᥝᥳ။ ᥝᥣᥭᥰ ᥘᥪᥢᥰ ᥛᥣᥰ ᥓᥧᥛᥲ ᥛᥫᥒᥰ ᥘᥢᥳ ᥙᥥᥢ ᥔᥣᥐ ᥔᥥᥱ ᥘᥨᥒᥴ ᥙᥢ ᥞᥬᥲ ᥘᥩᥒᥳ ᥑᥪᥢᥲ ᥚᥩᥒᥰ ᥒᥛᥰ ᥛᥫᥒᥰ ᥛᥣᥝᥰ ᥘᥭᥲ ᥖᥥᥳ ᥕᥝᥳ။
ᥘᥣᥒᥰ ᥟᥤᥱ ᥑᥛᥰ ᥘᥦᥒ ᥙᥥᥢ ᥘᥧᥐ ᥕᥤᥒᥰ ᥘᥤ ᥖᥣᥱ “ᥟᥧᥲ ”။ ᥙᥥᥢ ᥙᥤ ᥘᥣᥒᥰ ᥘᥤ ᥖᥣᥱ “ᥘᥩᥒᥳ ”။ ᥙᥥᥢ ᥑᥧᥢᥴ ᥘᥤ ᥖᥣᥱ “ᥛᥣᥢᥲ ᥛᥫᥒᥰ ”။ ᥙᥥᥢ ᥘᥣᥒᥰ ᥕᥤᥒᥰ ᥘᥤ ᥖᥣᥱ “ᥓᥫᥳ ᥓᥣᥖ ” ᥘᥦᥲ ᥛᥫᥒᥰ ᥛᥣᥝᥰ ᥘᥨᥒᥴ ᥟᥛᥱ ᥞᥣᥭᥴ ᥘᥣᥭ ᥐᥣᥱ ᥔᥥᥴ ᥝᥣᥭᥰ ᥘᥪᥢᥰ ᥛᥣᥰ ᥘᥭᥲ ᥛᥤᥰ ᥙᥪᥢᥰ ᥘᥪᥰ ᥘᥒᥴ ᥛᥣᥰ ᥗᥦᥒᥲ ᥕᥧᥱ ᥕᥝᥳ။
ᥔᥒᥴ ᥓᥫᥳ ᥟᥛᥱ ᥛᥤᥰ ᥙᥤ ᥘᥣᥒᥰ ᥘᥒᥱ ᥘᥣᥒᥰ ᥟᥤᥱ ᥘᥭᥴ ᥓᥪᥒ ᥔᥫᥴ ᥑᥣᥢᥱ ᥜᥣᥳ ᥘᥦᥲ ᥔᥣᥛᥴ ᥘᥨᥒᥴ ᥜᥣᥳ ᥐᥩᥲ ᥖᥥᥴ ᥟᥛᥱ ᥓᥣᥒ ᥛᥤᥰ ᥛᥣᥰ ᥘᥭᥲ။ ᥓᥝᥲ ᥞᥨᥝᥴ ᥔᥦᥒᥴ ᥘᥨᥒᥴ “ᥓᥝᥲ ᥔᥫᥴ ᥑᥣᥢᥱ ᥜᥣᥳ ” ᥘᥭᥴ ᥘᥢᥳ ᥐᥩᥲ ᥖᥥᥴ ᥟᥛᥱ ᥓᥣᥒ ᥐᥪᥐᥱ ᥙᥪᥢᥰ ᥘᥪᥰ ᥘᥒᥴ ᥝᥭᥳ ᥛᥣᥰ ᥙᥢ ᥘᥭᥲ ᥘᥒᥱ ᥐᥝᥱ။
ᥘᥣᥒᥰ ᥕᥤᥒᥰ ᥞᥥᥖᥱ ᥑᥧᥢᥴ။ ᥘᥣᥒᥰ ᥕᥤᥒᥰ ᥐᥦᥖᥱ ᥑᥥᥴ ᥛᥫᥒᥰ။ ᥘᥣᥒᥰ ᥕᥤᥒᥰ ᥞᥐᥳ ᥓᥫᥳ ᥓᥣᥖ။ ᥘᥣᥒᥰ ᥕᥤᥒᥰ ᥞᥐᥳ ᥛᥣᥢᥲ ᥛᥫᥒᥰ။ ᥘᥣᥒᥰ ᥕᥤᥒᥰ ᥐᥖᥳ ᥑᥦᥢᥱ ᥘᥭᥴ ᥘᥢᥳ ᥐᥨᥢᥰ ᥖᥣᥒᥱ ᥑᥫᥰ ᥐᥩᥭᥰ ᥛᥤᥰ ᥛᥣᥰ ᥟᥛᥱ ᥓᥪ။ “ᥖᥭᥰ ”ᥐᥩᥲ ᥛᥤᥰ ᥕᥧᥱ ᥘᥭᥴ ᥘᥢᥳ “ᥘᥣᥒᥰ ᥟᥤᥱ ” ᥙᥥᥢ ᥔᥣᥐ ᥔᥥᥱ ᥘᥥᥴ ᥝᥭᥳ ᥕᥧᥱ ᥐᥨᥝᥳ ᥘᥫᥒ။
ᥞᥐᥳ ᥓᥫᥳ ᥞᥐ ᥓᥣᥖ၊ ᥞᥐᥳ ᥛᥣᥢᥲ ᥛᥫᥒᥰ၊ ᥘᥛᥳ ᥐᥖᥳ ᥖᥣᥒᥰ ᥑᥦᥢᥱ ᥘᥭᥴ ᥘᥢᥳ ᥟᥛᥱ ᥝᥣ ᥕᥤᥒᥰ ᥟᥛᥱ ᥝᥣ ᥓᥣᥭᥰ ᥛᥤᥰ ᥛᥫᥢᥴ ᥐᥢ ᥕᥧᥱ ᥘᥭᥴ ᥘᥢᥳ ᥐᥩᥲ “ᥘᥣᥒᥰ ᥟᥤᥱ ” ᥙᥥᥢ ᥔᥣᥐ ᥔᥥᥱ ᥘᥥᥴ ᥝᥭᥳ ᥕᥧᥱ ᥐᥨᥝᥳ ᥘᥫᥒ။ ᥔᥒᥴ ᥝᥣ ᥛᥤᥰ ᥐᥪᥒᥱ ᥗᥫᥐ ᥕᥧᥱ ᥓᥪᥒ “ᥖᥭᥰ ” ᥟᥛᥱ ᥓᥦᥐᥱ ᥗᥣᥢᥲ ᥕᥤᥒᥰ ᥓᥣᥭᥰ။ “ᥖᥭᥰ ”ᥙᥢ ᥔᥧᥢᥱ ᥘᥣᥒᥰ ᥕᥤᥒᥰ ᥙᥥᥒᥰ ᥚᥧᥱ ᥓᥣᥭᥰ ᥕᥧᥱ ᥘᥭᥴ ᥘᥢᥳ ᥐᥩᥲ “ᥘᥣᥒᥰ ᥟᥤᥱ ” ᥙᥥᥢ ᥔᥣᥐ ᥔᥥᥱ ᥘᥥᥴ ᥝᥭᥳ ᥕᥧᥱ ᥐᥨᥝᥳ ᥘᥫᥒ။
ᥘᥣᥒᥰ ᥕᥤᥒᥰ ᥐᥖ ᥖᥣᥒᥰ ᥑᥦᥢᥱ၊ ᥘᥣᥒᥰ ᥕᥤᥒᥰ ᥞᥐᥳ ᥓᥫᥳ ᥓᥣᥖ၊ ᥘᥣᥒᥰ ᥕᥤᥒᥰ ᥞᥥᥖᥱ ᥑᥧᥢᥴ ᥟᥧᥙᥳ ᥙᥫᥒᥱ ᥛᥣᥢᥲ ᥛᥫᥒᥰ ᥛᥣᥰ ᥘᥢᥳ ᥟᥛᥱ ᥓᥪ ᥝᥣ ᥛᥤᥰ ᥘᥣᥒᥰ ᥟᥤᥱ ᥐᥨᥝᥳ ᥘᥥᥝ ᥐᥩᥭᥰ။ ᥕᥣᥛᥲ ᥛᥤᥰ ᥛᥣᥰ ᥖᥒᥰ ᥘᥛᥴ ᥕᥧᥱ။
ᥙᥫᥒ ᥟᥤᥒ[edit | edit source]
- ↑ ᥙᥪᥢᥰ ᥓᥢᥳ ᥔᥤᥱ၊ ᥒᥝᥲ ᥒᥧᥢᥰ ᥜᥤᥒᥲ ᥒᥥ ᥘᥤᥐ ᥘᥣᥭᥰ ᥙᥣᥭᥰ ᥙᥤᥒᥱ ᥕᥣᥱ ᥖᥭᥰ၊ ᥘᥣᥲ 22-28၊ 2005